АхIерси ВатIа дявила кьяркьти дусмазиб гъабзадешчебти советский халкьли ЧебяхIси Чедибдеш сархибхIейчирадли ишдуслизир 80 дус диркни Россияла ва СНГ-ла республикабала жамигIятлис дебали мягIничебси анцIбукь саби. Ил Чедибдеш сархибтала дурхIни ва илдачибадли акIубти халаси иштяхIличил хIядурбикIули саби майла 9-личиб ил байрам ахъси даражаличиб дураберкIес.
Чедибдешла БархIила халаси мягIничебдеш леб лебилра улкалантасван районна шимала халкьлисра. Нушала бургала чедиб даршуси зак ва улкала хъархIерагардеш калахъес багьандан игитуни кьяйдали бургъули калунти дахадаевланти хъумхIертнилис хасдарибти далдуцуни ункъли дурадеркIес кьаслизи кабизурли саби районна хIякимтира.
Ишди бурхIназир районна шимазир дурадуркIути бекIлидиубтигъунти хIянчи сари дявила асилдешла памятникуни къулайси агиличи дуршни.
Шимазир ЧебяхIси ВатIа дергълизир бутIакьяндеш дарибтала умачилти хъмухIертнила уркьли кадизахъурли сари. Гъабзадешличил бургъули калунтачила илкьяйдали даимлис хъумхIертахъести далдуцуни сари илди. Илдигъунти бетуцуначирли чеалкIуси наслула вакилти патриот бяркъличи биркахъулли саби, ва жагьилти нушала улкала тарихла хIурматбирахъес бурсибирути саби.
Уркухъла шилизиб Чедибдешла анхъ (парк) къулайси агиличи буршнила баркьуди жигарчебли бетурхули саби. Иларти дерубти, халати галгуби кадяхъили, сагати удатес мер акьубалтули саби. Гъамси заманала духIнар ила сагадан галгуби удатес хIядурбикIули саби. Проект хIясибли, илар адамтани бамсриахъести жагати мер-муса хIядурдирути сари.
Илала дурарадлира, далдуцунала дазурбазир памятник-алавти плиткаби дарсдирути сари ва илдала мерличир дявила бутIакьянчибала умачилти кадирхьути сари, ганзухъунира сагадирути сари. Илкьяйдали ветерантала хIурматлис хасдарибти мер-муса жагали далкьарахъути сари.
Районна культурала отделла начальник Рабазан ХIясайниевли баянбирули сай:
«ЧебяхIси Чедибдеш 80 дус бирнила байрамличи хIядурдикIнили нушазибадли чебетаахъибси хIянчи тIалаббирули саби. Нуша илкьяйдали камси секIайчира чекадизес чебиркур. Нуша къайгъилизирра нушала игитуначила хъумхIертнила баркьудилизи диубси пайра кабихьили, илдала хIурматбарес. Бургъантала уличилси гьарил уркьули, памятник игитуни гьанбиркахънила баркьудицун ахIи, нушала бургала чедиб даршуси зак калахънилис баркалла багьахънила лишанра саби».
Дахадаевла районна администрацияла пресс-служба
