Хизриев Имамутин ГIямарович акIубсири 1985 ибил дуслизив ХIинтIала шилизив хIурматла, бахъал дурхIнала хъалибарглизив.
Имамутинна бегIти Хамисли ва ГIямарли илис гIяхIси бяркъра бедили, халкьла хIурматбирахъес бурсиварили, гъабзадешчевси, ВатIайчи дигичевси урши айкьур. Имамутинна неш Хамис ГIяхIмадовани школализир учительницали рузули гIямру дурхIнас хасдарибти сари.
ГIяхIгъабза урши Имамутин урга даражала школа таманбарили гIергъи ВатIайс къуллукъбарес арякьунсири. Мардешличил ВатIа гьалабси сунела чебла ахъили хъули чарухъун ва гIур Имамутинни сунела гIямру дявила санигIятлис хасдарес кьасбарили, Россияла Федерацияла Оборонала Министерстволичил вягIда къулбасбариб. ГIур биалли, ил Каспийск шагьарлизибси 87852 ибил дявила частьлизив рядовой матрос сайри. Дявила хасси балбуц бехIбихьили гIергъи илизир бутIакьяндеш дарес арякьунсири.
2023 ибил дусла январьличив ВатIа хъархIерагардеш батахъес, дявила хъарбаркь таманбирули, халкьла челябкьла даршуси биахъес багьандан, гъабзадешличил ургъули, сунела гIямру кьурбандариб.
Имамутин ГIямарович гIямрулизивад арякьи гIергъи 2023 ибил дусла июльла 12-личиб «Ахъушала район» МО-ла администрацияла бекI МяхIяч ГIябдулкаримовли, Сергокъалала ва Ахъушала районтала дявила комиссар Шамил Чупалаевли илала гIямрула рархкья ПатIимат ГIяхIмадовази «Гъабзадешла орден» бедибсири.
Имамутинна хIябал дурхIя ЖумягI, Ислам ва Зайнаб цIуръабиуб, ПатIиматла някъбачи хъарбикиб. ДурхIни абикьахъес хала бегIтанира кумебирули саби, пачалихъла шайзибадра леб кумек.
Имамутинна хъалибаргличи районна администрацияла ва ХIинтIала шила бекIла къуллукъуни заманалис дузахъуси Зубайдат БяхIмудкьадиевала шайзибад халаси пикри бяхIчииули саби. 2023 ибил дусла июль базличиб Имамутинна бегIтачил «Ахъушала район» МО-ла администрацияла бекIла заместительли узули калунси МяхIяммад ИсмягIиловра, жагьилтала политикала ва спортла управлениела цархIилти жавабла хIянчизартира гьунибаибтири. Чула уршила чIумадеш ва гъабзадеш гапдарили, бегIтази ил агарвиънила децI багьахъур, сегъуна-биалра масъала дакIубухъалли, районна администрациялизи дугьабизахъес хъарбариб.
ХIинтIала шила администрацияла мякьлаб леб Имамутин ГIямаровичлис хасбарибси хъумхIертнила уркьулира, сай хIерирули калунси кьакьалис «Хизриевла кьакьа» ибси ура бедили саби.
Аллагьли Имамутинна бегIтас, хъалибарглис сабурра арадешра дедаб, илала ва лебталалра дурхIнас даршуси челябкьла бетаахъаб!
Иш белкI хIядурбарахъес баянти ва сурат дархьили, кумекбарибси ХIинтIала шила администрацияла къуллукъуни заманалис дузахъуси БяхIмудкьадиева Зубайдат Жалаловнас баркалла багьахъес дигулра.
Зубайдат БяхIмудкьадиевани СВО-ла бутIакьянчибас ва илдала хъалибаргунас, дурхIнас кумек гIеббиахъули рирар. ХIинтIала шила халкьличил дарх дучили, СВО-лизи кумеклис дахъал секIал дурхьули сари: ванати палтар, дабруми, муридешуни ва цархIилтира дявила авлахъличир бургъантас манпагIятдиэсти ваяхI. СВО-ла бутIакьянчибала дурхIначи савгъатунира дихули рашули сари.
СВО-ла бутIакьянчибас, нушала улкала бургъантас чедибдеш сархахъес пай кабирхьнилис, Ахъушала районнизибти шимала бурги ва цархIилтира жавабла хIянчизарти «Память гор» бикIуси ДРОО-ла ва СВО-ла ветерантала Ассоциацияла шайзибад Баркаллала кагъуртачи лайикьбикили саби. Илди-ургар лер Зубайдат Жалаловнара. Зубайдат БяхIмудкьадиева Ахъушала районна хьунул адамтала Советла членра сари. Ил багьандан ил хьунул адамтала Советли СВО-ла бургъантас дархьес дурчути кумекуни дархьесра цархIилтачил рархриркули сари. Гьаннала гIергъира районна ва ХIинтIала шила гIямрулизир жигарла бутIакьяндеш дирахъес арадеш бираб Зубайдатлис!
СВО-ла хасси анцIбукьра жяв-жявли ахирличи бикили, нушала улкали чедибдешра сархили, чула бегIтачи, хъалибаргуначи, дурхIначи ара-сагъли чарбухъаб гъабзадешчебти бургъанти. Арадешлизир нукьсандешуни детааллира, илди анцIбукьуназибад бургъанти мицIирли чарбухъалли, Аллагьличи шукру викIесли саби.