Ишди бурхIназиб «Ахъушала район» МО-ла администрацияла бекIли ва жавабла хIянчизартани ЧебяхIси ВатIа дергъла бутIакьянчи Муса Мусаевич Багьаутдиновличил гьунибаъни дураберкIиб.
М.М.Багьаутдинов акIубси сай Ахъушала районна БурхIимякьмахьила шилизив, 1924 ибил дусла июньна 5-личив. Арбякьунси дуслизив ил 100 дус виубли сай. Муса Багьаутдинов Каспийск шагьарлизив сунела дурхIначил варх хIерирули сай.
Ил 17 дусла гIямруличив сай гIяхIъулали ЧебяхIси ВатIа дергълизи арякьунсири. Илини бутIакьяндеш дариб Новороссийск, Краснодар, Ростов шагьуртазир ва Северный Кавказ азадбалтахъули кадикибти дявтазир.
ЧебяхIси ВатIа дергълизиб гъабзадешличил ургъули, Чедибдеш сархес багьандан дахъал къиянти чедаибси Муса Багьаутдинов ЧебяхIси ВатIа дергъла цаибил даражала орденничи, «Гъабзадеш багьандан», «1941-1945-ибти дусмазиб ЧебяхIси ВатIа дергълизиб Германияличибад чедибдеш сархни багьандан» бикIути ва дахъал юбилейный медальтачи лайикьвикили сай.
Муса Мусаевичли сунела гIямрула рархкьячил барх 8 урши-рурси абикьур, дергъли гIергъити къиянти дусмазиб халаси бузерира барили, гIяхIси бяркъра бедили, илдачибад акIубти леб 37 дурхIя, авэсил наслулизибра леб 44 урши-рурси.
Муса Мусаевичли Германияла гъармукабачибад Чедибдеш сархес багьандан дяхIяурти къиян-жапаличила, нушала бургъантала гъабзадешличила жагьилтази хабурти дурули сай, чеабиуси наслулизи гIяхIгъабза адамтани ВатIан багьандан дарибти гьунартачила багьахъес ва хъумхIертахъес или.
С.ГIябдуллаева
