Мухтар ХIяжимурадович Матаев акIубси сай Дахадаевла районна Уркарахъла шилизив 1968 ибил дуслизив. Илини Дагъиста Пачалихъла университетла математический факультет хъараахъурсири. 1988 ибил дуслизив Севастополь шагьарлизив Ярагъла ЦIакьаназиб къуллукъбарили чарухъунсири.
1994 ибил дусличибад бехIбихьили, 2021 ибил дусличи бикайчи Дахадаевла районна Уркарахъла цаибил школализив математикала мугIяллимли ва директорла заместительли узули калун. Илала дурабад Мухтарли 2009-2015 ибти дусмазир «Дахадаевла районна телевидениелизир» бекIдеш дузахъулри.
2018-2021-ибти дусмазив МКУ «ЦРО-ла» методистра сайри.
Илди лерилра дусмазир, сунени дузахъути хIянчурбала дурарад Мухтар Матаевла декIарти сархибдешунира лер:
— 2007-ибил дуслизив ахъси даражала мугIяллим ветаур;
— математикала мугIяллимтала Дагъиста ассоциацияла член сай;
— 2009-ибил дуслизиб Россияла бегIлара гIяхIси мугIяллим сайливан, Президентла Грант сархиб.
Мухтар Матаев 2021 ибил дуслизив Избербаш шагьарлизибси ГI.Батирайла уличилси Даргала театрлизив бекIливиубси администратор ветаур. ГIергъиси дуслизив ил театрла директорла къуллукъуни заманалис дузахъес вехIихьиб.
2023 ибил дусла апрельла 25-личивад директорли чеввикIиб.
Гьаннала заманара илини театрлизиб халаси хIянчи дурабуркIули сай, хаслира чеалкIуси наслу бяркъес хасси пай кабирхьули сай.
М.ХI.Матаевли буруливан, челябкьлализир чули пикрилизи касибти дахъал кьасани лер: хаслира ишдуслизиб ЧебяхIси ВатIа дергълизиб Чедибдеш сархибхIейчирад 80 дус диркнила юбилейлис багъишладарибти, дявила хасси балбуцлис ва хаслира, даргала машгьурти прозаикунла произведениеби хIясибли пьесаби кадихьни ва цархIилтира.
Дебали дигеси саби пачалихъли Мухтар ХIяжимурадовичли бируси хIянчи кьиматлабарнира. Дявила хасси балбуцлизибти бургъантас кумекбирнилис ва театрли дурадуркIути далдуцуначил чеабиуси наслу бяркъличи биркахънилис ва сабухъчебси бузерилис Мухтар Матаев «Дявила асилдеш багьандан» ва «Жагьилтас патриот бяркъ бедлугнилис» бикIути медальтачил шабагъатлавариб.
Нушанира Мухтар ХIяжимурадович илдигъунти шабагъатуни сархниличил мубараквирулра. Илис гьатIира дахъал сархибдешуни ва къаркъагъуна арадеш дулгулра.
Рабадан БяхIяммадов
