ТIабигIятли сунела жагадешуни гьаладирхьути адамти разибиахъес сари или гьанбиркур. ЧIянкIли адамтани илдас кьимат бедес багьалли. Амма тIабигIятлис ва илини дусла авалра манзиллизир алкIахъути тамашала бетуцунас кьимат бедесра гьамадси ахIен. СенахIенну илала дахъал шаликардеш ва жагадеш сипатдаресцад дугьби даргес ахърихIебикIур.
Дубуртазиб бегIлара жагаси манзил дуцIрумлизиб бирар. Майдунти вава-кьарла кьалтинтани дуцибхIели, жявли дилкьути цIедешли галгуби жагадарили, урунжунани шурмазирадли шараб гердухъахъунхIели, арцантани гьар журала макьамтачил ванза хIулбукIахъибхIели,… чебаиэс хIябилра тIягIямли бирар. Илгъуна тIягIям касес бахъхIи хьулбикIутири «Даргала анкъила» узби-рузби. Ахирра Сергокъалала районна ГIяямахьи бикIуси шила («ГIвяя») мер-муса чердикIиб илдани.
Ил шилизиб даргала литературала классик ГIямарла Батирайла хIяб лебни багьанданра гьарил дарганна уркIи ила битIикIули бирар. «Даргала анкъила» вакилтира бегI гьалаб чус дигуси шягIирла хIябличи бякьун.
Агь, вегIебш, сецад пагьмучевси виалра адам сеннира ванзали сунечи жихIерили валтули уили ахIен. Поэтла хIяблис гьарахъли ахIи арцантани чуласун макьамти каилри. ГIяхIил лехIизалли, цацадехIти шадли дучIулри. Илдани шягIирла далуйти тикрардирули дурги. Итдилтани марайти тIамри дурадиркахъулри. Илди чевяхIси поэтли шалал дунъя батурхIейчирадли дисутигъунтири. Гьайгьай, Батирайла цIелдаличи хIерикIухIели, илала дубурла талхъан – чIакалагъунти супилтачилси къугъаси сипат гьалабилзулри ва илини салам лугусиван билзулри. Белики, илини балули урги сунечи адамтани гьуни хъумхIертни…
Шиличибадли гьарахъли ахIи, жагаси вацIала дублаб анкъилантани урдубяхъиб. Шайчивадли хIерикIухIели, барх халакабаибти, берхъибси хъалибаргла члентачи мешулири илди. «Узи», «рузи» или дугьабилзути саби илди цаличи ца кьукья акIахъубхIейчибадли. Илкьяйдали бегIла гIергъи анкъилизи «абацIибтира» «делхIунраяв, узби ва рузби» или дугьабилзути саби. Илгъуна гьарли-марси уржибдешличиб жагаси гIур се биэс бирара декIар-декIарти шимала ва дусмала адамти-ургаб.
Адамтази къугъали бамсриахъахъес багьандан илар гьарил секIал хIядурлири. Кабиэс бурхличилси жагаси мер, хинкIи, шашликуни, чяй ва цархIилти берклуми дарести, бамсриахъести мерани лер илар.
Адамти цалабикили, яхши-хушлис гIергъи, бусягIятал берклуми дирес бехIбихьиб. Стол-алав анкъиланти кабиэс балкьхIеурли лебалли, столличир ванати чудни, дуцIарти чяй, цIедеш ва жура-журала деркести дакIудариб. Жагьилтани сакIубли хурегуни дирулри, гьести гIямрула адамти биалли, уркIи гьаргси ихтилатлизи ахъилри. ЦабехIли вацIализирадли дерубти урцул дихулри, цархIилтани хинкIи дирулри, хIябэстани шашликуни дуцIахъулри…
ЗайдикIулри музыка, далуйти, дукелцIи… Бемжурлири шадлихъ тIабигIятла «рестораннизиб». Бархьаначи буралли, илгъуна «ресторан» цалра улкализиб яра шагьарлизиб хIебирар. Вава-кьарла кьалтинничи тIинтIкабиубли бамсриихъули, далай-делхъла агурбани алавла булхIехъули, азир журала берклумачилси давлачебси кьумур-алав кабиили, масхурти, ихтилатуни, назмурти зайдикIахъули, батбухъири анкъила узби-рузби.
Машгьурти даргала гIяртистуни МяхIяммадкьади БяхIмудов, Зугьра Мажидова, БяхIмуд, Раисат, Майсарат… яргали дурабухъи, далайбикIулри. Урга-ургади делхъла агурби зайдухъалри, уржили булхъес дурабулхъулри къугъаси мявализи.
Диркьбикличиб волейболли биркьести имканти лерхIели, жагьилти илаб абзлизи кабилзулри. Иларадлира разити дукелцIила ва масхуртала тIамри чедихулри.
Ил бархIи дураберкIибси «Даргала анкъила» узби-рузбала лебгIеб пергерси шадлихъличила гIядатла дугьбачил сипатбарес яра аргъахъес хIейрар. Илцадра балбикили ва цали ца гIеббурцули бетурхуси балбуц гьала-гьала сегъуналра хIядурдеш хIебарили дураберкIибси саби викIалра вирхаэсли ахIенри.
ГIяямахьилизиб хIербирути адамти бархли, далай-делхъла агурби чедихухIели нушачил разидеш бутIес бакIиб.
— ДекIар-декIарти пагьмуртани машгьурбарибти адамтани илгъуна къугъаси авид акIахъублираягу, — бикIулри илди, — секьяйда хIушачил вархикес вируси? ХIуша мугIяллимти, поэтуни, писательти, журналистуни, далайчиби, музыкантуни ва цархIилти хIурматла санигIятуни дузахъути адамти саррая. Нушанира балусигъуна пагь чебаахъес дирехIегу. Нушабра хIушачил мурталра дарх дирес дигулрагу, кумекбарая…
Бархьси саби, чис дигаллира анкъилантачил вархикес, разидешличил кьабулвируси сай или багьахъурра нушанира илдази.
Шадси манзил жявли шалгIеббулхъан бикIули бирар халкьлизиб. Ил бархIира шакалра хIедикили, ахирличи бикиб. Амма цIяббирескабиили биалра, хъули укьес дигуси аги. Бахъ къугъаси авид бехъахъес чисалра дигули ахIенри. Сепайда, гьарилла хъулиб хъалибаргуни, гIергъила бархIи савлиличирад хIянчила мерани хIерлири. Ахъси гьавличил ва разити хIяланачил лебилра анкъиланти хъули чарбухъун. Амма илдазивадли гьарил илгъуна шадлихъ гьатIира мурт дураберкIес бетаэсара или пикрибикIулри…
Тамара ГIябдусалимова
