Декабрьла 19-личир Россияла Президент Владимир Путинни «ГIяхIли кьабулбирути азбар-гIяя»-лизир 2025 ибил дуслизир дарибти хIянчила баянти каиб.
Ил балбуцличил Россияла ТВ-ла цаибил каналла «бархьаначиси линия» ва улкала Президентла журналистуначилси пресс-конференция дархдикиб. Нушала ва дурала улкназибадти 600-цад журналист балбуцличи бакIилри. Илдазивадси гьарил сунела суайс Президентлизи жаваб бедахъес къайгъилизиври. Амма балбуц къелгIеббикуси Президентла пресс-секретарь Д.Песковли, телевидениела передачаби дузахъути П.Зарубинни ва Е.Берёзовскаяни сегъунти суалти бекIлидиубтил белгибирулри. Авалра байхъалара сягIятла духIнар илдани В.Путиннизи 70 темала черкадти 103 суал дедиб.
Нушала улкала адамтала Президентличи суалти-дугьабизуни дурхьнила хIяракат декабрьла 4-личиб, 15:00 сягIятличибад бехIбихьибсири. Ил заманала бухIнаб илдани 3 миллионничир имцIали суал дархьес балкьаур.
Балбуц 4,5 сягIят бухъянбитIун. Журналистунала суалти дявила хасси балбуцличила (СВО), Украиналичилси даршудешла планничила, чеимцIабарибси багьаличи налог кабилзниличила (НДС), Западла улкначилти бархбасуначила, бекIахъудила шуртIрачила, халкьла кьадар имцIабикIниличила, лугIурбала бетуцличила ва цархIилти темабачила сарри.
Дявила хасси балбуцла чебкадси сунела пикри улкала Президентли халкьла пикриличил цугбикили биъниличила аргъахъиб. «Россия гIяйибла бегI ахIен дявила хасси балбуц бехIбихьнилизиб, — викIи ил. — Нушала Ярагъладарибти ЦIакьанани Украинала гIяскурти гьар мерличирад дугIиули сари. Аляскализибси саммитличиб нуни нушала шайчибадси даршудеш гIеббуцес хIядурли диъниличила, ил шайчибси белгиси вягIдаличила багьахъурра. Амма ил Украинали иргъули ахIен. Украинализир выборти дурадуркIалли, нушани заманалис дявила хасси балбуцра тIашиэхIе».
РФ-ла Западлизирти активтачила Путинни ишкьяйдали буриб: «Россияла активлизирад арц урайсни, илди дигIницун ахIенну, Западла улкнала гъармукадеш сари. Ил анцIбукьли Европала улкначи бирхауди бетихъахъу. Западли Россияла хIурматбиралли, гIур сегъунтилра СВО-би хIедирар. ИлхIели Россия Западличил барх бузес бирар. Россия США-личил ва Англияличилра барх бузар, чIянкIли цагъунти ихтиюрти хьулчили дуцили».
Производствола бархбасуначила суалтас жаваб лугули, В.Путинни буриб: «Инфляция дусла ахирлис 5,7-5,8 кьадарличи убяхIбиркур. ХIянчи агартала лугIира нушачиб халасири, гьанна биалли, 2,2 процентла саби. Алапаби дусла духIнар 4,5 процентла имцIадиуб».
Президентли налогунала ва ипотекала хIекьлизирти суалтасра чедетаахъибти жавабти дедиб. «Налогуни дахъдаили, къияндешуни акIубхIели, — викIар ил, — адамти налогуни хIелугес хьулбулхъан, амма илкьяйда биэс сеналра асухIебирар. Налогунала мах камбиахъни челябкьлализиб нушала бекIлибиубси мурадли бетаахъес чебиркур».
Хъалибаргличил ва алкIути биштIатачил дархдасунти суалтас РФ-ла Президентли ишдигъунти жавабти гьаладихьиб: «ВиштIаси хIябал дус виайчи пособие лугнила суал министртала кабинетли ирзуси саби. БусягIят Россиялизиб биштIати алкIнила коэффициент 1,4 саби, ил кIиличи абикахъес гIягIниси саби. ГIергъити дусмазиб цацадехIти регионтас ил суал пикрилизи касили 75 миллиард къуруш дедили сари. 2026 ибил дусла январьла цаличибад бахъал дурхIнала бегIти хъалибаргунала налогунала 13 процентлизирад 7 процент чардирути сари. БиштIатала унхъри бархIехъ 8 сягIятличи бикайчи дузахъес чебиркур».
«ЗягIиптас чараагарли гIягIнити цацадехIти дармунтала багьа хIукуматли кабизахъес гIягIниси саби. Рахли берк-бержла масанала багьа нушани кабизахъахIелли, илди базуртачирад ва тукентазирад деткайхъур. ГIягIнибиркур аптекаби имцIадарес, гечдирути аптекаби абхьес яра ФАП-аназир дармунти дирцахъес», — буриб Президентли.
Чедир гьандушибти темабала дурарад, журналистунани ва улкала халкьли экономикаличи, самолётуни дахъдирниличи, багьуди кайсниличи, телефонтазибти макрукьябачи, Интернетла сурсатуначи къячдилкути суалтира дедиб.
Балбуцла дазурбазир лерилра суалтас жавабти дедес улкала Президент бажардихIейкалра, илди лерилра кIинайс хIердарили дирар. Гьаларти дусмазир дархьибти суалтазибад цалра жаваб хIегили калунси ахIенри.
ХIяжимурад Ражабов
