Сабурличил заклизир
Урцули дирар чIакни,
Мургьила ранганазиб
Неш-ванза чебиули.

Илгъуна пикри лебгIеб балбикили саби абзурли дунъя ва илаб хIербирути адамти сихIрула белкIаначил варакьдируси шягIирличи.
Гьарли-марли поэтли цархIилтани чедиутичир азирнали имцIали секIал хIясибдирули виэс хIяжатли саби, сенахIенну сунени чехIебиусиличила кьалли ил лукIес хIейрар. ЛукIутира илала азир рангли пархкадикIути заклизирти зубартиван адамла уркIи-рухIличи шаладикIули дирар. Пагьмучевси поэтла назмурти дучIухIели, адам ил багьандан сай тамашала хIяланачи виркуси ва илдала асарлиув гIяхIла шайчи варсируси. Илкьяйдали поэтла пагьмула, устадешла ва пасихIдешла урунжлизивадли ужуси шигIрули велкъес вируси ахIен. СенахIенну илди гIярбукIла мургьила някьишван берхIила нурлизирадли жагали демхурти сари дубурла азир рангла вавнала тIемличилти ва заблис гIергъи дубуртала хъябуртачи тIашбилзуси зурхIябван рурхIути сари. ГIе, чяхI-забван поэтла дагьрилизи шигIрула варачан бухIнабиркули саби. Ванзализи забла кIунтIриван илала уркIи-бекIлизи пикруми адицIули сари ва илдала кумекличил назмуртала къяяни алкIули сари. Илкьяйдали илданира савли урхьназибадли гьаббикIуси берхIила нурли хIурхъала бургиван адамтала уркIбира шала-ванадирули сари.

Даргала машгьурси поэт, прозаик, журналист Ражаб Адамадзиевла назмурти дучIухIели илдигъунти пик­руми дай дуги заклизир зубартиван уркIилизир улкесдирхIули сари. Илцадра адамличи асарбарести ва мурхьси мягIналичилти сари ил­ди. Гьайгьайрагу, поэтличила гъай­икIу­хIели, илала назмуртала урунж­кад шарабли велкъес хIей­руси гьункьяван ганздикIули ди­рехIе.
Ражаб Адамадзиев УбяхI Мулеб­кIила шилизив акIубсири.

Жявли бегIтазивадли мяхI­ру­миубси урши 1947 ибил дуслизив МикIхIила дурхIнала Юрт­­лизи викиб. Илар верхIел класс таманаиб ва 1952 ибил дус­лизив Сергокъалала педучи­лищелизи керхурсири. Илаб му­гIял­лимла санигIят касили гIергъи, ШурагъатIла районнизив (гьанна Чечентала Республика) бехIбихьудла классунала учительли узес вехIихьибсири. Ца дус Ахъушала районна КургIила шилизибра бехIбихьудла классунала мугIяллимла хIянчи бариб.

1958 ибил дуслизив Ражаб Ражабович ДГУ-ла филологияла факультетла урус мезла-Дагъиста мезанала отделениелизи керхурсири.
Университетлизиб чебяхIси даражала багьуди касибси педагог Дахадаевла ва Хайдакьла районтазив чеалкIуси наслулис мурхьти багьудлуми дедлугули, чекайзурли узусири. Ил узусири Кубачила урга даражала школализив урус мезла ва литературала дурсри кадирхьули ва Мажалислизив «Колхозла байрахъ» (ишхIелла манзиллизиб «Хайдакьла зяхIматчи» бикIуси) газетала редакциялизив жавабла секретарьли.

1965 ибил дуслизив сайри Ражаб Ражабович республикала «Ленинна байрахъ» газетала редакциялизив узес вехIихьибси.
Ишдусла ноябрьла 5-личив Ражаб Ра­жабович 90 дус вируси сай. Сунела гIям­рула марси гьалмагъ Хамисличил илини къугъаси хъалибарг абикьур ва адаб-хIяяличил гIямру деркIиб. ДурхI­ни­ра бегIтигъунти хIур­мат­чебтили халабаиб ва гIям­ру­лизир чучи лайикьти меранира дуцили, ункъли хIеркабирули саби.

Ражаб Адамадзиевли республикала «Замана» (гьалаб Ленинна байрахъ» бикIуси) газетализиб 47 дус хIялалси хIянчи барибсири. Ил редакциялизив культурала отделла заведующийли узуси манзиллизиб бахъал жагьил лукIантас халаси кумек гIеббиахъусири. Илкьяйдали даргала миллатла газетаби-журналтазиб бузути журналистунани, поэтунани ва писательтани ил мурталра уркIила дигиличил гьануршулира вирар.
Дебали халаси поэзияла дурхъаси давла гIелаб батур илини 2012 ибил дуслизив нушачивадли даимлис арякьунхIели. Гьайгьайрагу, халаси бетахъри саби Дагъиста литературала ургубализиб илгъуна пагьмучевси поэтли жявли дунъя бархьбатни. Творчествола анхълизив илкIун бегIлара сабухъчевли узуси манзилри илала ручка даимлис някълизибадли батбухъунхIели. Сецад шалати ва пасихIти пикруми дургъулрил илала бекIлизир, сецад мурхьси мягIнала назмурти хIеделкIи калунал, кьисматли илала гIямру къябаибхIели. Сепайда, ЧевяхIсила кьадуртачи къаршидеш дирес вируси ахIен. ГIяхIти биубцадли адамти шалал дунъяличибадли жявли арбашнира децIигули кьалли.

