Гьалабван Дахадаевла районна Кубачила шилизиб халкьани-ургабси печатная графикала «Кубачила кIялгIя» ибси IV-ибил биеннале бетерхур. «Акайла ккалгIя» бикIуси къараулбируси кIялгIялизиб дураберкIибси балбуцла замана чумал майдан гьаладихьиб: гьала-гьала Кубачила шилизиб, кIинайс МяхIячкъала шагьарлизибси Дагъиста художникунала Союзла выставкабала заллизиб.
Халкьани-ургабси печатная графикала «Кубачила кIялгIя» ибси IV-ибил биеннале – выставка-конкурс саби. Ила гьаладихьиб декIар-декIарти печатьла техникала кумекличил далкьаахъурти графикала хIянчурби.
Ишдуслизир «Ex Libris», «жузала графика», «цахIнабси тема» ибти номинациябазир Германиялизибадти, Италиялизибадти, Мексикализибадти, Словакиялизибадти, Польшализибадти, Пакистаннизибадти, Казахстаннизибадти, Узбекистаннизибадти, Македониялизибадти, Норвегиялизибадти ва Россияла 89 регионнизибадти (илдала лугIилизир 30 – Дагъистайзирадти) 351 художник-графикла, художественный вузанала студентунала 700 хIянчи кьабулдариб.
Шадлихъла аги-хIяйзиб балбуц бехIбихьиб Кубачила шила халасигъуна кьакьализиб. Биенналела программала конкурслизиб чедибикибтачили ва призертачили баянти МяхIячкъалализибси Дагъиста художникунала Союзла выставкабала заллизир гьаладихьиб.
БегI гьалаб биеннале 2018 ибил дуслизиб Кубачила шилизиб сабри бетерхурси. Балбуц дураберкIибси саби «Зирихгеран» ибси культурала бехIбихьудунала Центрли ва объединение «ДаГраф» ибси творчествола цалабяхъли.
Проектла руководитель сайри Дагъистан Республикала халкьла художник Юсуп ХанмяхIяммадов, куратор – Россияла художникунала Союзла член, искусствоведунала Ассоциацияла член (AIS) Александр Сергеев, сокураторти — искусствоведунала Ассоциацияла член (AIS) Екатерина Дидковская ва Россияла художникунала Союзла член, М.-А.Джемалла уличилси Дагъиста художественное спецдисциплинабала училищела гьавкьяси педагог МяхIяммад Даудов.
Дигеси саби илкьяйдали пагьмуртала байрумти дурадуркIули, художникуни ва цархIилти творчестволизиб бузути адамти гIеббурцни.
Дахадаевла районна администрацияла пресс-служба
