Арбякьунси дусла ахирлизиб дурабухъунси Муъминат Хаттаевала «ГIямру даимдирар» бикIуси жузлизи авторли назмурти, хабурти ва ца пьеса кадерхахъурли сари. «ГIямру даимдирар» илала кIиэсил жуз саби (цаибил илала жуз «Сакинат» бикIуси повесть сабри). Ишди бурхIназиб нуни «ГIямру даимдирар» белчIи таманбарира ва халаси ахIенси макьалализиб иличила дила пикри бурулра.
Авторли сунела жузлизи кадерхахъурти лерилра белкIани хIябал бутIаличи дутIили сари. Жузла цаибил бутIализи кадерхурти назмуртас ил «Чархараби» рикIули сари. Бархьси саби или рикIнира: цархIилти назмуртачил дарх (лерилра 21) ишар чархарабира лер: даргантас ва дарган мезлис, сари акIубси Дахадаевла районнис, нешлис, сирхIянтас. Авторли гьар мурталраван жагали делкIи сари илди чархарабира. Гьари лехIдизирая, се рикIулил ил нушаб, даргантас, белкIунси назмулизир:
Сабурла умхьули дунъя ибхьанти,
Мургьила някъбани яшав лушанти,
Халадеш агарли, гьунар халати,
Даршудеш диганти дила дарганти.
Нуша «сабурла умхьули дунъя ибхьанти» саррал нуни бурес хIейрус. «Мургьила някъбани яшав лушанти», дила пикрили, рикIули сари ил сунела риштIахIелла гIямру чучил дархли деркIибти гIярбукIантас (Муъминат Хаттаевани Кубачила урга даражала школа таманаибси саби). Илини бурусира дебали бархьси саби: гIярбукIанти, мургьилизир ва цIуба арцлизир някьиш дирули, яшав лушанти адамти саби.
Даргантас багъишладарибти назмуртас гIергъи Муъминат Хаттаевани жузлизи каберхахъурли саби гимнлис хасбарили белкIунси «Дахадаевла районнис» бикIуси сунела назмура.
Бурес чебиркур, итхIейчибад 20 дусличибра имцIали замана арбякьи бургар, МяхIяммад ГIябдуллаевич ГIялиев нушала районна бекIли вирухIели, нушала районна гимнла дугьбас конкурс багьахъурсири. Бахъал автортани конкурслизир бутIакьяндеш дарибтири. Конкурслис гьаладихьибти Муъминат Хаттаевалара, Жамбулатлара, дилара назмуртазирад касибти дугьбазибад гIяпабаркь ХIяжи ГIябдуряхIмановли Дахадаевла районна гимн цахIнабяхъибсири. Дила иш макьалализир гьаладирхьулра хIушаб ил гимнла дугьби.
Дахадаевла районнис деза
Хамти дубуртала хIяна бургачиб
Дагъиста заклиуб алкунси чирагъ,
Кьиблала шалаван, кьисматла гьуйчиб
ТалихIла берхIи наб булхъан хIечибад.
Припев:
Ламус-яхIла район Дахадаевла,
Дила пахру-деза, къиянна къала,
СирхIяла-муйрала узидешла анхъ,
Сахаватли бухъаб хIела Уркарахъ.
ЛямцIла урги бурцу багьадур уршба,
ХIулбала нур кайсу исбагьи рурсба,
Шандан мутIигIбиру даршуси цIакьли,
ВатIан машгьурбиру пагьмукар халкьли.
Припев:
Ламус-яхIла район Дахадаевла,
Дила пахру-деза, къиянна къала,
СирхIяла-муйрала узидешла анхъ,
Сахаватли бухъаб хIела Уркарахъ.
Даргала ургуба мургьила хатIли
Тарихла бяхIлизи лукIа гIяхIгъубзна.
Дусмала ласлиуб чеахъбикIули,
Бургьаби, берхъаби, дурхъаси ванза!
Припев:
Ламус-яхIла район Дахадаевла,
Дила пахру-деза, къиянна къала,
СирхIяла-муйрала узидешла анхъ,
Сахаватли бухъаб хIела Уркарахъ.
