Гьалабван Сергокъалала районнизиб Сергокъалала шилизибси «Спарта» бикIуси шадлихъуни дурадуркIуси заллизиб районна халкьлисцунра ахIи, бусурмантала Идарала лебилра вакилтасра мягIничебси балбуц бетерхур. Ил хасбарибсири ХIурхъила шилизивадси машгьурси динна хIяракатчи, даргала шягIир ва шайх ГIябдуллахIяжила уличилси гIяхIбаркьла фонд ибхьнилис.
ХIурхъан ГIябдуллахIяжи дарган мезла белкIла литературала цаибти вакилтазивад цали ветаурсири. Илини нушала литературала хазнализи мекелли халаси пай кабихьибсири ва суненира ил гьалабяхI башахъес вирусигъуна къайгъи дакIубирусири. Сай вебкIили гIергъира, илини дахъал наслуби уркIичердируси ва дурхъаси рухIла давла калахъун. ХIера, илдигъунти адамтани нушаб букьурли датурти гIядатуни ишбархIира «мицIирдирни» ва гьаладяхI дашахъни дебали разиси анцIбукь саби. ЦархIилтанира сунечибад гIибрат касеси, сай-алавси дунъя ва дурхIнас челябкьла шалабарес багьандан, дуги-хIери хIеили, узуси адамла у гIяхIбаркьла фондлис беднира нушала халаси пахру саби. Илгъуна бетуцличил гIяхIбаркьла баркьудлуми гIямрулизир дурадуркIнира нушани уркIила халаси дигиличил кьабулбирулра.
ХIурхъан ГIябдуллахIяжини культура ва рухIла давла чедирцIахънила шайчиб барибси халаси хIянчилис кьимат бедлугули, Фонд ибхьнилис хасбарибси балбуцличи цалабикиб пачалихъла, динна ва жамигIятла машгьурти хIяракатчиби, районна администрацияла вакилти, хIурматла гIяхIли – илди-ургаб лебри Дагъистан Республикализивси адамла ихтиюртала шайчивси уполномоченный Запир Алхасов, Сергокъалала районна бекIла аместиетль Баркакьади Мажидов, даргала халкла динна машгьурси гьавкьяна ахъушан МирзахIяжи, Сергокъала мижитла имам ГIябдулмуслим, МяхIячкъалала депутатунала Собраниела гьалабси жагьилтала Парламентла председатель ГIялигъалбицI ХIусейнов ва цархIилти.
Сепайда, ил балбуцличир бутIакьяндеш дарес дигули хьалли, бетхIеур ДР-ла Халкьла Собраниела депутат ХIябибуллагь МяхIяммадовла ва депутатла кумекчи СултIан Къапиевла. Амма сен-биалра, илдани дурхъати савгъатуни дархьилри. Сергокъалала районна жамигIятла гIямрулизир жигарла бутIакьяндеш дируси, гьарил балбуц ахъси даражаличиб бетерхахъес халаси къайгъи дакIубируси ГIялигъалбицI ХIусейновли илдала шайзирад фондлис пешкешдариб савгъатунира: ХIябибуллагь МяхIяммадовла шайзирад – жагаси сурат, Кьуръан ва ил кабихьес хасбарибси уркьули, илкьяйдали цархIилти савгъатунира, СултIан Къапиевла шайзибад – 140 дус гьалаб сай хIурхъан ГIябдуллахIяжини бучIули калунси Кьуръа биштIаси жуз (брошюра). Ил, динна белкIани агардируси замана, совесткий Союзла манзилличибад мяхIкамбарили, калунси саби, ва хIера, гьанна нушачира баили саби.
Цалабикибтала гьалав гъайулхъули, Баркакьади Мажидовли хIурхъан ГIябдуллахIяжила сунели дебали халаси хIурмат бирниличила ва илини гIелаб калахъунси рухIла давла ахъси кьиматлабирниличила багьахъур.
Илкьяйдали уркIилизи атIести дугьби дуриб ва фонд акIахъес сиптакартили бетауртас халаси баркалла багьахъур Запир Алхасовлира: «Ишгъуна фонд акIахъес пикрибарибтас уркIи-уркIилабад баркалла балахъулра. Нушала жагьилтазира нушала тарихличила, гIядатуначила багьахъес бируси дебали халаси хIянчила мягIничебси бутIалира бетарули саби ил баркьуди.
ХIурхъан сайливан, нунира ва ишаб лебти лебтанилра балули кьяйдали, нушала районнис дебали дахъал къияндешуни чIямдарес кьадарбиуб. Иличил барх, района тарихлизиб балахъуливан, хIурхъан ГIябдуллахIяжила мисаллира чебиахъуливан, илдигъунти къияндешунани нуша уржахъулра. 19 ибил даршдусла сунела белкIаназиб илини Дагъистан чебяхIбирули саби. Илдагъунти адамтани саби нушала ВатIан цабирахъуси, илаб балгундеш биахъес бузути. Гьайгьайрагу, ГIябдуллахIяжигъунти адамтала белкIанани, хIянчили сарра нушара уржахъути, кьисматла кьяркьти бяхъянас мутIигIхIедикIахъути».
Балбуцла дазурбазир, Кьуръайзирад аятуни делчIун, динна машгьурси хIяракатчила гIямрулизирадти тамашала анцIбукьуначила гьанбикуни гьаладихьиб.
ГIяхIбаркьла фондли хIурхъан ГIябдуллахIяжила баркьудлуми, къуллукъни даимдирниличи ва кумек хIяжатси адамтас ил гIягIниси тяхIярли гIеббиахъниличи дирхулра. Даргала халкьла кьисматличила пикриикIуси, уркIи сахаватси хIурхъанничила пергер гьанбикуни нушазивад гьарилла уркIилизир диэс гIягIнити сари, гIур – халабикIутазира гIерисахъули.
Нушала корр.
