Иш макьала белкIес или ну вахъхIи пикриикIусири. Ахирра-ахир белкIунра. Нуни лукIуси макьалала игит сай даргантала къакъбяхъ, Дагъистайзив ва лебилра Россиялизив урибси адам, ДГУ-ла Дагъиста мезанала кафедрала заведующий, Дагъиста писательтала Союзла даргала секцияла руководитель, филологияла гIилмуртала доктор, Дагъиста халкьла писатель Расул БяхIяммадовла урши Муса Расулович БяхIяммадов.
Муса Расуловичличила, ва илала гIямруличила вахъхIи гъайикIес вирар. СенкIун илини дунъяличиб хIебяркъурси гIямзира агара. Ил хIелуси адамра агара.
Муса Расулович БяхIяммадов акIубси сай 1961 ибил дусла майла 5-личив Дахадаевла районна Меусишала шилизив, гIядатла учительла хъалибарглизив.
1979 ибил дуслизив Меусишала урга даражала школа таманаили гIергъи, илини сунела дудешла дякь чеббикIиб. Муса Дагъиста пачалихъла университетлизи керхур. 1984 ибил дуслизиб илини филологияла факультет хIунтIена дипломличил хъараахъур.
Сунела шилизи чарухъун, ва илав дарган мезла ва литературала, урус мезла ва литературала учительли (1984-1989-ибти дусмазив) узули калун, 1990-2005-ибти дусмазив биалли ГI.Г.Тахо-Годила уличилси педагогикала гIилмула-ахтардила институтла гIилмула хIянчизарли, 2000-ибил дусличивад ДГУ-лизив преподавательли узес вехIихьибсири. 2002-ибил дусличивад кафедрала доцент ветаур, 2013 ибил дусличивад ишбархIиличи бикайчи Дагъиста мезанала кафедрала заведующий сай.
М.БяхIяммадовла цаибил белкI дурабухъунсири 1977 ибил дуслизиб «Ленинна байрахъ» газетализиб. ГIур илала даршличирра имцIали очерк, макьала дурадухъунтири. Муса Расуловичли сунела цаибил макьала дурабухъниличила ва ил селичиларил нушазира хабурти дуриб.
2002-ибил дуслизиб М.БяхIяммадовла «Даргала халкьла мухIлила пагьму» бикIуси жуз дурабухъун. Ил халкьла мухIлила пагьму руркъес студентли левалли вехIихьибсири.
Муса БяхIяммадов дарган мезла учебникунала, литературала учебник-хрестоматиябала, дарган мез ва литература руркънила масъултас хасдарибти гIяхIцад жузала авторра сай. Илала гIилмулашалти пикруми-кьасанала бетуц — Дагъиста халкьанала ва мер-мусала хасти уми, дарган мезла ва литературала теория ва методика руркъниличил бархбасунси саби. Илала кIидаршличирра имцIали жуз дурадухъун. Илдазирад дайхъала, дурала улкназир дурадухъунтири.
2017 ибил дуслизиб М.БяхIяммадовли «Лотос» издательстволизиб «Даргала поэзияла антология» дураиб. Илини хIядурдарибти сари «Северный Кавказла халкьанала литературала Антология. Поэзия. Проза». «Россияла халкьанала ишхIелла литература. Антология. Поэзия, Проза, Драматургия. ДурхIнала литература. Художественная публицистика» ва цархIилтира.
М.Р.БяхIяммадов Дагъиста урибси учитель, Россияла писательтала Союзла член, РФ-ла багьудила ХIурматла хIянчизар, ва Бузерила ветеран сай.
Дахъал миллатунар Россияла ишхIелла литературализи лайикьси пай кабихьни багьандан, 2021 ибил дуслизив ил РФ-ла писательтала Союзла ХIурматла Грамоталичил шабагъатлавариб.
Илкьяйдали Муса Расуловичла жузачила, шабагъатуначила гъайикIалли, вахъхIи кавлан. СенахIенну илала илди дахъал сари.
ЦацахIели гьанбиркур, Дагъистайзив чилра левара ил хIелуси или. М.БяхIяммадовли даргантала культурала гIямрулизирцун ахIенну, лебил Дагъиста литературала ва культурала шайчирти гьунибаънибачир, конференциябачир бутIакьяндеш дирути сари.
Муса Расуловичли сай дурала пачалихъунази вашухIели, диубти, дакьибти хабурти дурули вирар. Нушара илала хабуртачи иштяхIличил лехIирхъули дирехIе.
Муса Расулович малхIямси, разиси, уркIи гьаргси адам сайливан лебтанилра вала. Илала кумекличибли ДГУ-ла филологияла факультетлизибад бахъал даргала ва цархIилти миллатунала поэтуни, писательти, журналистуни, бурибти учительти дурабухъун. ХIера, ишдусра илдигъунти-ургав жагьил журналист Рабадан БяхIяммадовра леври.
Муса Расуловичли сунени бучIахъути студентуназир даргантала культураличи, тарихличи, литератураличи иштяхI алкIахъули сай. Илини студентуни даргала ва цархIилти миллатунала хIурматла адамтачил тянишбиру. Илдачил барх литературала конференцияби дурадуркIу.
Сунезибад сегъуна-биалра кумек хIяжатбикалли, бегI гьалав музаулхъан. Сунела лебсигъуна материал луга. Рахли илгъуна хIебиалли, чинабад касес вирусил гIеббуру.
Ну ЧевяхIсилис ва дила дудешлис халаси баркалла викIулра, илгъуна адамличил тянишварнилис. Илкьяйдали сунесра баркалла викIулра, ну машгьурвиахънилис, даргала ва цархIилти миллатунала хIурматла адамтачил тянишварнилис.
ЛукIес ибси пикрира агарсири набзиб, се-биалра белкIес вирус или гьанбиркуси ахIенри, Муса Расуловичли биалли, дила имканти чедаиб ва илди гьаргдарахъес кумекбариб.
Дила пикрили, илгъуна адам бегIлара халаси уличи лайикьси сай. ДугIлис ахIен илис дудешгъуна сай бикIути.
ХIурматла Муса Расулович, хIед халаси баркалла балахъулра, хIуни студентунас бедлугуси бяркълис, наб гьаргбарибси сагаси дунъялис. Гьар хIечи дугьавилзуси замана хIуни ну бацIси жавабличил ватурси ахIенра. Дила шайзибад ва дила хъалибаргла шайзибад гьатIира халаси баркалла биаб хIед. Илкьяйдали баркалла хIу набчи вирхнилис. Нуни кьасбирис хIуни набзи чебаахъибси гьунчивад чевхIелкIес, хIела у чихъли бихес.
МяхIяммадшапи Матаев
