Къистаман Кьурбанова бегI гьалар «ШигIру ва далай» бикIуси дарган рухIла кьукьялизир чераибсири. Чис хабарри ил гIергъити 36 дус Избербашлизир хIеррирули ва арадешлис къарауйчир рузули риънила? Илала мякьи ЧяхIригала шилизир (Зеленоморсклизир) калири, гIур биалли Сергокъалала районна Мурегала шилизира даилри. Белики, кIидехI мер-мусала асарлиуб бургар илала умуси тIама зайбухъунсира. ЛехIдизирая хIуша иличи: гъайрикIухIелира, тяп назмурта ручIухIеливан, гъайла кагибдеш ва мягIнала мурхьдеш аргъес дирудая.

«Жявли рехIрихьира назмурта лукIес, амма ну-алав ил секIал кьиматлабирути къаршихIебикиб, — бурули сари илини. – ХIятта нешра къаршили каризур. Сунела гIяпабаркь, А. Каймаразовли гIерруцира, «Эркиндеш» газетализи кадяхъибти цаибти белкIани мерладариб. ГIур гIямру, бикIуливан, сунела шухIярикад даткадихьиб: тухтурла багьуди касира, гьала-гьала Избербашла дурхIнас хасбарибси поликлиникализир рузули калунра, гIур шагьарла аптекализиб хIянчи даимбарира…»

«Адикьур гIурра дургъби

Даршуси ванзаличир:

Нешла лайлала дугьби

Иргъулра муэртазир», — тамай мурхьси мягIна бурес бажардирикили сари Къистаман иш тахтализир. Дургъби ва даршудеш, неш ва дурхIни, талихI ва балагь  — хIябилра цаличил ца дархдасунти сипатуни лер!

Гьарил назмулизи, гьарил къяйлизи сунела уркIи кабирхьни – ашкарли, иличирли дургар илала назмурти делчIес дигести, аргъес гьамадти, мягIнализир мурхьти ва урхIагарти. Ташмишдеш агарли, Къистаман пагьмучерси поэтесса сари ва илала назмурти даргала бучIантани лайикьли кьиматладиру.

Къистаманна назмурти «Ленинна байрахъ» газетализирад дехIдихьили, ишхIелла «Гьалмагъдеш» альманахлизии, «Эркиндешличи» ва «Замана» газетабази даибти сари. Замана баили саби Къстаман Кьурбановас сари-регIси жузра даргантачи баахъес.

 

ХIурматличил — Ибрагьим Ибрагьимов

 

 

 

Къистаман Кьурбанова

Ванзала жи

 

Дила ахIерси улка

Мешули саб цIуръачи,

Неш агарли калунси

Ятим уршила хIяйчи.

 

Чум-чумра чябхъиндариб

ДяхIагар гъармукаба:

Къукъу-лямцIла цIализиб

Калунри хIебигубли.

 

Чуйнара даршудешла

Байрахъ ахъли буцири,

Дургъби хIила, агъула

Чардарес гъаза барри.

 

Амма дургъбачи гъаргъта

ХIебалтулри паргъатли,

ЦIудар-цIябти гъагулта

Закла ранг дулъахъули.

 

Дудешунас чуйнара

Ярагъ касес чебуркъуб:

Гутанна зугьадешра

Нешлис букьурли баиб.

 

Манзилти дарскадиуб

ИшбархIи гьарил инсайс:

Даршудешла гьигьлиуб

ХIебагьур лазат касес.

 

Адикьур гIурра дургъби

Даршуси ванзаличир:

Нешла лайлала дугьби

Иргъулра муэртазир.

 

Хъалибарг – дила давла

 

Дунъяла давла саби

Гьар адамлис хъалибарг.

Чархла арадеш саби

Иличи ахъибси лаг.

 

Хъалибаргла уржибдеш

Наслула давла саби,

Илала цабалгундеш

Гьалжанна лигIмат саби.

 

Ну уркIичеррируси

Хъалибарглицун сарра,

Гьунартачира гьуцIси

ХIуша лерхIели сарри.

 

Хъалибарг кьибламари

Шалала ва шаддешла

ЧIумаси къакъбяхъ сабри

Гьалмагъдешла, мардешла.

 

ИшбархIи ну хамлира

Хъалибарг набчилхIели,

ЯхIлара сабурлара

Умхьу чучил барххIели.

 

Цундешла арилизир

Аркьули дусмира лер,

Заманала жилизир

Гьалакли гIямрура лер.

 

Гьаман кьалам кайсулра

Разиси назму белкIес,

Азадси чIакаванра

Дуклумира тIинтIдарес.

 

Кьасбарира чуйнара

Пашмандеш чебарбукес,

Пишдирхъути вавнира

ХIечил дархли къунздарес.

 

Чум-чуйна кариасра

Азадси назму белкIес,

Дардлира, пикрумара

ХIералтулра белкIахъес.

 

АнцIкьила кьакьадешли

Диэс илди алкIути,

Дунъяла панадешли

Набзир мурхьдикахъибти.