Жузлизи кабикахъибси «Афганистайзивад чархIевхъунси уршила кагъар» бучIухIели, хIулбазир сарил биса дакIудулхъули дирар. Ил кагъар дубурлан сирхIян уршила биъни багьес иларти дугьбачиблира гьамадли саби.
«Декла машина бицIес
Чили кумекбариба?
ДегIес анкIи хъуличи
Чили кадаахъиба?» – ургъан нешлизи хьарикIули сай.
«Хъу бургар чебакIили,
ХIеб дургар садаили,
ХIентIа белшес сайусну –
ЯхIбара, марисудну», — ил неш паргъатриахъесра къайгъилизив сай.
Илини кагъарлизир виштIаси узизи дурути ахъли делчIес, дирхаирая, дила хIилхIи гьунар баиб.
«Узи, ахъли мабучIад
Гьанна хIечил сари гъай…»
Чедирти дугьбазибад аргъесли саби, илини виштIаси узизи сунела дигIянаси пикри бурули виъниличила… Халаси устадеш леб нушала Муъминатла гьар секIайчила гIямрулизиб биубси тяхIярли лукIес. Илини, цацабехIтаниван, адам вирххIеэсти къунби лукIес балули ахIен. Ил багьандан бургар Муъминатли делкIунти дучIес иштяхI алкIусира.
Муъминатла «Назму алкIуси манзил» бучIухIели, наб А.С.Пушкинна «Евгений Онегин» романнизирти ишди тугъи гьандикиб:
«ИтхIели дигIянати къярданазиб,
Къургъи дучIухIели гьала хIеблизир,
РурхIути шинна мякьлаб, лехIдешлизиб,
Назмурти лукIес иштяхI акIуб набзиб».
(«В те дни в таинственных долинах,
Весной при кликах лебединых,
Близ вод, сиявших в тишине,
Являться муза стала мне»).
Иш назмулизир Муъминатлара лер Пушкинна назмулизиртачи мешути пикруми. ХIера, ишди:
«Гьаман тикрардирули дуркьдиубли делкунти
Дугьби гIур хIедурули, лехIкахъес кьасбарасра…
Кьабулдарес хIейгули, ну жалрирхъули хьалли,
Назму алкIан илхIели, хабаралра агарли».
Ил назмулис гIергъи «Бацла байхъала мява» бикIуси назму леб. Илизир поэт сунела дигIянти пикрумира сарира бацла байхъала мяваличи дугьарилзули сари. Наб дебали гIяхIбизур ил назмура. Гьаригу, ца пикридухъеная ишди удирти дугьбала бухIнабуцличи:
«Къакъличи кабикибси
Бацла байхъала мява,
ХIермабикIуд улкьайла-
Чарх бирахъули шавла.
ДехIмадурцахъид набзи
ДетхIеэсти пикруми,
Мадурид дигIянали
Тамашала хабурти».
ЧIянкIли халаси пагьмула бегIти адамтицун саби БерхIиличи, Бацличи, урмачи дугьабизес бирути. ЧевяхIсини гьарил адамлис илгъуна пагь бедлугуси ахIен. Ил багьандан нуни бурес вирусра: Муъминат Хаттаева гьарли-марли мурхьти мягIналичилти назмурти цаладирхъуси поэт сари.
Октябрьла революцияла мангъуш («глашатай революции»), урусла чевяхIси поэт В.Маяковский, цархIил урусла чевяхIси поэт А.Блокла назмуртачил сунела назмурти мешудурцули, викIусири: «Дила 10 назмулизирад 5 гIяхIти сари, 3 – ургарла тяхIярла, 2 – пайдаагарти;% Блокла биалли, 10 назмулизирад 8 пайдаагарти сари, 2 – дебали гIяхIти. Нуни илдиван гIяхIти, мажахIят, делкIес вииша».
Муъминат Хаттаевала иш жузлизи кадерхурти назмуртазир нунира даргира тяп Маяковский викIути Блоклагъунти кIел дебали гIяхIти назму. ЦархIил селра хIебелкIи, илдицун делкIи риаллира, Муъминат поэт сарра рикIес рирусири.
