Майла ахирличив ну децIла хабарли дебали пашманвиахъубра: вахъхIи-декIар зягIипли кахIели, ахиратла хъули арякьун ДР-ла урибси гIяртист ва филармонияла солист Сулайбан ГIябдуллаев.
Сулайбанра нура тяништи адамти сарри, нушани юлдашдешра дузахъутири. ГIергъиси замана ил школала къараулла хIянчиличив узусири. Нуша гьар базла духIнар кIина-хIяйна телефоннизирад гъайхIедухъи кавлути ахIенри. Ну сунечив сецад виштIали виаслира, Сулайбайс набчил халаси адамлизиван ихтилатвикIес дигахъусири.
МяхIячкъалализиб къуллукъ лебли, наб иличи укьес хIяжатбикибсири. Буркьунзала барес вякьунси ну Сулайбай сеналра вархьхIеира, пергер гIяхIялдешра дарили, дугира беркIахъибсири. Иличил ихтилатикIес дигесли бири: сай жагьли вирухIели далайикIуси заманаличила дахъал хабурти дури, амма илди сецад илини дураллира, чисалра анцIхIедулкьи или гьанбиркур.
Сулайбан ГIябдуллаевла дахъалгъунти далуйти даргала радиола фонотекализир мяхIкамли дихIули лерал гьаннара. Ургади радиоличи лехIилзасли, бикьули вирусра илала имцIаливан машгьурси «Агь, ва дила, ва дила, дила урбешла вава» бикIуси далай. Ил ахIенти гIуррара дахъал лер илала пергер далуйти. Сулайбай дучIути далуйти даргала машгьурти шягIирти Писки МяхIла, Сарат ГIялиевала, Айдамир Каймаразовла, Аминат ГIябдулманаповала, Шамхал Сухъановла ва гIуррара бахъал даргала автортала дугьбачил сарри. Дила дугьбачилра белчIунсири илини ца далай.
Сулайбан ГIябдуллаевла уржибси хъалибарг леб. Урши Ислам Урхьучимахьила школализив математикала учитель сай. Сулайба хьунул Масайра дарган мезла учительница сари. Илдира нуни балути, дебали хIурмат-хатирла адамти саби.
Наб дила белкIла ахирлизиб бурес дигулра: уркIи умуси адам Сулайбан ГIябдуллаевла гIяхIдеш нуни сеналра хъумхIертис. Сай Аллагьли Гьалжанала агьлу вараб, сунела пергер хъалибарглис арати гIямру дедаб!
Сулайбан ГIябдуллаев гьаниркахъули
Хабарагарли, хапли
Даимлис арякьунри,
Узи-уршилис хIела
ТалихIла къел датурри.
ЛевалцадхIи мицIирли,
Юлдаш гьимхIевкIахъибси,
Бархьси дякькад вашули,
ГIямру хIялалдарибси.
ХIечил юлдашдеш дирес
ТалихI сабри адамла,
УркIи гьаргли гъайикIес
Пикрира сабри хIела.
Ахирла Гьалжунтазив
Калаби хIу даимлис,
Лерилра замунтазив
ГIибрат виубли халкьлис.
МяхIяммад Сулайбанов,
ДГПУ-ла Дагъиста филологияла факультетла 3-ибил курсла студент, Ахъуша
