Россия — тамашаласи улка саби, сунезирра дахъал миллатуни хIердируси. Илдала лебталалра чула мез ва культура лер. Гьарилли илдазибад нушала рухIла давла цалабирхъуси саби. Нешла мез мяхIкамдирни ва тIинтIдирни — нушала бекIлибиубси мурад саби, сенахIенну ил тарихличилацун ахIенну, челябкьлаличилара пикри саби. Нушала дурхIнани, илдала баркьибтани нешла мез далули дигули диахIелли, чебиркур илдази мез руркъахъес бурсибарес, культура ва тарих мяхIкамдирахъес.
Дила пикри хIясибли ишбархIила манзиллизир нешла мез мяхIкамдаресцун ахIенну, тIинтIдаресра хIяжатли саби.
Илди дузахъес гIягIнили сари хъалибаргуназир, школабазир,пайдаладарес хIяжатбиркур жузазир, газетабазир,телевидениелизир,интернетлизир,хас- лира лугIурбалашалси манзиллизир.
БекI редакторла къуллукъличив узули, нуни иргъулра ва чебиулра, нешла мез мяхIкамдирнилизиб бекIлибиубсигъуна илди гьар бархIи дузахъни саби. СенахIенну бегIтани хъалибарглизиб гIибрат чехIебаахъалли, виштIасини илди гIур чинаралра дяркъес хIейрар ва илис ил шайчиб дебали къиянбулхъан. Мез кавлути сари илди дузахъули, наслуличирад-наслуличи диахъули лералцадхIи.
Дагъистан Республика, Россиялизибцун ахIи, лебилра дунъяличибра дахъал миллатуни цаличил ца уржили хIердируси регион саби. Ишар лер 30-йчирра имцIали миллатунала мез: даргала, кIарахъала къумукъунала,лезгибала,булугунала,табасаранна, рутулла,азербайжа,агъулла ва цархIилтира. Амма ишбархIила манзиллизиб культурала рухIла давла сагаси лугIурбалашалси манзиллизиб кIиибил даражаличи арбякьи саби. Секьяйда къиянни биалра, нушаб ил шайчиб халаси хIянчи дураберкIес чебиркур.
Нуни биалли, Россияла миллатунала вакилти уркIи-уркIилабад мубаракбирулра пачалихъла мезанала БархIиличил. Бахъбааб мез далути ва руркъути жагьилти! Дигахъеная, руркъеная нешла мез ва илдачил урузхIекIули, гъайдикIеная.

Рабадан БяхIяммадов