Гьалабван Дагъиста пачалихъла университетла, даргала-урусла отделениелизиб нешла мезлис хасбарибси шадлихъ бетерхурсири. Илар декIар-декIарти лугъатуначилти кьукьнани бутIакьяндеш дариб. Гьарил лугъатла вакилли се-биалра барес гIягIнисири: назмурти делчIес, кIаналичил бархбасунси сегъуна-биалра тарихличила бурес, презентация чебаахъес, вегIла мезличил дархдасунти стенгазетаби дарес. Гьарил кьукьяли чус дигусигъуна тема декIарбарили, ункъли хIянчи барилри. Балбуцличи бакIили, илкьяйдали декIар-декIарти лугъатунала вакилтира лебри. Илдас студентунани чедиахъутачи хIербикIес дигиаурлири, сенахIенну цархIилти лугъатунала вакилтазирад чули гьалар хIедакьибти, тамашала дугьби дагьес имканбикIулри.

Дила пикрили, илдигъунти далдуцунала гIяхIдешли лугъатуни-ургар бархбас алкIахъули саби, цархIилла культураличи, тарихличи, гIядатуначи пикри бяхIчииахъули саби. Шадлихъ таманбиубли гIергъи, балбуцла бутIакьянчиби чус тамашадизурти суалти хьардиули, ихтилатбикIес бехIбихьиб.

Гьар шадлихъ дураберкIили гIергъи студентунази суалти дедлугули дирар, «се барес гIягIнили мез мяхIкамдарес ва сен-сен вирара илди челябкьуси наслулизи хъумхIертахъес багьандан?» ибти. ХIера, иш гьакIлисра студентунази илдигъунти суалти хьардаиб.

Жавабти декIар-декIартири. ЦабехIти лугъатла мезанала чараагарли имтихIян биахъес гIягIнили саби или бикIулри, цархIилти – лугъатуначила телевидениелизир передачаби кайсес хIяжатли сари бикIулри. ХIябэстала пикрили, дурхIнази нешла мез дагьахъес бегIтачи хъарси саби или бурулри. Илар дурибти лерилра пикруми дархьтири или гьанбиркули саби наб.

АхIерти газета бучIанти, хIушалара ил шайчирти пикруми аргъес дигахъира.

Анжела Мутазова