МяхIячкъалала бекIлибиубси майдайчир медицинала кумек гIебаахъес багаладирути (санитарные) автомобильти кьабулдирнила балбуц шадлихъла аги-кьяйдализиб бетерхур. Дагъистай 171 автомашина касиб, сарира лебилра регионна медицинала 65 учреждениелис хасдарибти. ЦахIнабси кьадарлизирад 6 машина ДР-ла «Лавашала ЦРБ» ГБУ-лис декIардарибти сари.

«Ил анцIбукь районна арадеш бихIнила кабизлис дебали мягIничебси саби, сенахIенну сагати автомобильтани медицинала кумек кайснила даража ункъбирахъу. Хаслира илди дебали хIяжатдиркули дирар гьарахъти шимазир, зягIипти медицинала учреждениебази биахъес къиянбулхъути мер-мусаличир. Илгъуна транспортличил автопарк сагабарни медицинала хIянчизарти къалабали жиличи дурабухъес бирнилис икьалали бетарар.

Гьалар нушани илдигъунти урегал автомобиль касибтири. БусягIятла замана нушаб пайдаладирахъес 12 автомобиль лер, илди лерилра хасти шимас белгидарибти сари.

Бурес дигахъаси, районна поликлиникализиб декIарбарили леб кабинет, сунезивра дявила хасси балбцла бутIакьянчибас ва илдала хъалибаргунас кумек гIеббиахъули, тухтур узуси. Касибти автомобильтазибад ца ил кабинетлис хасбарили бирар», — багьахъур Лавашала районна больницала бекI тухтур ПатIимат ГIябдурашидовани.

«Арадеш бихIнила Министерстволис бекIдеш дирантас уркIи-уркIилабад баркалла багьахъес дигулра, илгъуна кумек гIеббаахънилис, ва илди дигести дарсдешунани нушала зягIиптала арадеш къулайбирниличи гIяхIлашал асарбирниличи рирхулра», — рикIи ил.

Бурес чебиркур, ДР-ла арадеш бихIнила Министерстволи белгити автомобильти «Духъянти ва жигарчерти гIямру» бикIуси миллатла проектла сурсатунас асибти сари.

Лавашала районна администрацияла пресс-служба