Гьалабван, Табасаранна районна Хучнила шилизиб «Дагъиста хъалибарг» бикIуси байрам бетерхур. Ил хъалибаргла Дусла дазурбазиб дураберкIибсири.
ВерхIел узила ва ца рузила кIялгIяла майдайчир республикала югла шайчирти 12 районни ва 2 шагьарли юрт-азбар, темала черкадти ва жагьилтала майдунти гьаладихьилри. Гьар шайчирад дам-дядла агурби зайдикIулри, халкь шадлири ва делхъла мявализи кабулхъулри. Буралли, республикала лерилра районти шадлихъличи ункъли хIядурдиъни чебаэслири. Илдигъунти далдуцунани халкьла гьалмагъдешла бархбасунира дебадикIахъу. Шадлихъла балбуцличир Дахадаевла ва Хайдакьла районтала вакилтанира жигарла бутIакьяндеш дарни дигеслири.
«Дусла хъалибарг» бикIуси балбуц ДР-ла культурала, спортла, жагьилтала къуллукъунала, илкьяйдали бузерила ва социальный бяхIчибизлизиб гьалабяхI башахънила шайчирти министерствобала икьайчибли дураберкIибси саби. Иличир ДР-ла Правительствола Председатель ГIябдулмуслим ГIябдулмуслимовли, ДР-ла шила хозяйствола ва берк-бержла масанала шайчивси министр Мухтарбий Аджековли, адамла ихтиюртала шайчивси вакил Запир Алхасовли, ДР-ла жагьилтала къуллукъунала шайчивси министр Камил СягIидовли, Дагъистайзирра цайли цаси мегьла уста Жавгьарат МяхIяммадкьадиевани, республикала СМИ-бани, «Нешанала цIакь» бикIуси цалабяхъла вакилтани, туристунани ва бахъил цархIилтанира бутIакьяндеш дариб. Премьер-министрли ва илала бекIдешлиубси кьукьяли миллатунала бизити хурегуначилти, халкьла някъла хIянчурбачилти юрт-азбуртира жагьилтала арт-майдунтира хIердариб ва илдас чихъси кьимат кабатур.
Табасаранна районнизи вакIибхIели, ГI.ГIябдулмуслимовли гьаланачи СВО-лизиб алхунти бургъантала хIурматлис тIашбатурси памятникличи вавни кадихьиб. Ил памятник ишдус майла 8-личиб абхьибсири, регионна БекIла сипта хIясибли.
«Дагъиста хъалибарг» бикIуси балбуц ибхьули, улкала Президентли багьахъурси хъалибаргла Дусла дазурбазиб дурабуркIуси байрам биъни аргъахъиб премьер-министрли.
«Бахъал дурхIначилти хъалибаргуни Россияла хьулчни, дашдусмала тарих даимбирути ячейкаби диъниличила цIакьбарили бурули сай нушала Президент Владимир Путинни.
Гьачам-гьатIи гьанбуршулра, хъалибаргла мурад саби жинс даимбарни, бяркъчебти дурхIни абикьни.
ХIязлис ахIен Табасаранна районнизиб шадлихъла балбуц дураберкIес пикрибарибси. Ил республикала халатигъунти, бахъал дурхIнала дегIти хъалибаргуначилти, давлачерти культураличилси ва тарихличилси районтазибадли ца саби, суненира хъалибаргунала дурхъадешуни мяхIкамли дихIуси», — викIи ГI.ГIябдулмуслимов.
КIинайс ГI.ГIябдулмуслимовли республикала шими-шагьуртазирад байрамличи дакIибти 13 хъалибарглис Дагъиста Правительствола Баркаллала кагъурти дедиб, хъалибаргла гIяхIти гIядатуни мяхIкамдирни ва машгьурдирни, хъалибаргла институт чIумабирахънилизи ва дурхIни руркънилизи белгиси пай кабирхьни багьандан. Илди-ургар лерри Хайдакьла районнизибад – СултIанбековхъала, Дахъадаевла районнизибад – ГIялишиховхъала хъалибаргунира. КIелра даргала районна халкьлира жагьси наслу хала бегIтала дурхъати гIядатуни хьулчили дуцили, бяркъличи биркахъути саби.
«Нуша иша цаладикнила мурад саби хъалибаргла гIяхIти гIядатуни мяхIкамли калахъни. Нушала республикализир ишбархIигъунти байрумти имцIали дурадуркIалли, гIяхIси бирар. СенахIенну илдани жагьилти нушала тарихличил, культураличил, дубурлантала гIядатуначил машгьурбирули саби», — викIи З.Алхасов.
«Дагъиста хъалибарг» бикIуси байрамла программализи концертла номерра каберхахъурлири. Дагъиста гIяртистунани пергер далуйти зайдухъахъун, Дагъиста пачалихъла «Каспий» ансамбльли жагати делхъ дариб.
ПатIимат Мирзаева
