ХIушанира балуливан, нушала улкали мякьлабси Украинала Республикализиб дявила хасси балбуц (СВО) дурабуркIули саби. Ил бехIбихьибсири 2022 ибил дусла февраль базличиб. Нушала улкала хужаимтани ил балбуц селис дурабуркIусил чуйнара бурибсири. Гьаларван, Украинала дявила кьукьни нушала улкала Курск бикIуси областьличи чедухъун. Нушала дявила гIяскуртани илдала гьужум тIашаиб ва гьанна дебали цIакьти дургъби детурхули сари. Нушала сегъуналра ташмишдеш алкIули ахIен, чедухъунти гIяскурти тIутIудирнила ва нушала ванзаличирад илди дугIаили, ил азадбалтнила хIекьлизир.
Нушала улкали дявила Министерстволичил вягIда барили, къуллукъбарес арбякьунти адамтас арцла шайчирти шабагъатуни акIахъубли сари. Илдала хIекьлизив ва цархIилти масъултала шайчив «Дагъистан» РГВК-лизивад Дагъистан Республикала дявила комиссар, полковник Даитбег МяхIяммадович Мустапаев гъайухъунсири. ХIера сейкIулил…
— Июльла 31-личиб Россияла Президент Владимир Путинни ХIукму кьабулбариб. Илизир дявила Министерстволичил вягIда барибси адамлис дедлугути арцла кьадар чебаахъили саби. Гьалаблайчил цугбуцалли, ил гIяхIцадла имцIабиубли саби. Федеральный бюджетлизибад гьала хили гьачам бедлугуси арцла кьадар 400 азир къурушличи абикили саби. Гьалаб илала кьадар 195 азир къуруш бирусири. Нушала республикала бюджетлизирад июль базличибад гьачамли 500 азир къуруш арцла бедлугуси саби. Иличила хIукму кьабулбарибсири Дагъистан Республикала Правительстволи. Районни чула шайзирад 100 азир къурушра дедлугути сари. ГьатIира, вягIда барес гьалав адам узули виалли, ил организациялира кумекбарес хIяжатси саби.
ВягIда барибси ургъаннис гьар баз 210 азир къурушла алапа башахъуси саби. Командиртас бедлугуси алапа, гьатIира имцIаси саби. Мисаллис, взводла командирла заместительлис, сержантла у бихусилис 245 азир къуруш. Илкьяйдали, къаршикарла техника тIутIубарнилисра дедлугути арц лерти сари: самолетлис – 300 азир, вертолетлис – 200 азир, танклис – 100 азир ва цархIилти шабагъатунира.
Дявилизир деркIибти хIябал дуги-хIерилис кIел дуги-хIери бамсриахъахъес дедлугути сари. Илди акьути бурхIни хIясибли, яра бедлугуси отпускличи чеимцIадирути сари. Гьарил ургъаннис гьар байхъала дуслизиб отпуск бедлугуси саби 15 дуги-хIерилис, гьунилис харжбарибси замана хIисаблизи кахIесили. Рахли ургъанни пачалихъла шабагъат (награда) касалли, илис гьачамли шел оклад дедлугути сари.
Дявила хасси балбуцлизир бутIакьяндеш дарес дигуси адамли дявила Министерстволичил дуслис вягIда бируси саби, амма балбуц ахирличи бикайчи, ил вягIда бехъес вируси ахIен. Илгъуна аги саби гьанналис гьалаб вягIда барибтала ва мобилизация хIясибли тIалаббарибтала шайчибра. Ургъан акьувалтусира чIянкIли ил вяхъили, яра дусми хIясибли асухIебирули биалли сай. 65 дусла чедибти дявилизи аркути ахIен.
Россияла дявила Министерстволичил вягIда бигьес бирар дурала пачалихъла адамтанира. Илдас ил шайчир кункдешунира акIахъубли сари. Илкьяйдали, вягIда бигьес бирар чула шайчиб духIнарти къуллукъунала органтани дело абхьибтанира.
Нушала республикали халаси кумек бирули саби дявилизибти бургъантас. Гьар баз, жумягI, бархIи илдас хIяжатдиркути ваяхIличил, берк-бержличил кумек бурхьули саби. Нушала республикализибадти адамтани чула вягIда ва пачалихъла гьалабси чебла тамай, игитдешличил бетурхахъули саби.
Душман нушала ванзаличи вакIибхIели, дявила вягIда билгьутала лугIи хIяйнали имцIабиубли саби. Нушани бирхауди бирхьехIе халаси замана кахIели, ил нушала ванзаличивад дугIаэс имканбикIниличи ва Украинализибси дявила хасси балбуц (СВО) нушала чедибдешличил ахирличи биркниличи.
Руслан Ражабов
