ГIергъиси замана нушала улкализибси аги дебали барс­биубли саби. 40 дус­ли­чиб­ра имцIали биубти адамтас СССР-ла улкала манзиллизибра хIербиэс им­кан­­­ба­кI­иб­сири. Амма чис гьан­бир­ку­сири ха­ласи ва давлачебси пачалихъ тIу­тIу­би­рар или.

Сен-биалра, социализмала замана, адамлис хIянчи, хIериахъес хъали пачалихъли дедлугутири. Багьуди ва медицина матъал дирутири. Кам-гьамли рушбат бедлугути анцIбукьунира къаршидиркули дурги, амма гьаннаван рушбат гIямрула ца бутIали бетаурси ахIенри. Гьанна жагьси адамли гьамадли хIянчи баргес вирули ахIен. Ишар гъай сунела уркIилис дигуси ва сунела иштяхI лебси хIянчиличила сари.

Багьуди касесра гьамадли ахIен. Арцлис дурхIни бучIахъес багьандан уюнти шикьдарес аварализибтира леб. Иш­бархIи замана дебали хъярхъти, бекI бузути, сегъуна-дигара масъала бекIбарес бирутала манзил саби. Амма нушала я белчIудила заведениеби, я бегIти, илгъуна манзилла тIалабуни детурхахъули, дурхIни хIядурбарес бажардибиркули ахIен. Багьудила бетуц ит СССР-ла манзилличи мешубиркули саби, тIалабуни ва имтихIянти биалли — сагаси жураличи душили сари. ХIердизирая ЕГЭ-личи. АрагIебси пикри хIясибли, ил вайсира ахIен. Амма ил имтихIяйзиб хIед «гьуни» белгибарили саби, чIянкIли чумал журала жавабти дедес чебиркур, илдазибад — бархьси чеббикIили. ВегIла пикри бурес, цархIил журали жаваб чарбатес имкан агара. Буралли, вегIла дагьрилис гьуни агара. МугIяллимла ва школала учIанна имтихIяйчиб «бархбасра» агара. Учительли вирусири белгибарес: чеимцIати суалти дедлугули, дурхIяли суаллис жаваб балулил, ахIенал. ИшбархIи имцIадирули сари онлайн тяхIярла дурсри. ЦацадехIти анцIбукьуназир, илди ИИ-ли (искусственный интеллект) кадирхьули сари.

Нуни белчIудиличила гъай хIязлис ахIен ахъдуцибти. Иличил чIумали бархбасунси саби челябкьлара. Багьуди агарси адам вайнукьабас чула арилизив вихIес гьамадси сай. ХIязлис ахIенгу бикIути – пачалихъ тIутIубарес гIярмиялицун ахIенну, бухIнабадра вируси сай или: агарбара илдала багьуди ва медицина. Ца гIяхIдеш, нушала улкализиб гьачамлис вегIлис дигусигъуна багьуди касес вирули сай. Вирули сай белчIудила заведениера чеббикIес. ЖагIял нушала дурхIнала дурхIнала илгъуна ахъри хIебиэсра асубирар.

Иш макьала белкIес дила пикри акIубсири нушала шилизиб 30 дусличиб имцIали биубти, амма хъайчикахIебиибти, бахъал жагьилти чебиухIели. Ил масъала нушала мижитлизиб шила имамлира ахъбуцибсири. Нура иличил ил масъалала чевкад гъайикIули калунра. МяхIяммад Итоновла гъай хIясибли, нушала жамигIят­ли­зиб хъали-цIа алкIахъниличи пикри барскабиубли саби. ИмцIаливан мекъ бирнила бархIиличи.

– БегIти ишбархIи бусурман адамличи хъарси тяхIярли дурхIя хъайчикатес пик­рибикIули ахIенну, чула «ахъри» чебаахъес гьуцIлизиб саби. «ЭГО» гьалабухъи саби нушала адамтала. Мекъ ишбархIи абз­личи ласбухъи саби: чили жагаси ва дурхъаси сяхIбат дураберкIес бирарал. ХIердизирая хIуша сегъунти ваяхI ва палтар архулил цIикурлис? Селис? Лебсив иличи хIяжатдеш? – суалвикIули сай имам. – Нушани нушала хъулир дузахъулира гIядатлати кьям-кIуцIул, дусмадли илди пайдаладирулра. ХIердизирая, цIикурлис 200-300 азирла сервиз исули саби. ХIечиб дурхъатив хIела дурхIни? Нушала диннизиб бегIти дурхъали чебиути саби дурхIначиб.

Марлира, нушала адамтани чула лебдеш бедили, цархIилти анцIбукьуназиб ижаралис арц сасили, цIикурлис ваяхI исули сари. БархIиличи-бархIи адамтала тIалабуни дахъдикIули сари. ИшбархIи нушала шилизир дегIлара камли гелешмешлис 500 азир къурушцун дедлугули сари, цархIилти секIал хIисаблизи кахIесаллира. Ягъари, гьарил адамли илди тIалабуни детерхахъес вирули ахIен. Пикриухъалли, дусмадли узули цахIнабяхъибси лебдеш хIуни дурхIялис (рурсилис — ишарра харжани камти ахIен) мекълис харждирулри. Рахли хIела чумал дурхIя лебли биалли, се бируси, гьатIи? Яра, чумал базли, дусли хъали-цIа ихъули сари. ИлхIели се бируси? ХIурматла адамти, мекъ барес, ил лебтазилра чебаахъес, хIела давла ва ахъри гьа­ладихьес гьуцIхIедикIули, хIушала дурхI­ни хъалибаргла «дурхъадешличи» бур­сибарая.

