Физикала-мате­ма­ти­кала гIилмуртала доктор, ДР-ла Халкьла Собраниела депу­тат МуртазагIяли Раба­да­нов акIубси сай ­Сулев­кент­­ла ши­­лизив. Шила советла пред­­­­седатель Хулат­та ХIу­сейновичлара ­совхоз­ла хIян­­чизар Пирдаз ГIялиев­на­лара хъалибарглизиб ге­хIел дур­хIя лебри. Илдазивад хIя­бэ­сил Мурта­за­гIя­ли­ри.
Школа ункъли таманбарили, МуртазагIяли Рабаданов Дагъиста пачалихъла уни­верситетла физический фа­культетлизи керхурсири. Илав­ра мурхьти багьудлумачил декIарухъунси студентли Москвала кристаллографияла Институтла аспирантурализиб белчIуди даимбариб ва, авал дусла ургаб диссертация белкIи, физикала гIилмуртала кан­дидат ветаур.
Жагьси гIялимли сунела гIилмула гьуни СССР-ла АН-ла Дагъиста филиалла физикала Институтлизиб даимбариб. Сунес ахIерси ДГУ-лизи ил чариуб 1993 ибил дуслизив ва химияла факультетла «Физическая химия» бикIуси кафедрализив узес вехIкайхьиб. ИлхIейс ил хъайчикайилри ва кIел биштIатира лебри.
Бурес гIягIнибиркур, Мур­тазагIяли Рабадановли адуцалачебти ва духути дурхIни абикьур. Рурси Раисат Рабаданова экономикала гIилмуртала кандидат, ДГУ-ла информатикала ва багьахънибала технологиябала факультетлизир кафедрала доцент сари.
Урши Рабадан Рабадановра гIялим сай, РФ-ла Счетная палатала инспекторли узули сай.
БелкIла игит МуртазагIяли Рабадановла бузерила ва гIилмула гьунчир хаслира халати сархибдешуни диуб 2000 ибти дусмазир: Ил РАН-на кристал­лог­рафияла Институтлизи узахъес живарибсири. Илини 2004-ибил дуслизиб гIилмуртала докторла дис­сертация батерхахъур.
2007-ибил дуслизив жагьси профессор Дагъис­тайзи живариб, ДГУ-ла ректорла къуллукъуни заманалис дузахъес хъардарибтири, ва 2008-ибил дусла мартличив вузла халаси собраниеличив ил универси­тет­ла ректорли викIибсири.
Хала бегIтала минала ванзаличив, ­Дахадаевла районнизив, «Цаси Россия» партияла шайчивад, 2011 ибил дусла мартличив, Дагъиста Халкьла Соб­ра­­ниела депутатли викIиб.
Гьанбушес чебиркур, М.Рабадановли МяхIяч­къа­ла­­лис бекIдеш дарниличилара. ИтхIелила ДР-ла БекI Р.ГIяб­­дулатIиповли 2013 ибил дусла июньничиб ша­гьар­лис бекIдеш дарахъес иличи хъарбарибсири. 2014 ибил дусла апрельличив М.Рабаданов сай-гIяхIъу­­­лали шагьарла бекIла къуллукъличивад арякьун ва лерилра сунела цIакьани ДГУ гьалабяхI ар­бук­ни­ли­­­чи дяхI­чи­аиб.
Илди дусмала ургав Мур­та­загIяли Хулаттаевич секьяйда узибал университетлизир бусягIят лерти тяхIяр-кьяйдали чебиахъули саби.
Лерилра факультетуни элект­ронный сягIятван дархьли дузахъули сай 300-личирра имцIали гIилмула хIянчи делкIунси, Евразияла улкнала университетунала Ассоциацияла член, Каспи урхьу-алавти улкнала университетунала Ас­социацияла Президент, гIил­муртала доктор, профессор, ДР-ла гIилмула урибси хIяракатчи, Россияла ВПО-ла хIурматла хIянчизар, ДР-ла Халкьла Соб­раниела депутат, ДР-ла интеллигенцияла Конгрессла Председатель, «Республикала гьаларти сархибдешуни багьандан» орденничил шабагъатлаварибси МуртазагIяли Хулаттаевич Рабадановли. ДГУ-ли Россияла ва дунъяла шуцIайчирра имцIали университетличил бархбасуни кадизахъурли сари.
БелчIудила сагаси дус бехIкабихьниличил бархбасахъи, М.Рабадановли къел­гIеббикуси хIян­чилис баркалла бикIути студентуни бахъбаили дигулра.