«Тарих — нушани диру-далтутала уси, ардякьунтала-бикьри, гьаннала манзилла — гIибрат, челябкьлалис -сахъдеш саби».
Тарих — гIилму саби, суненира халкьла тарих руркъуси. Ил гIилму кабирхьуси саби школабазиб, колледжуназиб ва университетуназиб. Историяла мугIяллим — убла бихIуси ва челябкьлаличи умут бирхьуси ветарули сай.
История гIилмуцун ахIенну,дусмала белгиси, манзилла халкьла гIямруличила хабарра саби, суненира гIибратуни духIнадуцибси. Историяла мугIяллимти ил тарих мяхIкамбиранти саби, чеабиуси наслулис умут лугули, илдала бяркълизи халаси пай кабирхьули саби, чузибадра пергер адамти бетаахъес багьандан, тарих мисаллис лебкули.
Хаслира ишбархIила манзиллизиб хIяжатли саби жагьилтази тарих бяркъяхъес ва илдас патриот бяркъ бедес. ИшхIелла заманализиб саби мугIяллимла хIурмат чеахъбикIуси, сенахIенну баягъи гьаннала манзиллизир жагьилтани Западла пикри-хIерани, гIядатуни гIерисули сари.
ХIера, сунела ибкьси бузериличибли ва адуцалачевдешличили бархкьяби ва бучIанти-ургаб халаси хIурмат сайрхили сай ХIяжимурадов Мурад ТIагьировичли.
Мурад ХIяжмурадовли Дагъиста Республикализиб бетерхурси лебил Россияла «Дусла мугIяллим-2025» бикIуси конкурслизир бутIакьяндеш дариб. Конкурсла ахирличиб чедибдеш сархибти ва призерти шабагъатлабариб Дагъиста белчIудила ва гIилмула шайчивси министр ЯхIъя Бучаевли. Илдала лугIилизив сайри Мурад ХIяжимурадовра.
М.ХIяжимурадов акIубси сай 1976-ибил дусла февральла 2-личив Дахадаевла районна ГIяштила шилизив. Сунени буруливан, илала виштIахIейчивадал тарихличи иштяхI акIубсири. Ил ГIяштила шилизиб школа таманбарили гIергъи Дагъиста Пачалихъла Университетла Исторический факультетлизи учIес керхур. Мурадли белчIуди ахъси даражаличиб таманбариб I999-ибил дуслизиб.
Гьаннала замана сунела бузери даимбирули сай Дагъиста Пачалихъла университетлизиб, ВатIа тарихла кафедрала заведующийла къуллукъуни дузахъули. Мурад ХIяжимурадов тарихла гIилмуртала кандидатра сай.
Нушала шайзивадра Мурад ТIагьирович чедибдешличил мубараквирулра ва илис сунела бузерилизир гIурра сархибдешуни, чIумаси арадеш дулгулра.
Рабадан БяхIяммадов
