Иш макьалализиб гьалар ахъси даражаличир дирути нушала багьуди ва медицина ишбархIи сен усалдикибтил хIербарес дигулра.
Совет хIукуматла замана багьуди ва медицина ахъси даражаличир дирутири. Жагьси наслули, чус дигуси вузлизи каберхурли, матъал чебяхIси даражала багьуди касес бирутири. Халкьлис медицинала гIяхIдешуни матъал гIердиахъутири, больницаби ва поликлиникаби хIукуматли хIяжатти гIягIниахълумачил гIердурцутири. Вузани хъараахъурти адамтас хIядурли хIянчи бирусири, илди республикализиб ва илала дураб бузахъес бурхьутири. ЧебяхIси даражала багьуди касибси адамла халати хIурмат-хатир дирутири, бахъалгъунти гIяхIти мераначиб бузутири, халаси алапа кайсули. Нушала дагъистанланти дебали дагьричебти, пагьмукарти адамти саби, чули чеббикIибси санигIят мурхьли бяркъурли, улкала гIяхIдешлис бузерилизи ихъути, иличибли улка гIякьлу-дагьрилашал гьалабяхI башахъули. Илдани багьудила ва медицинала кабизуницунра ахIи, улкала лерилрара-сера бузерила кьялуби гьаладяхI дашахънилизи мекелли халаси пай кабихьибси саби.
Буралли, Совет хIукуматла замана кагибси аги бирусири, адамти жагIялла бархIиличи бирхутири. ГьалабяхI башуси экономикали халкьлис гIямрула гIяхIти шуртIри алкIахъутири, илди хIянчиличил гIеббурцутири.
ИтхIели халкь дигичебтили, аратили, разитили бири дикIулра нуша. Селизир сари илди? ХIукуматли гьар секIайчил гIеббурцули, къулайти шуртIри алкIахъухIели сабри итхIели халкь арати ва разити. ЗягIипикибси адамлис, больницализи кайхьес ва матъал сагъвиэс имканбикIусири. Гьанна сегъуна аги сабил нушани чебиулра. Больницализи кайхьес ибси мурадличил тухтуртачи дугьаизалли, ита-иша дуцIикIахъули, зягIипси азир инжитвирули сай. Илди дуцIъалали зягIипсилис къиянбулхъахъули саби. ИшбархIи больницабазир кадизахъурти тяхIяр-кьяйдали араси адамла буланра бекI жургъбулхъахъули саби.
СССР пашбехъубли гIергъи, нушала улкализиб дигалли медицина, дигалли багьуди усалдиркес дехIдихьиб. Пачалихъла учреждениеби вегIдешлизи дикнили, багьуди ва медицина багьалис детаурли сари. Ил сабабли яшавла шуртIри усалти адамтас матъал медицинала гIяхIдешуначил пайдалабикIес яра багьуди касес имканбикIули ахIен.
Совет хIукуматла манзиллизир багьуди ва медицина дузнила тяхIяр-кьяйда гIерасили сари дурала улкнани. Мисаллис касалли, Израиль. Гьалар нушала улкализир дузахъути тяхIяр-кьяйда пайдаладирули, илабси медицина хъярхъли гьалабяхI башули саби. Нушала улкализир сагъдарес хIейрути излуми илар сагъдарес вирули сай. Амма дагъистанланнис Израильлизи укьес ва лечение барес дахъал арц хIяжатдиркули сари. Имкан лебти башули бургар, имкан агарти гIядатла адамти излумачил бургъули, гIямрула бурхIни кадерхайчи инжитбирули саби. Пикриухъалли, излумани къагъизахъурси адамла уркIилизиб разидешра хIебирар.
ИшбархIи нушала улкала медицинала ва багьудила кьялубазибси аги гапла-декIарли ахIен, арадеш мяхIкамбирнила кабиз бузули саби, амма гIяхIцад нукьсандешуни лер. Ил кабизла халкьлис медицинала кумек гIеббаахъес арц диули ахIен, илкьяйдали зягIиптас чараагарли хIяжатти дармунти дедесра имканбикIули ахIен. Багьалис исес гьарил адамли вирули ахIен, дурхъали диънили. ЦацадехIти больницаби ва поликлиникаби дебали багьлали сари дузути, илди техникалашал гIерхIедуцни багьандан.
Нушала улкализиб багьудила даража гIяшбиънила сабаб – гьаннала замана сагати тяхIяр-кьяйда дакIудухъни. Багьудила кабиз иличил бажардихIебиркни чебаэсли саби, сенахIенну вузани хъараахъурти жагьилтас чули касибси санигIят хIясибли бузес хIянчурби агара.
ЖамигIятла-экономикала белшни сагаси жураличи шурбухънилизир ва сагати шуртIрачи адамти бурсибирнилизир къияндешуни дакIудулхъни чебиулра. Ил политика гIяхIбухъахъи ва адамтас гIяхIти шуртIри акIахъаллицун ахIенси цархIилван, дила пикрили, аги барсхIебирар, медицинала ва багьудила даража гIяхIхIебулхъан, жамигIятла хIулбукIри хIебирар.
ПатIимат Мирзаева
