Октябрьла цаибти бурхI­назиб Да­гъис­тайзиб 13 ибил жу­за­ла фестиваль «Тарки-Тау» бе­­­терхур. Фестиваль дура­бер­­­­­кIиб МяхIячкъалализиб ва Буйнакъсклизиб. Ишдус ил халкьла цабиубдешла Бар­хIи­лис хасбарибсири.
Жузала фестиваль Дагъис­тай­зиб бегI гьалаб дурабер­кIиб­сири 2012 ибил дуслизиб. 14 дусла бухIнаб ил нушала республикала биштIаси жузала базарличибад Северный Кавказлизиб бегIлара халаси жузала ярмаркаличи абикиб. 2024 ибил дуслизиб ил 10 бегIлара дурибти регионтала фестивальтази каберхурсири. 2025 ибил дуслизиб биалли «Тарки-Тау» фестивальли Россиялизир дура­деркIибти чердикIибти 57 фестивальлизиб 17 ибил мер буциб.
БегI гьалаб ил акIахъубси ва ил балбуцлис гьав бедибси адамли ветаур художник ва журналист, ДР-ла бекIлибиубси литературала «Дагъистан» жур­налла бекI редактор Марат ХIя­жиев. Илала бекIдешлиур сари жузала фестивальти дура­дур­кIутира.
Ишдуслизиб жузала ярмаркали Сулайбан Стальскийла ули­чилси паркла мякьлабси Пушкинна уличилси кьакьа лебилра буциб. Илар Северный Кавказла издательствобала майдунти мерладиублири. Лерилра издательствобала вакилти жузала ярмаркаличи, чули дураибти жузи хили, бакIилри.
Фестивальличир лекцияби, гьунибаъниби дурадеркIиб, бу­чIан­ти сагати жузачил тянишбариб.
Жузала фестивальличиб РФ-ла гIяхIтигъунти писательти ва поэтуни лебри: Юрий Поляков, Вячеслав Куприянов, Максим Аверин, Максим Гуреев, Анастасия Орлова, Ислам Ханипаев, Миясат Муслимова ва цархIилтира. Нура октябрьла 4-личив, бегIлара гIергъиси бархIи, жузала ярмаркаличи вякьунра. Шел сягIятцадхIи калунра ну ярмаркала майдунтачирти жузи хIердирули. Даггосиздатла майдайчиб ца жузра асира. Эффенди Къапиевличила сабри ил жуз. «Любимая песня моего Дагестана» бикIусири ил жузлис. Расул ХIямзатов Эффенди Къапиевлис или викIусири. Жуз наб дебали гIяхIбизур.
Жагьил виаслири, дахъал жузи исира нуни ишбархIила ярмаркаличирад. Сепайда. Сен илдигъунти жузала базурти, гьалар, лебилра адамтани жузи дучIухIели, хIедирутири?