Нуша гьачам-гьатIи сагаси дусла унабурхIличир урдулхъулра. ИлхIели пикруми алкIули дирар: сегъунали биэсара челябкьуси дус, кабухесара нушаб илини даршудеш?
Буркьа дус гIелаб балтули, ихъуси унабурхIличи адацIибхIели дирехIе нуша сагаси дуслизи духIнадухъес къалабадикIути. Сагаси дус бехIбихьниличил дарх илини гIямрулизир дигести дарсдешуни детарахъниличи халаси бирхаудиличил ганздикIути нушаб алавчарти лерилра аги-кьяйдара ца тамашала сихIрула цIакьличил гIяхIдухъи дигулра.
ГIеладяхI чардяхъяхIялли, нушани чедиулра улкала тарихлизи минадиубти анцIбукьуни, чулира гьарилла хъули децI-шишимти кадухибти. Дявила хасси балбуц бехIбихьибхIейчирад, лебталалра уркIби илаб ВатIа хъархIерагардеш балтахъули бургъути нушала асил уршбачилацун сари пикридикIути: жяв-жявли Чедибдеш сархили, чула ахIерти хъалибаргуначи илди чарбухъахъес булгули. Илди сен-биалра гIеббуцес биубтала уркIби биалли, разили сари, чулира Чедибдеш сархнилизи белгиси пай кабирхьниличила иргъули. Тыл дебаси биалли, бургъантира уркIичебли бирар бикIаргу. Ил багьандан гьариллис чебиркур нушала асил уршбала гьав ахъбурцес. Бургъантала гъай хIясибли, алавчартала кумек ва хIеруди чебиухIели саби илдас ВатIа гьаларти къуллукъуни тамандирес гьамадсира. Ил багьандан, нушани дирусигъуна барили, илди гIеббуцес къайгъибирехIе – яра малхIямси девличил, яра хасти гIягIниахълумачил, яра цархIилти журала кумекуначил.
Гьарли-марли, дявила хасси балбуцлизир бутIакьяндеш дирути лебилра нушала бургъантачи халаси пахру бирулра. Жан хъябла дигьи, илдани душмайчил дяхI-дяхIли бургъули, улкала хъархIерагардеш балтахъули саби. Илала дурабад, илдазибад бахъалгъунти гъабзадеш дакIударни багьандан, пачалихъла гIяхIцад шабагъатуначира лайикьбикили саби. ХIера, илкьяйдали дагъистанланти ВатIайчи дигили бицIибти гIяхIгъубзни биъни лебтанилра балуси саби.
Дигахъаси лерилра анцIкьи-шишимти буркьа дуслизир кали, сагаси дусли биалли гьарилла хъули разидешра, талихIра, баракатра кадухили. Дунъяличирти дургъбира тамандиубли, гьар-чинабалра даршудеш кабизурли, эркинси яшавлизиб адамти хIеркабирниличи халаси бирхаудира леб.
Лебтасалра чIумаси арадеш булгулра. Сагаси Дусличил!
Салимат ГIялиева
