Гьарил адамлис дурхъаси саби вегI акIубси ва халакаваибси мер. СенахIенну, ил ванзаличив сай адам вашес, гъайикIес ва цархIилти гIямрула далилтачи бурсиируси. Кьисматли чина укалра адам, чум дус ардукьяллира, бегIлара шалати гьанбикуни дархдасунти дирар дурхIядешличил, вегI акIубти мер-мусаличил. БегIлара уркIилис дурхъати гьанбикуни ва гIямрула манзилти – ибти дугьби дакьибхIели, набра дила дурхIядеш гьандикур ва ну акIубси ХIурхъила шила сурат хIулбала гьалаб итмаданал багьарбирар. ХIурхъила ши мерлабиубси саби Сергокъалала районнизиб. Шила жагадешличила бурес, гьатIира цIакьли пикрирухъес хIяжатбиркур, сенахIенну дебали къиянни саби илала тIабигIятличи хасти дугьби даргес. Мекелли жагати мер-мусаличиб ши тIашли саби. ХIеб садаибхIели, мургьи-рангли ухути вавнани кIапIдарибти шиниша кьалтинти гьар-чинаралра удушибтиван дилзан. Дубурла тяхIуси гьава гьигьбирули, илди эркинти мер-мусаличи ва мирхъиван саберхурли, вяшбикIути адамтачи хIеррикIухIеливан уркIи гьайбатли хIебирар. ГIе, дила дурхIядешла манзилличил цугдуцасли, шилизибти адамтала гIямру гIяхIцадла дарскадиубли сари. Амма халкьла адамдеш, ламус-хIяя, гIяхIялдеш чиналра дикили ахIен. ХIурхъила шилизиб дебали гIякьлучебти, дагьрилизиб кагибти, ламус-хIяяла, хала бегIтала гIядатунас марти, илдачибад букьурли баибси рухIла давла мяхIкамли бихIути адамти хIербирули саби. ГIялимтала, пачалихъла ва политикала вакилтала гIевдухьли ва Дагъиста культурала центрли бетаурси, ил жявхIелла шиличила арагIебли дунъяличиб хабардерхурли сари. Илди баянтачила бикьухIели, уркIилизир жура-журала пахрула хIялани алкIули дирар.
Адамти шимазибад шагьуртази гечбирнила анцIбукь ХIурхъила шиличира къячбикили саби. Амма гIергъиси замана шилизир сагати хъулри тIашдалтули сари. Ил анцIбукьра ши сагабирнилис ва илаб хIербирути адамти бахъбикIнилис сабабли бетарниличи рирхулра. Шимазиб хIербирути адамти нешла мезличил гъайбикIули саби, илди дузахъалли — лугъатла мезра детхIейхъур. Мезличил бархбасунси саби рухIла давлара. Илди дугьбала гьарли-марси мягIна гьарилли аргъес хIяжатли саби. АхIерти дарганти, дигахъеная хIушала мер-муса, иларти дурхъадешуни мяхIкамдарес къайгъибарая. Дила ХIурхъила шантасра гьатIира гьарбизуни, сархибдешуни дулгулра. Уржибдеш имцIадикIахъули, цабалгундеш чIумадикIахъули, разили, даршуси заклиур хIердиабая!
Дагъистайзиб гьалабси,
Дунъяличиб машгьурси,
Лебри кьалли жагаси
Ну акIуб ХIурхъила ши.
Лусентазир чатIницад
Леб хIела гIялимтира,
Галгубачир кIарицад
Леб хIела шягIиртира.
Вавнани авлахъ кьяйда
Тарих жагабарибси
Лебри кьалли пергерси
Баркабан ХIурхъила ши
ПатIимат Шахова
