ГIисаева ЖумягI МалламяхIяммадовна акIубси сари Усишала шилизир, халаси хъалибарглизир. ЖумягIла дудеш МалламяхIяммад Мирзаев «Усишинский» колхозлизив букIунни узули калун. Илини хIялалси бузери бариб сунела хъалибарг абикьес багьандан. ЖумягIла неш ПатIиматли жагали дурхIни абикьур.
ЖумягI Усишала шилизибси урга даражала цаибил школализир ручIули калун, гIур ил Буйнакъск шагьарлизибси педучилищелизи карерхур ва гIяхIти кьиматуначил ил хъараахъур. 1993 ибил дуслизир Усишала урга даражала хIябъибил школализир урус мезла ва литературала дурсри кадирхьули рузес рехIрихьиб. Илини заочно ручIули Дагъиста пачалихъла педагогический институтла филологияла факультетра таманбариб.
ЖумягIла риштIахIелил миллатла делхъличи, далуйтачи диги акIубтири, школализир ва педучилищелизир ручIухIели ил художественная самодеятельностьла бутIакьянчи сарри,илини сунела шилизир ва районна духIнар детурхути шадлихъуназир жигарла бутIакьяндеш дирули рири.
ЖумягIли школализиб 27 дус хIянчи бариб ва «РФ-ла багьудила хIурматла хIянчизар» ибси уличира лайикьрикиб. ЖумягI 2004-ибил дусличирад Ахъушала районна культурала ва туризмала управлениелизирра рузули сари.Культурала управлениелизир дахъал дусмазир шадлихъуначир ведущаяла хIянчи бузахъи. Сунела жагаси, малхIямси тIамаличи халкь хIяйранбирахъули шадлихъуни, байрумти дузахъули, къугъали гъайрикIи.
2015 ибил дусличирад культурала ва туризмала управлениелизир дурхIнала искусствола Центрла руководительли рузули сари,дурхIни делхъличи бурсибирули. «Ахъуша» бикIуси вокально-хореографический ансамбльла бутIакьянчи сари. «Ахъуша» ансамбльли бутIакьяндеш хIедарибси районна бухIнаб дурабуркIуси цалра шадлихъ хIебирар. Гьар шайчирад пагьмучерси ЖумягIла къугъати делхъли лебилра тамашабирахъу ва шадлихъла даража ахъбурцу.
Районна культура гьалабяхI арбукес халаси пай кабирхьули, республикала кьадрила дахъал фестивальтазир, конкурсуназир, байрумтазир жигарла бутIакьяндеш дирули илини Ахъушала район ахъси даражаличиб гьалабирхьу. ЖумягIли районна халкьла ва сари рузуси культурала управлениела халаси коллективла ургаб хIурмат сархили сари.
ЖумягI дахъал шабагъатуначи лайикьрикили сари: ДР-ла культурала Министерствола шайзирад, «Ахъушала район» МО-ла администрацияла, культурала ва туризмала управлениела шайзирад ХIурматла Грамотабачи, Дипломтачи, Баркаллала кагъуртачи.
Гьаннала гIергъира ЖумягIла гIямрулизир арадеш, сархибдешуни, пагьмурти имцIадикIаб!
С. ГIябдуллаева
