Улкализир кадиркути анцI­букьунала шай­чиб кахIели, СВО-ли­зир бутIакьяндеш дирути ну­ша­­ла бургъанти гIеббурцути адам­ти чебиухIели, уркIи пах­ру­ли бирцIули бирар. Ил­ди­гъун­тала лугIилизиб саби ну­шала республикала хьунул адам­тира.
Мурул адамтачил къяйли илди гьужумлизи дурабухъес хIебирухIели, бургъантала уркIила гьав ахъбурцуси баркьудилизи ихъули саби. Нушала бургъантас кумек цалабирхъули, жигарчерли гIяхIбаркьла хIянчи дузахъули сари «ЦДТТ г.Каспийск» ДО-ла МБО-ла (дурусли буралли, ил дурхIнала пагьмуртала центр саби) мугIяллим Ражабова Зугьра БяхIяммаевнани.
Сунела пергер баркьудиличил дурхIназира мисал чебиахъуси дубурлан исбагьи Сергокъалала районна УбяхI МулебкIила шилизирадси сари. Ил шилизибси урга даражала школализиб белчIудира касили, Избербашла педагогикала колледжлизи, бехIбихьудла классунала факультетлизи карерхурсири. Зугьра белчIудира ункъли ручIули хъараахъурли, сари акIубси шилизи чаррухъунсири. Илини илабси школализир пионервожатаяли рузули, сунела бузерила цаибти гунзри кацIибтири. 12 дус ил къуллукъличиб хIянчи барибси Зугьра Ражабовани гьарил дурхIяла хIял-тIабигIят ункъли дяркъур, илдазивад гьарилла уркIиличи дякь кабихьиб.
Хъалибаргла аги-кьяйда хIясибли, ил Каспийсклизи гечриэс кьабардиуб. Илини шагьарла 2-ибил школализирра пионервожатаяли рузули, сунела санигIят даимбариб. КIинайс дурхIнала пагьмуртала центрлизи методистли шуррухъунсири.
Алавчарли кадиркути анцIбукьуназир жигарла бу­тIа­кьяндеш дируси, лерилра аги-кьяйда ункъли далуси Зугьра Ражабовас хандакьуназир бургъантани пайдаладирути шямани далкьарахъес ибси пикри бакIиб. Илала сипта гIеббуциб бархкьябанира школала бучIантанира. Илала дурабад, Зугьрала икьалаличил бургъантас кумекра цалабяхъили, СВО-лизи бархьибсири. Цаибси кумек илдани бархьибсири 2023 ибил дусла декабрьла 21-личиб. ИлхIели илдани жавабра касибсири, бургъантани чус гIебааахъибси кумеклис халаси баркалла балахъулри.

2024 ибил дусла мартличиб биалли, центрла директорла маслигIят хIясибли, мугIяллимти бургъанти дигIянбиркахъес хасдарибти (маскировочные) сетани дирнила баркьудилизи ахъиб. Ил шайчиб мекелли халаси кумек бариб нушала республикализир бегI гьалаб илдигъунти сетани дирнила баркьуди бехIбуцибси «Ихтилат» («Диалог») бикIуси центрлис бекIдеш дируси Зайнаб Рашидовани. Зугьра иличи дугьаризурхIели, Зайнабли халаси иштяхIличил лерил секIал чедаахъиб, илизи сетани дирнила баркьуди гIебасахъиб. Зайнабли Каспийсклизиб ил бетуц бузесаэс хIяжатти секIалра дедиб. ХIера, иличибли Зугьра ва бархкьяби кирила баркьуди гIямрулизиб бетурхахънилизиб асарчебли бузес бехIбихьиб. БусягIятла заманара илди ункъли детурхули сари. Арбякьунси дусла сентябрь базличирад гIяхIцад сетани илдани дявила хасси балбуц бетурхуси мерличи дархьили сари.
