Муса Мусаевич Багьаудинов Ахъушала районна БурхIимякьла шилизив 1924 ибил дусла июньна 5-личив акIубси сай.
ЧебяхIси ВатIа дергъ бехIбихьибхIели, Муса Мусаевич 18 дусалра виубли ахIенри. Фронтлизи илала кIелра халати узи арбякьунтири. Камси замана бикили гIергъи, илала хъалибарглизи ца узи къел-хIерзи агарли веткахъниличила ва цархIил узи алхниличила багьахъур. 17 дус виубси Мусара шайчив калес хIейуб. МяхIячкъалализи вакIили, илини сай гIяхIъулали фронтлизи арукьес гIярза белкIун.
Ветеранни бурни хIясибли, дявиличи бурсибирнила дурсри дахъхIи духъянхIедитIун: тупанг секьяйдали бузахъусил ва секьяйда пайдалабирусил чебаахъиб. ГIур дедили документунира вокзаллизи арукиб, ва цархIилти дагъистанлантачил варх илавад Белоруссияла Гродно шагьарлизи вархьиб.
Муса Мусаевич мотострелковый (автомашинабазибад иртуси) полклизив ургъусири, сабира Туапсе шагьарла мякьлаб мерлабиубси. Илини Новороссийскла мякьлар, Донничибси Ростовлизир, Краснодарлизир кадикибти дявила анцIбукьуназир ва Северный Кавказ азадбалтахъуси дявилизир бутIакьяндеш дариб. Белоруссия азадбалтахъуси дявилизив ил вяхъибсири ва госпитальлизи аравирули калун. Сагъвиубли гIергъи дявила майдайчи чарухъун. ЧебяхIси Чедибдеш сархес гьалавра ил гIуррара вяхъиб ва Донничибси Ростовлизибси госпитальлизи вархьибсири.
1945 ибил дусла бехIбихьудлизив Муса Мусаевич гIярмиялизивад хъули вархьиб ва сунела биштIаси ВатIайзи чарухъун. Дагъистайзив мицIираг адилкьнила шайчивси специалистла (зоотехник) санигIятличи вегIубли, колхозлизив узес вехIихьиб.
БусягIятла замана ЧебяхIси ВатIа дергъла ветеран Каспийсклизив хIерирули сай. Илини 8 биштIати абикьур, 37 —дурхIнала дурхIни ва 44 — акIубтала акIубти руркъули сай. Муса Мусаевич Багьаутдинов дявила I-ибил даражала орденничил, «Гъабзадеш багьандан», «1941-1945-ибти дусмазиб ЧебяхIси ВатIа дергълизиб Германияличибад чедибдеш сархни багьандан» ва цархIилти медальтачил шабагъатлавариб.