ГIябдуллаева ГIяшура Гъазиевна акIубси сари 1958 ибил дуслизир МухIела шилизир хIурматла хъалибарглизир. ГIяшура Гъазиевна МухIела шилизибси урга даражала школализир гехIел класс тамандарили, Избербаш шагьарлизибси педагогический училищелизи карерхур.
1978 ибил дуслизиб педучилище таманбарили, сунела бузерила гьуни бехIбихьиб Узнимахьила урга даражала школализир бехIбихьудла классунас дурсри кадирхьули.
Касибси санигIятлис марси, сунечи хъарси хIянчи жавабкардешличил бекIбирули, дурхIначи дигичерли, бучIантази багьуди касахъес къайгъилизир ГIяшура ГIябдуллаева вецIал дус бехIбихьудла классунала бучIантас дурсри кадирхьули калун.
ГIяшура Гъазиевнани сунела чебяхIси даражала багьуди касес кьасбариб ва Дагъиста пачалихъла пединститутла заочное отделениелизи карерхур. 1988 ибил дуслизиб пединститутла филологияла факультет таманбарили, сунела бузерила гьуни даимбариб урус мезла ва литературала дурсри кадирхьули.
БусягIятра ГIяшура Гъазиевна рузули сари Узнимахьила урга даражала школализир, урус мезла ва литературала дурсри кадирхьули, илала лебилра бузерила стаж абикили саби 47 дусличи гъамли.
Ил дахъал дусмазиб дурхIнас гIяхIси бяркъ бедес, илдази багьуди касахъес бажардилизир рузули, хIялалси бузери барнилис чумал шабагъатличи лайикьрикили сари. Ишдусра конференцияличир ГIяшура Гъазиевна «Ахъушала район» МО-ла администрацияла шайзирад ХIурматла Грамоталичилра шабагъатларариб.
Илини гIямрула вархкьячил барх хIябал дурхIя абикьур, гIяхIси бяркъра бедили, гIямрула гьунчи дураиб.
Гьанна биалли илдачибад акIубти абикьахъесра къайгъилизир сари.
Дигутани разирирули, гIямрулизир ва бузерилизир гьарбизуни имцIадикIули хIерриэс кьадарбиаб хIед, ГIяшура Гъазиевна!
Сабият ГIябдуллаева