 

ГIебшни

 

ГIебшни сари гьаргалар

ГьардакIес урузкIули,

ДуцIрумлизир хIялагар

Нуша дамсни балули.

 

Даширая, гьаргдирис

Къапура рирусиван,

ГIебшнила жагадешли

Рирулрану ну хIяйран.

 

ЦIикуриван даршили

ВерхIрангла палтарличил,

ДакIира кьалли, гIебшни,

Аргъла ряхIятдешличил.

 

ВацIала галгубачир

КIари рурхIули сари,

ГIебшнила цIуэрлиур

Ранг пулгдирули сари.

 

ГIебшнили амъур марка

ЧяхIдухъун ванзаличи,

Закла хьанцI рангла царка

ТIинтIбиуб ахъ хIурхъачи.

 

ХI удила кьибламари

 

ХIу наб БерхIи сайри,

ВанабикIуси.

Бац-алав зубарири,

ШалабикIуси.

 

Дигайла гамири,

Гьуни хIейхъуси.

УркIила тимхъ сайри,

ТIашхIебилзуси.

 

ХIечил сарри нуни

Дигай дагьурти.

МалхIямти дугьбала

ТIягIям асибси.

 

Ца хIечил сарри

Шараб держибти,

КарцIайла хIулбазиб

ЛямцI чебаибси.

 

ХIу ургуба сайри

Сагабируси.

АтхIебла вавначил

Набчи вашуси.

 

Гулвавнала хала

Гьалабуцибси,

ХIечил дила дигай

Дебшладарибси.

 

Гьалжанала лигIмат

КахIебурхуси.

Шарабла урунжри

Наб парчбикIуси:

 

Сецад держаслира

Милги хIейхъуси.

Илдала бизидеш

ХIечил багьурси.

 

Кьибламари дила

Бархли башуси.

Кьисмат сайри дила

КьадархIейубси.

 

Наб къиянси манзил

Гьалабиз сайри.

Дила цундешлизив

РяхIятдеш сайри.

 

Шилизи архIя

 

РакIилра шилизи

ИшбархIи дила,

ХъумхIертес кьакьурби

Ну къунзрикIути.

 

Зилантала тIамри

ДучIар лихIбазир.

ДурхIядешла хIязти

ТаманхIейубти.

 

Чебиулра илаб

Барсдеш якьинси.

Рашулра дякькадли,

Занзба бакIибси.

 

ГIебшни хъянихIели

ДуцIли ихъуси,

Яни чиллализиб

Миъли бурцуси.

 

Хъалтали бакIибси

Хъу чебиулра.

Къатавтар някъбачил

Нешли белгIуси.

 

Ил ванзала сабухъ

Гьанбиркахъулра.

ГIебшни дигиличил

Хъули бихуси.

 

Гьигьра тIашаили,

Ганз хIярхIбирулра.

Чебиис нешла юрт,

Эскиси, цунси.

 

Хумарли, мяхIрумли

Нура тIашлира.

Духъянти цундешли

Харабрарибси.

 

ЦIуръабиубсиван

Саби нешла юрт.

МицIирдеш агарси,

Наб гьалаб тIашси.

 

Къиянни биалра,

Бихьилра умут:

Сабурла ялкайчир

Нура куртIлира.

 

БиштIаси шалдари

ХIу дурхIядешла.

Бикьрили калунси

Дила жагьдешла.

 

Дусми сар гьалакли

Къелцун далтули.

УркIецIиагарли

Жан кьяриули.

 

ГIямру сар абзлизир,

ДуцIлизир хъярхъли.

Дазу гIелаб батес

Пикри агарли.

 

Рирхулра

 

Дила дагьрилизив

Набчил лукьуси,

Дякькад рашухIели,

Варх ганзикIуси.

 

ХIяланар чархла гьав

Чебсаргъахъуси,

ХIулби дисухIели,

Симкь тIашиуси.

 

Гьанбиркур ит хIебла

Пергерси бархIи.

ХIечил ну кьисматли

Тянишрарибси.

 

ХIела ванаси хIер

Ну ритIакIибси.

МакьлатIисли мегьван

МутIигIрарибси.

 

Ил хIерла ванадеш

Гьанарули саб.

Яни бугIярхIели

Ну румжахъуси.

 

Гьанна кьалли дила

УркIи цунни саб,

Мегьла бутIа кьяйда

БяргIили саби.

 

Эгер дехIдирхьасри

ГIямру сагали,

Урла хатIабира

ХIедири, марли.

 

ТIимкьли руцибсиван,

ГьархIерулхъаси.

Зилан рурсбала гъай

ХIисабхIейраси.

 

Дамсурти някъбази

Кьалам кайсулра,

Набчирти хIялани

Дурес дигулра.

 

Цундешла арили

Къагърилзахъулра:

Дила паргъатдешлис

Сабур агара.

 

УркIила хьулани

ГьархIедизурти,

Бургъуси урхьула

Рамчван гьалакти.

 

Сабур я ряхIятдеш

НабкIун агара:

Рирхулра Аллагьла

Ца кумекличи.