Дагъиста тарихлизи халаси пай кабихьибси ши саби МикIхIила. Граждан дергъла заманаличибад бехIбихьили ишбархIиличи бикайчи бахъал саби илабад дурабухъунти, Багъатирла ГIялибеггъунти, хабарла игитуни.
БусягIятра чула хала бегIтала гIядатуни даимдарили, арагIебли ГIярасайлизибра халаси хIурмат сархибти, баркаллаличил гIямру дуркIути гIяхIцад микIхIенти леб. Дагъистайзибцунра ахIенну, илала дурабра хIербирули саби бахъал микIхIенти. БусягIятла замана Став­ропольла крайлизиб, маза-мас адил­кьули, хъуми делгIули, хIялалси яшав­бирули хIербирули ва бузули саби илди.
Илдигъунтазибадси саби ГIя­ма­ровхъала хъалибаргра. Ил хъа­ли­барглизирадси сари пергер хьу­нул адам, жагали назмурти ва да­луйти лукIуси, илкьяйдали мурталра къиян­дикибсилис кумекла някъ гьа­балтуси, лерилрара-сера даргала га­зетаби ва журналти гIердурцуси Ха­дижат ГIямарова.
АкIубси сари ил 1961 ибил дуслизир, МикIхIила шилизир, гIядатла дубурланна хъалибарглизир. ГIур илди яшавла даража ункъбиахъес багьандан, Лаваша гечбиубтири. Лавашала школализиб гехIел класс таманаили, илди Калмыкиялизи гечбиэс кьадарбиубсири. Илабра илини гIяхIти кьиматуначил школа таманаиб. Амма багьудлумачи гъаргъси ва пагьмучерси рурси цархIилти бучIантазирад декIаррулхъусири. Назмурти цаладирхъесра ил школализир ручIухIелил рехIрихьибсири. Иличи халаси асар бариб сунела шан, пергер поэт Газим-Бег БяхIяндовла творчестволи.
Хадижат ГIямаровала творчест­воличил ну Интернетла душилизиб акIахъубси «Даргала Анкъи» бикIуси жамигIятла хIяракатлизив тянишиубсири, ва илала назмурти дяркъесра илди кьиматладаресра имканбакIиб. Илала назмурти чуйнара «Гьалмагъдеш» журналла бяхIяназир ва «Замана» газетализир дурадухъун, бучIантанира илди халаси дигиличил кьабулдариб.
Сунезир хамдеш агарси, мурталра бархьдешцун дигуси, гIяхIтицун къиликъуначил регIриубси, пагьмучерси поэт къалабарикIули ахIен жуз дуракаэс, чумал жузлис даари назмурти лерли диалра.
ИшбархIира ил чис къияндикалра кумекбарес гьалакли сари. Мекелли халаси кумек гIеббиахъули сари илини Украинализиб дурабуркIуси дявила хасси балбуцла бургъантасра. Чуйнара ил цалабяхъибси кумекличил Донбассла ванзаличи рякьун: берк-бержличил, палтар-кьяшличил, убуш-чебушличил ва гьар бархIила гIямрулизир хIяжатдиркути гIягIниахълумачил. МалхIямси уркIила регI Хадижатли бургъанти гIяхIси гъайличилра гIеббурцули сари.
Илкьяйдали ил бажардириркули сари сунела шантасра кумекбарес. Илала хIурматбирули, чумал дус гьалаб МикIхIила шилизиб Хадижатла пагьмулис хасбарибси балбуц дураберкIибсири. Шила администрацияла ва культурала КIялгIялизиб бузутала икьалаличибли жагаси программара хIядурбарилри. Илала творчестволис ва баркьудлумас чихъси кьимат кабалтули, бахъал машгьурти микIхIентани ва цархIилти цалабикибти хIурматла гIяхIлани ванати дугьби дуриб. Илкьяйдали ила Хадижат мубаракрарес бакIилри декIар-декIарти районтала вакилти, сабира дарган мез ва литература гьаладяхI ардукес ибси жили «Даргала анкъи»-лизи цалабикибти.
ИшбархIира Хадижат халаси пахруличил гьанруршули рирар «Анкъи»-ла лебилра бутIакьянчибани ва, шадир ракIибхIели, лебилрара-сера иличил гьунибаэс башар. Илгъуна пергер хьунул адамличил тянишиъни нунира халаси игъбарлизи буйгIулра.
Хадижат жагати назмурти лукIуси поэтцунра ахIи, пергер нешра сари, илини сунела гIямрула вархкья ШапигIличил барх авал урши-рурси абикьур ва бархьси гьунчи дураиб.
ГIурра адамтас гIяхIдешуни дирахъес ва сагати назмуртачил нуша разидирахъес ЧевяхIсини хIед арадеш габ. ГIямрулизир гьарбизуни диубли дигулра. Мурталра илкьяйда пахруличил хIела у гьанбуршули гIямру ардукьяб!

Кьади ГIялисултIанов