«Хандакьуназир пайдаладирути шямани, бургъантас хIяжаттдиркути хасти сетани дирнила хIяракат наб дебали гIяхIбилзули саби. Наб уркIилис дебали гъамси баркьуди дурабуркIусиван кабилзан. ВатIан балтахъути лебилра уршбира дулекI-даргла узбиван кабилзули саби. Илдас кумек гIеббиахъни нуни дила дурхъаси чеблализира халбирулра. ЦацабехIтас гьанбиркули бургар, ила бургъес арц багьандан арбякьунтира леб или, амма сен-биалра илдала гIямрулис урехи леб. Иличи хIерхIеили, лебилра нушала бургъанти ВатIан гьанни душмайчи дяхI-дяхIли дурабухъи саби. Урусуни биаб, цархIилти миллатунала биаб, лебилра илди нушала ахIерти бургъанти саби. Чула жан ахIе­ра­хIедарили, улка берцахъес къайгъилизиб саби илди. Халаси баркалла чус, нуша ишкьяйдали паргъатли дусахъес дуги-хIери хIеили къарауйчи кабизнилис», —рикIули сари Зугьра.
Зугьра илдигъунти пергер уркIи-хIялла регI риъни нушани чебиулра илала гьар бархIила диру-далтутазибра. Сетани далкьарахънилис пайдаладирути гIягIниахълуми ардихнила-дихнила лерилра къуллукъунира Зугьрачир сари, илхIелира сунела харжаначил дурадуркIули.
Бургъантала уркIби разидиахъести далдуцунагIиб ум­цIути мугIяллимтани сетаначил дарх мурталра се-биалра савгъатунира дурхьули дирар: берк-бержла продуктуни, гьар бархIи хIяжатдиркути секIал, удирти палтар, ванати динди ва цархIилтира. Илгъуна пикри гьалабихьибсира Зугьра Ражабова сари. Иличибли багьесли саби нушала хьунул адамтала уркIила дигила ва ванадешла дазурби агни.
Зугьрани илкьяйдали Кас­пийск шагьарла декIар-декIарти организациябазирра сунени бузахъуси къуллукъла черкад устадешла дурсрира дурадуркIули сари, цар­хIил­та­зира чула гIяхI­баркьла баркьуди гIебасахъес багьандан. Сецад имцIали адамтани иличила багьаллира, илцадра халаси бургъантас кумек алкIни иргъули саби дубурлан рурсили.
«Гьала-гьала бургъантас кумек бурхьнила хIяракат бехIбихьибсири дурхIнала суратуначибад, солдатунас дурхьути кагъуртачибад. Лерилра хIянчурби гуманитарный кумекличил дарх кадирхьутири. Гьанна биалли, нушани шямани ва сетани дирулра. Девличилцунра ахIи, баркьудиличил кумек акIахъес дирни, дебали мягIничебси саби. Нушани далкьарахъути сетани зумати, дебати сари, ил багьандан илдачи халаси хIяжатдешра леб», — баянбирули сари Зугьрани.
Ахъси даражаличир далкьаахъурти диъни багьандан, Дагъиста сагаси хабуртачила буруси каналлизибра иличила гьанбушибсири. Саби бургъантанира мугIяллимтас халаси баркалла балахъули бирар. Дявила частаназирад Зугьра Ражабовала уличил дакIибти Баркаллала кагъуртира камли ахIен.
Илгъуна дебали мягI­ни­чебси ва багаласи баркьудилизи ахъибси Зугьра Бя­хIям­маевнас, илкьяйдали илала сиптаби гIердурцути барх­кьябас гьаннала гIергъира чула хIянчи ункъли детерха­хъес халаси сабурра, кахIе­дурхути цIакьанира, чIу­маси арадешра дулгехIе! Жяв-жявли тамандиаб дургъбира, хъули, гъамтачи чарбухъаб нушала асил уршбира!

Салимат ГIялиева