ХIурхъила ши, даргала поэзияла классик ГIямарла Батирай акIубси мер сабливанцунра ахIенну, илабад дурабухъунти гьар секIайзиб жигарчебти ва гьалабяхI арбякьунти лугIилашал бахъал гIялимтачиблира машгьурси саби.
ГIилмулизиб, литературализиб, политикализиб, медицинализиб ва цархIилти кьялубазиб, халаси пай кабирхьули, бузули саби ишбархIира хабарла хIурхъанти.
Дила макьалализиб бурес дигулра, пергер хIурхъантала сияхI даимбируси, арагIеб Дагъиста гIямрулизи мекелли белгиси пай кабирхьуси, жагьси, жигарчевли политикализив гьалавяхI вашуси, МяхIячкъалала шагьарла жагьилтала Парламентла председатель, адамтала ихтиюрти далтахънила шайчибси комитетла хIянчизар, Дагъиста Халкьла Собраниела депутат Шамил ГIямаровла кумекчи ГIялигъалбицI ХIусейновличила.
Дусми хIясибли жагьси виалра, багьудлумачил ункъли вегIиубси, жагали гъайикIес балуси, зилантала ургаб сунела халаси хIурмат лебси, пергер гъабза сай ил. АкIубси сай ГIялигъалбицI ХIурхъила шилизив, гIядатла дубурланна хъалибарглизив. Школализив учIухIелил илис декIар-декIарти далдуцуни дурадуркIес дигахъи. БелчIи шила школара, ил Правовая академиялизи учIес кархули сай, илав учIули левай илини мягIничерти конференциябачир бутIакьяндеш дири, машгьурти адамтачил къаршиирки.
ГIялигъалбицIли халаси пай кабихьибти хIурхъантачила баянти даргили, биштIаси жузра дураиб. Адамтачил валиркуси, законти ункъли далуси илини гьарил сунечи дугьаизурсилис юридический кумек гIеб­биахъу.
Илала халаси къайгъи леб дарган мез гьаладяхI ардукесра. Ил багьандан илини бегIлара жигарла бутIакьяндеш дариб авалра даргала тотальный диктантуназир. Дирхулра, ил сунени чеббикIибси санигIятлизив дебали гьалавяхI аркьниличи.
Даргантала пахру ГIялигъалбицIлис духъянти гIямрура гьарбизунира дулгулра. Мурталра хIечила хабар калаб!