Чиди-биалра санигIят касес багьандан, бегIлара жавабкардеш дихуси манзил ункъли чекасес гIягIнили саби. Ил имтихIянти дедлугуси замана саби. Гьарилли ил цаван чекахIейсу, сенахIенну лебилра дурхIни хIял-тIабигIятлизиб цагъунти ахIен. Цагъунти ахIен илдала пикруми, уркIила хIялани, гIякьлу. Ца имтихIянтачи пикрихIейкIар, цархIил илдазивцун узар, савли бархIи ахъайчи учIар, лукIар. СекIал уркIиличи бурцутас ил манзил дебали къиянси бирар. Илдани дурсрала дурабад цархIил секIал чебиули хIебирар. СекIал цIакьли руркъукад хIедалути, хIедагьурти гIуррара дахъал кали сари или шишимъайзи биркур. Илгъуна анцIбукьлизиб илдала я букнила, я буснила дазу хIебирар, иштяхI беткайхъур, гьанкI хIебашанбирар. Ил багьандан имтихIянти чесадиуси манзил бахъал дурхIни психиатортачи, неврологуначи биркур. Сецадла хIейгесли биалра, анцIбукь илкьяйдали саби. Камли ахIен къаршибиркути бегIти имтихIямтачир гIяхIти кьиматуни кахIесадли, дигуси мерличи учIахъес ватхIейури, дигуси секIал хIейсис или бикIути. Вайси кьимат касили биалли, дурхIни чузибадли саби бубкIули саби. Сен илдигъунти анцIбукьуни кадиркули? СенахIенну бегIтазибад дурхIнани гIягIниси тяхIярла икьала, кумек чебиули ахIен. ГIе, илди ункъли бучIахъес се-дигара бирули саби, амма кабиили уркIи-уркIиларад гIяхIти гъай дурули ахIен, илдас гIягIниси насихIят гIеббурули ахIен. Иличи ургIебли бегIтазибад дурхIни урухкIули саби. Илгъуна биэс гIягIниси ахIен.
СанигIят кахIейсули биалра аттестат бикахъес имтихIянти дедес хIяжатли сари. Амма имтихIянти ибхIели урухиэси селра агара. УрчIемал ва вецIну цара дусла духIнар хIуни се багьурлирил, се белчIирил якьинбарес сари илди дурадуркIути. Ункъли гьар дарсличи хIядурвикIули виадли, илди чесадиуси замана цIакьли-декIар пикриикIес гIягIнидеш агара. ПикриикIес чевкъар вайтIа учIуси, секIал хIебалуси виалли. Нунира ил манзил ахъибси саби, цархIилтиван ручIули школализир нура калунсира. ИмтихIян ибхIели урехи, бархьаначи бурасли, дилара бири. Сен-сен риишара, сегъунти кьиматуни касишара, далути дакIесара ибти суалтани бекIла мехIе дуцили дири. Илгъуна манзил дила мякьлар неш рири. Мурталра набзи рикIи: «пикримарикIуд, мехIур рурси ахIенри, белчIуди вайтIа ахIен, ункъливан хIядуррикIадли, лерилра детарар, Аллагьла кумекличил лерилра дедили, гIяхIти кьиматуни кайсид, абала». Ил сабри наб ил замана бегIлара гIягIниси. Ил багьандан нуни дедибти имтихIянтала кьиматуни илала сархибдеш саби или гьанбиркур. Азирна баркалла биаб сунес.
Лебилра дила неш кьяйдали чула дурхIначил гъайбикIути биалри, цалра секIал вайтIа хIедири или гьанбиркур. СенахIенну адам гIевурцни бегIлара кьадричебси анцIбукь саби. Сегъуна баркьудилизи ахъили виалра адам илала уркIила хIялани иргъуси, гIевурцуси адам левли виалли, шурмира ахъес вирар.
Ил багьандан чесадиути имтихIянтачиб школала бучIантас гьарбизурли дигахъира. УчIусини хIебагьеси секIал лебси ахIен илаб. Школализиб дурабуркIусигъуна ахтардила хIянчи саби ил, амма декIарси мерличиб ва декIарти дурхIначил барх. БегIлара вайти – гъузгъалдидеш сари. Илди датирая! Ункъли дучIадалли, лерилра гьунчидиркур.
БегIтас ил манзиллизиб дурхIначил барх биэс чебиркур. Илдала шикьатIайчи хIердикIеная, дарсдешуни хIисаблизи кайсеная ва бегIлара мягIничебси – къакъбяхъли диэная. ДурхIнас къиянси замана хIушачи дугьабилзесли барая! Илкьяйдали хIушани дурхIнас халаси кумек биридая. Илдала пикруми бара диалра камдирар. Пикри чIянкIли имтихIянтачилацун бирар. Чули хIебалуси хIушази хьарбаили гIяхIбулхъахъу. ХIушала пикриличи лехIирхъур. Ил багьандан дурхIначил дарх диреная!
Анжела Мутазова
