Гьалабван Дагъиста пачалихъла университетла филологияла факультетлизиб Дагъиста поэт, прозаик ва тилмаж Амир Гъази 85 дус виънилис хасбарибси гьунибаъни дураберкIиб. Балбуц бикулри Дагъиста писательтала Союзла даргала секцияла руководитель Муса БяхIяммадовли. Илини поэтла гIямрула гьуниличила, дуракаибти жузачила ва Амир Гъазини даргала литературализи кабихьибси пайличила чебетаахъили буриб. Амир Гъазичила хIебакьибси дарганти-ургав хIергар, амма или биалра, иличила къантIти баянти гьаладирхьехIе.
Амир Гъазила таманси у Амир Ражабович ГъазимяхIяммадов саби. Даргала пагьмучевси поэт, прозаик ва тилмаж акIубси сай 1940 ибил дуслизив Дахадаевла районна Зубанчила шилизив хъубзарла хъалибарглизив. Амир Гъазини Зубанчила верхIел дусла школа таманаибсири. Илис гIергъи Сергокъалала педучилищелизи керхур ва ункъли белчIуди хъараахъур. УркIила жи хIясибли ил Москвала М.Горькийла уличилси Литературный институтлизира керхурсири ва ил таманбарибсири. Амир Гъази сай акIубси шилизив учительли узес вехIихьибсири. Пагьмучевси поэт ва прозаик «Ленинна байрахъ» газетализив корреспондентли, дурхIнас хасбарибси «Лачин» журналла редакторли узули калунсири. Бурес чебиркур, Амир Гъазис дебали урхьу дигахъусири, ил темалис хасдарибти произведениебира лукIули вири. Урхьу дигахънилис сабабра сунела замана Амир Гъазини урхьула Дергъла флотлизиб къуллукъбарни сабри.
А. Гъазила бегI гьаларти назмурти 1958 ибил дуслизир «Ленинна байрахъ» газетализир, гIур «Гьалмагъдеш» альманахлизир дурадухъун. ИлхIели Амир Гъази педучилищелизив учIулри. Илала назмуртала «Бириз» бикIуси цаибил жуз 1966 ибил дуслизиб дурабухъунсири. Авторли сунела зилантала баркьудлуми сипатдирули сай. Амир Гъазила творчествола бекIлибиубси тема сабливан илини бегI гьалаб урхьу чеббикIибсири, ва ил мурхьли, тIинтIли гьаргбарибсири. «Дила урхьу» (1968), «Кьисматла кьяркьдеш» (1973) бикIути жузазиб урхьуличила назмуртани бекIлибиубсигъуна мер бурцули саби. Амир дудешлизивад жявли мяхIрумиуб, амма илини ил цалра бархIилизив хъумхIертур. Дудешличила илини уркIилизи атIести, малхIямти дугьбачил назмурти лукIи. Мисаллис: «Агара дила дудеш, сураталра агара… Ну илини ванзалис Убатурси галгара…»
Поэтли нуша-алавси тIабигIят, ахIерси ВатIан, дудешунала ванза, пергер адамти, илдала кьасани, хьулани, дигай, дардани, пикруми, ши, шанти арагIебли Дагъиста поэзия сагати ва пагьмучерти назмуртани ва поэмабани давлачеббирули сай. Илала назмурти ва поэмаби урусла, кIарахъала, булугунала, къумукъла, лезгибала ва цархIилти мезаначи шурдатур.
Тилмаж сайливанра гIяхIил тянишси сай ил. Илини М.Ю. Лермонтовла, Н.А. Некрасовла, Е. Эминна, С. Стальскийла ва цархIилти поэтунала назмурти дарган мезличи шардатур. Илала гIямрула гьуни 2000-ибил дуслизиб къяббердибсири. Дахъал гIямру деркIили хIейалра, илини даргала литературализи мекелли халаси пай кабихьиб.
Амир Гъазичила къантIти баянти Дагъиста халкьла литературала кафедрала доцент, филологияла гIилмуртала кандидат Эминаханум МяхIяммадсягIидовнанира дуриб.
Писательла гIямруличила бурили гIергъи студентунани илала назмурти делчIун. Каргьнилашал илди дебали жагатири, зайдикIутири. Илдазир ахъдуцибти темаби гьаннара аргъбаибтили кавлули сари.
Илдигъунти гьунибаъниби студентунас дебали пайдалачертили урдулхъули сари ва гьайгьайрагу, даргала литератураличила багьудлуми чедицIахъес кумекли детарули дирар. Баркалла биаб машгьурси поэтла творчестволичила илгъуна балбуц дураберкIибтас.
Анжела Мутазова
