Ахъушала районна Цергимахьилизивадси МяхIяммадов ГIябдуллагь БяхIяндхIяжиевич 1951 ибил дуслизив хIурматла хъалибарглизив акIубси сай.
Школа таманбарибхIели ВатIайс къуллукъбирули калун. ГIярмиялизивад чарухъи гIергъи Хасавюрт шагьарлизибси педагогический техникум таманбариб. Сунела бузерила гьуни даимбирули, чумал хIянчиличив узули калун: Ставропольла крайла совхозлизив шин дихуси машиналичив шоферли 13 дус узусири. Илкьяйда Ахъушала урга даражала кIиибил школализивра учительли узиб, Райполизив, санэпидстанциялизив ва финотделла шоферли. Гьанна биалли Ургубамахьила урга даражала школализив 29 дус физкультурала учительли узули сай. Илала хIялалси бузерила стаж 45 дусличибра имцIали саби.
ГIябдуллагь МяхIяммадовли физкультурала дурсри дирес вехIихьибхIейчивад Ургубамахьила школализиб бучIути дурхIни спортла шайчиб гIяхIцад гьалабяхI арбякьун. ДурхIназир спортличи диги акIахъес багьандан, ГIябдуллагь халаси къайгъилизив сай. СенахIенну спортличи диги биалли, челябкьлализибра ил дурхIнас манпагIятсили бирар, арадешлизир нукьсандешуни хIедирар, вайти хасиятуназибад уббулхъан. Илини руркъути дурхIни имцIаливан футболла шайчиб гьалабяхI арбякьи саби. Районна духIнар ва районти-ургар детурхути футболла хIязаназир илдани гьаларти мерани кайсули сари. ДурхIналара гъира имцIабирули саби, гьаларти мераначи лайикьбикалли, чула учительли гIеббурцухIели, спортличи иштяхIра алкIахъухIели.
Сунечи хъарси хIянчи жавабкардешличил даимбируси ГIябдуллагь МяхIяммадов гьар шайчивад пагьмучевси адам сай. Ядро иргьнила шайчир Дербент шагьарлизиб бетерхурси Дагъиста Чемпионатличив ил кIиибил мерличи лайикьвикибсири. Илини дурхIнира спортла илгъуна жураличира бурсибиахъес руркъули сай.
Ургубамахьила урга даражала школала директор ГIябдулла ГIисаевра дебали гапикIули сай ГIябдуллагь МяхIяммадовличила. Школала гIямрулизир жигарла бутIакьяндеш дирули, дурхIнас бяркъ бедес, бархьси гьунчибад чебхIебалкIахъес, спортличи диги имцIадиахъес узули сай или. Сунечил барх бузути педагогунала, бучIантала, Ургубамахьила ва сай хIерируси Цергимахьила халкьла ургаб халаси хIурмат сархили сай. «Халкьлис манпагIятвиэс, дигичевли, сунени вирусигъуна гIяхIдеш бирес къайгъиличил хIерирули, гIямру дуркIули сай», – бурули сай школала директорли.
ГIябдуллагь МяхIяммадовли сунела гIямрула рархкьячил барх урегал урши-рурси абикьурли, илдас гIяхIси бяркъра бедили, гIямрула гьунчи дураили сай. Гьанна илдачибад акIубтира леб 18 дурхIя, илдасра гIяхIси бяркъ бедес, багьуди касахъес, спортличи диги биахъес къайгъилизив сай.
ГIябдуллагь МяхIяммадов чумал ХIурматла Грамоталичил шабагъатлаварили сай. Ишдус Ахъушала шила культурала КIялгIялизиб бетерхурси августла конференцияличивра ГIябдуллагь БяхIяндхIяжиевич «Ахъушала район» МО-ла администрацияла шайзивад ХIурматла Грамоталичил шабагъатлавариб.
Гьаннала гIергъира имцIадикIаб шабагъатунира, бузерилизир ва гIямрулизир сархибдешунира! Сунела дурхIнани ва илдачибад акIубтани разивирули хIериэс кьадарбиаб!
С.ГIябдуллаева
