Иш яргалис хIушаб ну­­ни, ахIерти га­зета бучIанти, Хас­булат ГIябдулхаликьович ХIя­сай­­ниев­личила бурисра. Ил пергер гъабза акIубси сай ва ха­лаваибси сай Дахадаевла район­низибси хабуртазиб бу­руси ярагъла устнала шилизив. Ил дебшлаварибсира сай Хъяр­букла шилизив.
Хасбулат ГIябдулхаликьо­вичла дудеш шила школализив вахъхIи историяла учительли узули вирусири, нешла хIянчи сунела биштIати руркъни сабри.
Учительтани буруливан, Хас­булат виштIали левал­ли су­нела зилантас гIибратли ви­русири. Илини, жагьли левалли, физкультурализир ва спортлизир чедиб­дешуни сархутири. Чуйнара чедивикиб ил жу­ра-журала спортла абзаназив.
2010-ибил дуслизив Хасбулат гIярмиялизиб къуллукъбарахъес арукиб. ГIяхIдизур диэс илис гIяр­мицла хIянчи, гIярмиялизиб къуллукъбирнила замана таманбиубхIели, Хасбулатли Мя­хIяч­къа­лализив ОМОН-низив къуллукъбарес вягIда би­гьун. Сунела хIян­чилизир илини устадеш, къиян­­ди­киб­хIели сабур, къиянти аги-кьяйдализивра узес бални чедаахъиб. Лерилра илди пикрилизи касили дурги, 2017 ибил дуслизив ил гьарил секIал къалабали хIя­сиб­дирутала хасси отрядлизи (СОБР) уциб. Илини СОБР-ла отряд «Ястреб-Кас­пий»-лизиб къуллукъбирусири.
2022 ибил дусла февральличив сунени къуллукъбируси СОБР-ла отрядлизив ил Крымлизи учениебачи вархьибсири. Февральла 24-личив биалли, ил дявила хасси балбуцлизиб къуллукъбирес вехIихьиб.
Илав ургъуси Хасбулат ил дусла августла 29-личив Запорожьела областьла Бярдинский районна ца шилизив декIли вяхъиб. Сунес цаибси медицинала кумек гIеббаахъили гIергъи Хасбулат ХIясайниев Симферопольла ва Москвала областьла Балашиха шагьуртазирти госпитальтазив калун.
Дявила къуллукъбирниличил барх Хасбулатла гIям­рулизиб хасси мер спортлира бурцули саби. Спортлизирра илини гьарли-марли ахъти мерани сархиб. Ил пауэрлифтингла Россияла абзаначив чемпион ветаур ва спортла мастерла уличи лайикьикиб.
Пауэрлифтингла спортла журализир хIябдехI абзани лерти сари: штанга хъарчIу­ба­чи кабихьили, кайрули алзни; скамейкаличи кайхьи, штанга ахъ­бурцни; тIашли ванзаличи­бад бекIла чеди штанга ахъбурцни.
Ил дуслизиб илини гираби ахъдурцнила шайчиб­ра спортла мастерла кандидатла ура сархиб. 2021 ибил дуслизиб Хасбулатли ДР-ла чемпион де­кIа­ри­рути някъби кадирхънила (армрестлинг) абзаначиб арцла медаль сархиб.
2024 ибил дуслизиб Хасбулатли Россияла хIур­мат­ла донорла ура сархиб. Дахъал цархIилтира лерти са­ри Хасбулатли спортлизир сархибти чедибдешуни…
Нушала жагьилтас су­не­чибад гIибрат касеси адам сай нушала Хасбулат. «Къиян­дикибхIели сари хIял-тIа­бигIят чIумадирути», — викIули вирар Хасбулат. Ила­ла гIямрули илди дугьбала мардешра кабилзахъули саби.