ИшбархIи гьачам-гьатIи пагь­мучевси поэт, журналист ва жамигIятла хIяракатчи МяхIям­мад ХIямидов наб гьанушес дигулра. Дар­гала литературала ва тарихла мякьязи Мя­хIяммад Халимбековичла у цIацIали бархбасунси саби.

М.ХIямидовличил ну гьарахъти 1980 ибти дусмазир, радиолизи рузес рякьун­хIели, тянишриубсири. Ил дебали жигарчевси, жавабкардеш дихуси, пагьмучевси руководитель вири. ИтхIели «Дагъистан» ГТРК-лизиб 700-личибра имцIали адам бузулри. МяхIяммад ХIямидовли илди лебилра ункъли бали. ТIалабкарси руководитель виалра, илини гьарил адамла уркIила мурад биркьули вири. Дебали къиянни саби наб убла заманализир иличила гъайрикIес, сенахIенну илини дила гIямрулизиб дудешла мер бурцусири. Дила адавзира сай­ливан, МяхIяммад ХIямидовли ну бузерилизирцун ахIенну, гIямрула лерилра шуртIразирра гIеррурцули калунра. ХIян­чилар ну гаприрухIели, мурталра ри­кIули ририра «А чья школа?», сенахIенну М.ХIя­ми­довли сарри ну хIянчиличи бурсирарибси.

Поэтличила бурасли, хIуша лебтанилра балуливан, ил жявли лукIес вехIихьибсири. Республикализир ва дунъяличир кадиркути анцIбукьуни сипатдируси М.ХIямидовла назмурти дучIухIели, илцадра дархьти, мурхьси мягIна бухIнабуцибти илди ишбархIила манзилличира хасти сари или гьанбиркули саби.

Дила гIямрулизиб мекелли мягIничебси мер бурцуси адам дунъяличив агниличи рирхаэс наб къиянбулхъули саби. ХIурматличил ва адабдешличил гIямру деркIибси гъабза кьяйдали ил дила гьанбикуназив кавлан. Нуниван валуси сай ил лебилра даргантанира.
МяхIяммад ХIямидовла бугаси кьаламли даргала мезличи шурдатурти сари Шота Руставелила «Къапланна гули­чев­си нарт» поэма, илкьяйдали Расул ХIямзатовла произве­денияби. Илини шурбатурси саби дурхъаси Кьуръан.

СССР-ла писательтала Союзла член, Дагъистан Республикала писательтала Союзла член, СССР-ла журналистунала Союзла член, Россияла Президентла бирхауди бирхьуси адам — илди лерилрацун ахIен илала сархибдешуни.

Пачалихъли МяхIяммад ХIямидовла сархибдешуни ахъли кьиматладариб, ил «Бузерила ХIунтIена Байрахъла», «ХIур­матла Лишан» ва «Дагъистан Республикала гьаларти къуллукъуни багьандан» ордентачил шабагъатлаварибси сай, ДАССР-ла халкьла поэт ва ДАССР-ла культурала урибси хIянчизар умачи лайикьикибси сай.

Сагаси ибси пайдалабирули, ишхIелла манзилличи далдикибти гIягIниахълуми тIалабдирули ва хIянчизарти санигIятлашал ахъбикIести имканти дургули, бамсриагарли узусири ил.

Ил чекайзурли вири миллатла мезани гьаладяхI дашахъниличира. Радиолизир ва телевидениелизир дирути передачаби адамтас гIяхIдизесли ва аргъесли дирниличи хIянчизарти чекабизахъни тIалаббири. Дубуртар Улкала шимала адамтала гIямру гьарра шайчирад сипатдирес ункъли бурсибиублири журналистуни ва бузерилизиб декIарбулхъути уркIичеббиресра хъумхIерти МяхIяммад Халимбековичли.

МяхIяммад Халимбековичли халаси давла гIелаб батур. Илала назмурти чеалкIуси наслулис гIямрула дарсли детарули сари. ЦIябси дуги вецIну шураличибси бацливан адамла гIямру шаладируси илала поэзия чумра наслулис багалабиэс. ХIебиалли ил нушачивад арякьи ахIен. Ил ишбархIира гIямрула гьуникад нуша черхIедалкIахъи дашахъес гIевугьул, нушачил варх мицIирли сай. БикIаргу поэт убкIуси ахIен или.

 

Салимат ХIяжиева,
Р.ХIямзатовла уличилси республикала Миллатла библиотекала хIянчизар