Ражаб Адамадзиевли ишди кьяркьти анцIбукьуни чехIе­даънира илала, ца шайчибадли, игъбарлизи халбарес вирар. СенахIенну улкализиб кабиркуси гьарил балагардешли поэтла уркIилизи дяхъи бирули бирар. Дявила анцIбукьуназир хакьлис дихути балагь-кьадарли илала уркIилизибра дяхъи калахъунсири.

Ражаб Ражабовичличил рарх «Замана» газетала редакциялизир рузес набра кьадарбиъни нуни игъбарлизи халбирули рирус. Гьайгьайрагу, кIиэсил даршдуслихъ ахирличи бикибси манзиллизиб даргала миллатла рухIлашалси давлали бетаурси газетала редакциялизиб дебали пагьмучебти ва пасихIти журналистуни, поэтуни, писательти бузутири. Дила учительтази халбирули рирус нуни итхIели ну гIерруцибти ва чеббикIибси санигIятличи дила иштяхI имцIабиахъубти газетала бекI редактор ГъазимяхIяммад Юсупов, отделтала заведующийти Запир Харбилов ва Ражаб Адамадзиев. Бархьси саби, ГъазимяхIяммад Юсуповли ва Запир Харбиловли дила учительталацунра ахIи, халати узбала мерра буцибсири. Илдани дурути гIякьлумира насихIятунира дила гIямрулизир ванзалис уркIецIи-ряхIмула кIунтIриван багаладирули сари. Илдани набзи журналистикала «гIилму» дяркъяхъуртири рикIасра, хатIа бетхIерар. Ражаб Адамадзиевли биалли наб творчествола гьунчиб белгиси кумекбирусири. Гьарил дила назму, хабар ва цархIил белкIлис илини лайикьси кьимат бедлугусири ва селичи чекаризес хIяжатлил гIеббурусири.
Гьанна къунздулхъехIе нушала Ражабла сунела гIямруличила ва кьисматличила малхIямли цIуэри чедибурхуси поэзияла ургубакадли:

Учительтас
Ну верхIел дус виубла
ХIебири дила бегIти,
Наб неш-дудешван бири
Лебилра учительти.

Набчи кьакьахIейкIуси
ХIейуб илдазив цалра,
Ил хIекьдеш нуни балас
Някъла тIулбиван шелра.

Дархьли къелдикахъули
ЛукIахъи алипуни,
ХIисабти-суалтала
Абхьиб гIяламатуни.

Дила хъуцIарличи някъ
Кабирхьи дигиличил,
Жавабти кьабулдири
Умути хIяяличил.

ГIур гьунивватурра ну
Дурхъаси хазналичил:
УркIила кадихьили
Диги дарган мезличи.

МяхIячкъалаличила далай
Сецад лерли диалра
Ванзаличир шагьурти,
Чучила тIинтIдиубти
Ахъти дезни, хабурти.

ХIу нушаб ахIерсири
Ва бегIла къугъасири,
Халкьла дигиличибли
Ахъсири, дурхъасири.

Умутли ганзбикIули
Баргилри хIуни игъбар,
Я кабурхуси ахIен
Ил гьунчиб хIела хабар.

БерхIи ряхIмули ухар
ХIела хьанцIа заклизиб,
Бац пахрулизиб бирар
Урмала авидлизиб.

Дила шагьар, гьар бархIи
Къайгъназиб ахъбикIулри,
ХIела халкьлис ва гIяхIлас
Нурли шалабикIулри.

Нешла шала
Гьандиркур наб, гьандиркур
Гьанна гьарахъти дусми,
Бара чIумадирути
ДурхIядешла дуклуми.

ИтхIели дугурбазив
Вашира гузетличи,
ЧебицIахъри сархули
Мискинси яшавлизи.

Нешра узи-рузира
УрцIа-урцIа юртлизиб
Дудеш чархIевхъунсири
Ветахъили дергълизив.

Илхъи тIинтIкабирира
Дубурла бяхIруглизи,
Цацали чиргъми дилши
Шилизир юртаназир.

ЦIябдешлиур детихъи
Шила лерил юртани,
Ванзалис камси шала
Писбири зубартани.

ИлхIели нешли чирагъ
Абулки улкьайлизиб,
ГIянручI дугила нурли
Хьар зак шалабарайчи.

Дагъистайс
Дила лезмилис бегIла
Муриси дев – Дагъистан,
Дила уркIилис бегIла
Дурхъаси дев – Дагъистан.

Наб хIела шурми – арцла,
Дубуртира – мургьила,
ХIела хIуркIби – шарабла,
ГIянжи-къаркъа – чакарла.

ВецIдехI мезла далуйти
ЗайдикIар хIела духIнар,
Халкьла уржибдеш саби
ХIела бегI халал гьунар.

Наб бахъ гIядабли бирар
ХIечивад гьарахъхIели,
Тяп виштIаси хъяшаван,
Нешличи милигхIели.

Назмуличила
Поэт ветаэс или
АхIенри ну лукIуси,
Ветаурли виасли,
Илра ахIен имцIаси.

Ну лукIули вираси
Диги лерхIели лукIес,
Жагаси девлис гIергъи
ХIейрухIели дуцIхIейкIес.

Амма багьаб хилтIикIни
ХIязгъуна анцIбукь саби.
Назму белкIес биалли
Таманси жазаъ саби.

 

ПатIимат Кьурбанова