Библиотекарьла гьамадси хIянчи ахIен. Илав узусила халаси сабурра, белчIудиличи ва бучIес башутачи дигира диэс гIягIнити саби. Илдигъунти къиликъуначил Лавашала районна библиотекализир рузули лер МуртазагIялиева Аминат ГIябдусаламовна.
АкIубси сари ил 1960 ибил дуслизир Лавашала районна Лавашала шилизир. Илини МяхIячкъалализиб чебяхIси даражала багьуди касиб.
Аминат МуртазагIялиевани илкьяйдали «Горянка» школа-интернат таманбарибси сари. КIинайс Лавашала шилизибси библиотекарьла хIянчиличи карииб. Ил хIянчи илис дебали гIяхIбизур, ил багьандан МяхIячкъалализибси культпросвет училищела библиотечное отделение хъараахъур. Илала гIергъи А.МуртазагIялиева библиотекала хIянчилизирад декIарриркули ахIен. Сунени бузахъуси санигIят дигуси илини школала бучIантала, хIурматла гIяхIлала бутIакьяндешличил декIар-декIарти далдуцунира дурадуркIу. Жузала ва белкIанала кьадричебдеш ва мягIничебдеш чеалкIуси наслулизира аргъахъес сунени рирусигъуна къайгъи дакIубирули рирар.
Библиотекализи башутачила иличил кам-гьамси ихтилатра дураберкIес имканбакIиб.
— Аминат ГIябдусаламовна, гьалабла ва гьаннала бучIанти-ургаб декIардеш лебу?
— Гьалаблара гьанналара бучIанти цугбуцибхIели, гIяхIцадла декIардеш леб. Гьалабла жагьилтани дигиличил, иштяхIличил жузи дучIи, сегъунти жузи делчIалли гIяхIсив или хьархъарбии. Кьяш кацIесалра мер агарали, библиотека адамтани бицIили бири. ИмцIаливан илдас дигахъи се-биалра агарси секIал пикрибарибси, романна, детективла журабала жузи. Гьаннала жагьилтани биалли, телефонтазирад гIягIнити материалти кайсули сари, илди библиотека лебниличила пикрилра булхъули ахIен. Илдас жузи, журналти, газетаби касили, делчIес дигули ахIен. Или биалра, нуша илдачил дузулра, жуз – адамла гьалмагъ биъни, илиниван телефонни адам вяркъес хIейрни илдази аргъахъес къайгъибирулра.
— Библиотекализи башути имцIаливан чихъали саби?
— ГIе, леб библиотекализи башутира. ИмцIаливан, илди саби студентуни ва чедирти классунала бучIанти. Илдани делчIес кайсули дирар классикала, школала программализир руркъуси журалава художественная литературала жузи. Замана-замана башули бирар хала бегIтира. Илдас дебали дучIес дигахъу декIар-декIарти журналти ва газетаби. Дигиличил бучIули бирар «Дагестанская правда» газета, иличибли республикализир кадиркути анцIбукьуначила хабурти дагьес къайгъилизиб биънира чебиахъули. ЦахIнарли делчIес кайсути лерилра жузачила бурасли, илди сари романти, гIямрулизир детаурти анцIбукьуначила ва дигайличила жузи.
— Жузи, газетаби-журналти дучIантази се бурес дигахъади?
— Дигулра бучIантала гьатIиралра рухIла давла чебирцIахъес, жузи дучIахъес иштяхIра гъирара имцIадиубли. Жузливан цархIил секIай нушаб бархьси гIякьлу гIебхIебурни иргъули, илди библиотекабази гьаман гьаббикIахъес маслигIятбирулра.
Нушала жагьилтази бурес дигулра — телефонтази духIнакахIедикили, някълизи гIяхIси жуз касили, ил бучIеная! Илиниван хIушаб гIямрула хIял-хIякьикьат селилра гьаргхIебиру. Лебтасалара арати гIямру дулгулра!
— Баркалла, Аминат ГIябдусаламовна набчил ихтилат дураберкIес замана баргнилис.
ГIямрулизир библиотекабигъунти жузала хазнаби ва Аминат МуртазагIялиевагъунти сунела хIянчи дигути адамти лерхIели сарра рухIлашал давлачердикIути ва гьаладяхI дашути. Илис ва бархкьяйбас уркIи-уркIилабадси баркалла, чули илгъуна къиянси заманализиб мягIничебси хIянчи дурабуркIнилис. Чусван жузи дигути адамтира бархIиличи-бархIи имцIабикIаб!
Анжела Мутазова