– Нушала адамти «хIейрусирав нуни дила дурхIялис дурхъаси мекъ барес» или бикIули саби. Юх, вирулри. Иличибли хIуни чизи се кабизахъес дигулри? Чумал бархIили хIела мекъличила адамтани гьанхIебиркахъугу. ХIядислизиб белкIи саби: «Сунела баракатлизиб бегIлара дурхъаси никяхI саби камси харж дураберкIибси», – викIули сай МяхIяммад Итонов нушала ихтилатлизив. – ХIебиалли, нушала динна, шаригIятла тIалабуначи хъарахъили, хIердиэс хIяжатли саби нушаб. Нушала Идбагли (с.гI.в) сунела рурси редлугухIели, 400 дирхамла магьар сабри сасибси. Ил дебали камси багьа сабри ит манзил. ИшбархIи мекъ индустрияличи ласбухъи саби. ХIердизирая нушала шими-шагьуртазир мекълис хасдарибти сегъунти тукенти ва салонти дакIудиублил. Мекъ бируси саби адамли сагаси хъалибарг акIни багьахъес багьандан, сунела лебдеш чебаахъес ахIенну. ИшбархIи чум жагьил леба, мекъ барес ахъри агарли, хъайчикахIебирути? Адамтани дакIударибти тIалабуни ахъес хIебирули. Чебла саби дурхIя заманаличив хъайчикатни. Нушала диннизир гьаладихьибти тIалабуни детурхахъалли, мекъ баресра дебали гьамадси саби.

Нуни чумра жагьиллизи хьарбаира сен хъай­чи­кахIебирули или. Жавабти декIар-декIарти сарри. Амма ицIаливан – мекъ барили, хъалибарг гIеббуцес ахъри агара – илгъуна сабри жаваб. ИшбархIи рурсбалара тIалабуни дахъдикIули сари. Дигули саби дурхъаси кухня, хъулир шин, дурхъаси машина, телефон (илхIелира айфон бегIла гIергъиси)… Ил сабив рурсила багьа? Рирцусив хIуни хIела рурси? ГIур нуша, дурхIнала хъали бехъалли, зигардикIулра. Илкьяйда хIебирару, рурсили хурег барес балули хIериалли, хъали-цIализиб умудеш гIебхIебурцалли, хIери баайчи русули ва мурталра телефоннизир риалли. Се рируси илгъуна хьунул? Рурсбас хабарлизибван хIербиэс дигули саби. Уршбасра жагати куц-кабизла, духути, чули бурибси гъай иргъути ва итмаданал бетерхахъес къайгъичебти рурсби дигули саби. Амма, хIурматла уршби ва рурсби, гIямру сихIрула хабарличи шурдатес хIушала сабигу ахъри. Хъалибарг цали цала хIурматбирули бетаруси саби, иличила сеналра хъуммартидая.

Наб ил шайчибси цагьатIи адамла пикри багьес дигиаур. ИшбархIи жамигIятла ца бутIализи кабурхули саби психологуни. Мя­хIячкъала шагьарлизирси ил шайчир рузуси специалист сари Ева Акаразуева. Нуни илизи тиладибарибсири сунела пикри бурахъес.

– Ишаб бекIлибиубси урехи саби. Чула ургар (хъалибаргла духIнар) далагардешуни дирар. Леб пикрибикIути ит набчи кьабулхIериркур или, гIелум­билзути. Леб чула бегIтала хатIа тикрарбарес хIейгули мекъ хIебирутира. Балуливан, декIар-декIарти хъалибаргуни лерти сари. ЦагьатIи ишгъуна зугIяла биэсра асубирар – сунес зина (измена) биру или урухкIутира, – бурули сари психологли. – Халаси мер бурцули саби лебдешла масъалалира. Хьунул адамла пикрумала дайлаб бирар сунела дурхIни бекIахъудилизиб хIяжатбиркуси масличил гIеббуцнила. Ил багьандан илди хIерли саби давлачевси, гIяхIси хIянчила вегI гелешмешличи. Ишгъуна секIалра бурес рирус, мекъ барайчи хъалибарг сегъуна биэс хIяжатси ибти пикруми (чули чус суратдарибти) гIядатлизир тIутIудирули сари. Илди сари гьар бархIила хъали-цIализирти масъулти, вяшатIала, чула гьарилличи хасси хасият. Илди дахъал сари, чумал девлизир дуресра гьамадли ахIен.

Дила пикрили, бекIлидиубти масъултазибад цали бетарули саби ишбархIила жагьилтала жагIялла бархIиличи умут агнира. Секьяйда яшавличил хъалибарг гIеббурцуси ибси суал алкIули саби бахъалгъунтала. Пачалихъли жагьси хъалибарг гIеббуцес ибти программаби алкIахъули сари, хьулчилибиубси масъала, дила пикрили – илди гIямрулизир детерхахъни.

Руслан Ражабов