Ишди бурхIназив «Замана» газетала бекI редакторла къуллукъличи катур ИсмягIилов ГIябдуряхIман МяхIяммадрасулович. Иличил газетала коллектив тянишбариб «Дагъистан» бикIуси Этномедиахолдинглис бекIдеш дируси Юсупов Арсен ГъазимяхIяммадовичли.
«Замана» газетала хIянчизартала гьалав гъайулхъули, А.Юсуповли бекI редакторла къуллукъличиб кIел дусцадхIи хIянчи барибси ГIялиева Салимат БяхIяммадовнас халаси баркалла багьахъур. Сунела яргализиб С.ГIялиевани гьаннала гIергъира газетала бузери гIяхIбухъахъес сунени рирусигъуна кумек гIеббаахъес чесиб.
Буралли, ГI.ИсмягIиловли гьаларти дусмазибра (2017-2018-ибти дусмазиб) «Замана»-лизиб хIянчи барибсири: гьаланачи корреспондентла къуллукъуличиб, гIур – сетевое изданиела редакторла. КIинайс илис Москвализи чарухъес кьадарбиуб.
ГIябдуряхIман ИсмягIилов акIубси сай 1992 ибил дуслизив Ахъушала районна Ахъушала шилизив. ВиштIали левай, илала хъалибарг Москвализи гечбиубси саби. 27 дус ил улкала тах шагьарлизив хIериуб. Илар сари илини багьудлумира касибти. Школа таманбарили гIергъи, Тимирязевла уличилси Академиялизиб экономикала факультетра хъараахъур. СтудентхIелла дусмазив ил жигарчевли спортлизи ахъибсири ва цазаманализив федеральный миграционный кабизлизив узусири.
2016-2017-ибти дусмазиб гIярмиялизиб къуллукъбарили, матросла звание касили хъули чарухъун.
Газетализив узуси замана ГI.ИсмягIилов Россияла журналистунала Союзла член ветаурсири.
Москвализи чарухъунхIели, ил Россияла Следственный комитетлизив узес вехIихьиб. Илаб бухгалтериялизиб кIел дус хIянчи бариб. Цазаманализив РАНХиГС-лизи халкьани-ургабси правола программа хIясибли магистратурализи керхур. Илра сархибдешличил хъараахъес имканбакIиб.
2022 ибил дуслизив ил Дагъистайзи гечиуб ва декIар-декIарти къуллукъуначиб сабухъчебли хIянчи бариб.
«Гьарил дагъистанланнис вегI акIубти мер-мусаличила, сунела аслу-миналичила хъумартес асухIебирар. Нушаниван, дуравад вакIибси цархIил чилилра нушала ахIерси Дагъистан къулайсили бетхIерахъу. Нушаб саби ил шайчир дягIули ганздикIес гIягIниси. Ил багьандан нуни кьасбарилра дила миллатла мез ва культура гьаладяхI ардукес вирусигъуна къайгъи дакIубарес. Хаслира нушала наслули саби чеалкIуси наслулисра гьуни чебиахъуси, илдала рухIла дебаси хазналис хьулчи кабирхьуси ва тарих лукIуси. Лебилра дарганти бегI гьалабси яргализиб нешла мез мяхIкамдарахъес жибирулра», — викIули сай «Замана» газетала сагаси бекI редактор.
