Хьунул адамтала БархIилис хасбарили, МяхIячкъала шагьарла Собраниела ва жагьилтала Парламентла депутатунани нушала тах шагьар умубирути ва къулайдешуни гIердурцути хьунул адамти мубаракбариб. Илгъуна гIяхIбаркьла балбуц ункъли бетерхахъес халаси къайгъи дакIубариб шагьарла депутатунала Собраниела председатель Хиби ГIялиевли ва жагьилтала Парламентла председатель ГIялигъалбацI ХIусейновли.

Жагьилти депутатуни шагьаркад къунзбикIули, кьакьурби ушкути хьунул адамти — бузерила зяхIматчиби мубаракбариб ва илди вавнала халубачил, муридешуначил разибариб. Хьунул адамтала ил гьамадли ахIенси бузерилис баркалла балахънила лишаннира бетаур. Илдала бузери дебали мягIничебсира саби. Иличила балути жагьилтани хьунул адамти уркIичеббариб.
Шагьарла транспортла, ЖКХ-ла ва архитектурала шайчибси комиссияла председатель, МяхIячкъалала шагьарла Собраниела гьалабси жагьилтала Парламентла депутат ГIямар-Хан МяхIяммадовлира ил балбуцлизир жигарла бутIакьяндеш дариб.
Жагьилти депутатуни бирхули саби, ил челябкьлализибра гIяхIси гIядатли бетарниличи ва чула баркьудиличил цалис цали кумекбирнила, гьарил санигIятла мягIничебдешличила, цархIилтазира аргъахъес имканбикIниличи. Гьайгьайрагу, гьаннала жагьилтала илдигъунти гIяхIти пикрумира-кьасанира лерни, дебали дигеси саби. Илдигъунтани саби челябкьлара тIашбалтуси. Берхъаб нушала асилти жагьилти!

Р.МяхIяммадов