ТIабигIятли чябхъинти дир­ни­личибли къияндешуначи вяхIя­гибхIели, заманаличиб ва хIяжатси кумек гIеббаахъни хаслира кьиматчебси саби. Заб-маркали зарулти диахъубти Дахадаевла районна халкьлис ишди бурхIназибра Па­чалихъла Думала депутат Жамаладин ХIяса­нов­ли гуманитарний кумек гIеббаахънира ди­гесил анцIбукь саби. Илкьяйдали илгъуна баркьудили чебиахъули саби жамигIятла шай­зибадли шимала халкь гIеббурцни. Зарайзи ди­кибти юртани ремонтдирнилизиб ва сагати тIаш­далтнилизиб кумекбарили сай депутатли.
ТIабигIятла далагардешуначирли детаурти хIусбулхъунани 300-личирра имцIали юрт зарал­лизи дикахъиб. ГъятIдиибти юртанала бегI­тас къалабаси кумек гIеббаахъес хIя­жат­лири. Адамти къиян-жапализи бикибси ман­зиллизив депутат Жамаладин ХIясанов шай­чив кахIелун ва юртани лушухIели гIягIни­дир­кути материалти дархьиб.
Районна бекI МяхIяммад ГIябдулкьа­ди­ровли зарайзи бикибтас сагати юртани тIашдалтнилис хасбарибси микрорайоннис мер декIарбарили саби. Депутатла шайзибадси кумекра илкьяйдали бегIлара хIяжатси замана районнизи баили саби.
«Адамтачи уркIи изни ва илдас заманаличиб кумек гIеббахъни багьандан, Пачалихъла Думала де­путат Жамаладин ХIясановлис нушани баркал­ла балахъулра. ТIабигIятла далагардешуначибли балагь-кьадарлизи бикибти нушала районна халкьлис илини барибси кумекла леб­гIеб халаси гIяхIбаркьла баркьуди саби. Илини дархьибти материалти юртани лушнилизир пай­даладиру ва урехиагарли адамти хIербиэсти им­канти алкIан», — буриб муниципалитетла ру­ководитель МяхIяммад ГIябдулкьадировли.
Гьан­­биркахъехIе, Жамаладин ХIясановли гьар дус­лизир спортла гIягIниахълуми дурхьули вирар районна школабазирти дурхIнала ара­деш къулайбирути дуцIрумла лагерьтази. Илини илкьяйдали гьар шайчибадси кумек гIеб­биахъули вирар мискинти, яшавла шуртIри гIяшси даражаличирти хъалибаргунасра.
Де­путат Ж.ХIясановли хасси пикри бяхIчииули ви­рар СВО-лизир бутIакьяндеш дирути бургъан­тала хъалибаргуначира. АхIерси ВатIа хъар­хIе­рагардеш балтахъути бургъанти ва илдала хъа­либаргуни арцлашал ва насихIятуначил гIеб­бурцули вирар илини. Баркалла биаб сунес мур­талра хакль гIеббурцнилис.