Илдазибадси цаибси назму «Рерцахъаба, Аллагь» бикIуси саби, кIиибил назмулис авторли «Гьай-гIяйиб ирис нуни» бикIуси у бедили сари. Ил кIиэсил назмулизир Муъминат рикIули сари: «Бахъ гIяхIси ца жуз тебри, белчIес бекIхIериубра», «Гьайбатси далай тебри, бакьес ну ралкьхIеурра», «ГIяхIси жуз хIебелкIунра, наб пагьму хIебаили», «Дахъал секIал уркалун, чедаэс хIебикили». Назмула ахирлизир «Аллагь, дурхIнала талихI мяхIкамбара ахIерли» рикIули сари ил. Иличибра мягIналашал дурхъаси балга гIур секьяйда булгусив?
Муъминатла ну викIуси цаибси назму, жузлизиб белчIес хIебикалли, даргантани газетализибалра белчIесгу ибси пикрили, дила иш белкIлизиб гьалабирхьулра.
Рерцахъаба, Аллагь
Рерцахъаба, Аллагь, кьясдешлизирад,
УркIби мискинтала гъай-мезлизирад,
Халарурхус ибси пикрилизирад,
ХIярамли бакIибси къурушлизирад.
Арцличиб белшунси талихIлизирад,
Баракат агарси яшавлизирад,
Зиланти агарти гIямрулизирад,
ГIямрула пашманси ахирлизирад.
Назмулизир дурути дугьби тикрархIедирули, нура ЧевяхIсиличи дугьавилзулра ва илизи тиладивикIулра, иш назмулизир гьандушибти балагьуназивад нура верцахъаба или. Белики, адамтас вайси хIебирасли ва хIебулгасли, гIелар калунти дила бунагьуначивад Аллагь чевверхесгу ибси пикрира башули бирар.
Жузла цаибил бутIала ахирлизиб нешлис белкIунси назму леб. Ил назмулизир нешлис Муъминат «дунъя сунечиб ласбикIуси мургьи-арцла арк» рикIули сари. ГIур чили вируси илдичирра дархьти дугьби нешанас дурес? Бурасли, иш жузлизи кадерхахъурти Муъминатла лерилра назмурти гIяхIти сари.
Вари хъуммартидая жузлизибси «БицIили саби барха» бикIуси назму белчIесра.
ИштяхIличил делчIунра нуни жузла кIиибил бутIализи кадерхахъурти Муъминатла хабуртира. Илдира гIямрулизир кадиркуси тяхIярли, чузиб сегъуналра вирххIеэси секIал гьанхIебушили, делкIи сари. Бурес чебиркур, Муъминатли дубурлантала гIямрура гIядатунира ункъли далули сари илира.
Наб гьанбиркур илини «Сакинат» бикIуси повестьлизир сунела проза лукIнила устадеш чедаахъили (нуни ил повесть дарган мезлира урус мезлира белчIунси саби). КIиэсил жузлизирти хабурти дучIухIели, илди устадеш гьатIира имцIадиъни багьесли саби.
Литературала произведениебазир тIабигIятла чебаълуми сипатдирнилизирра Муъминатла халати устадеш лер. Илини илди чебаълуми прозала игитунала баркьудлумачил цугдикахъесра балули сари. Ил багьандан бургар нушани илини делкIунти иштяхIличил дучIути. Лерилра чедир гьандушибти пикрилизи касили, нуша Муъминат Хаттаевас тамай ретаурси писатель сари дикIесра дирехIе.
Жузла ахирлизиб пьеса чебаибхIели, ну дебали тамашавиубра. «Улас, пьесалра селичилав ишини белкIунси» викIули, ну пьесаличивадли жуз бучIес вехIихьира.
ИшбархIилизир хIяжатти суалти дуилри пьесализир ахъдуцибтира. Илди дархьли арзесра Муъминат бажардирикили сари. Авторли пьесализир бусягIят нушала ургаб хIербирути адамтала гIямру сипатдирули сари.
КъантIли бурасли, нуни Муъминат Хаттаева даргала драматургиялизи кацIибси цаибси ганзличилра мубаракрирулра.
ХIяжимурад Ражабов
