МухIела шила адми­нистрацияла бекI­ла заместитель Чупа­но­ва ГIяйшат БяхIяммаевна ва ХIин­тIала шила бекIла къул­лукъуни заманалис дузахъуси БяхI­муд­кьадиева Зубайдат Жала­лов­на бар­каллаличи ва халаси хIурмат­ли­чи лайикьбикили саби, илдани ду­чили СВО-ла бутIакьянчибас да­хъал кумекуни дурхьни багьан­дан­ра.
СВО-лизир дявила авлахъличир бургъантас дахъал сари гIягIнити ваяхI: ванати палтар, дабруми, продуктуни, берк-берж, умудеш бирес гIягIнити ваяхI, хандакьуназир хIяжатдиркути кIатIни ва гIурра дахъал жура-журала секIал.
ГIяйшат Чупановала бузерила гьуни бехIбихьибсири МухIела С.Кьурбановла уличилси совхозлизир бухгалтерли рузули. Шила ад­министрациялизибси хIян­чи­ли­чи шуррухъунсири 1986 ибил дуслизир. ИлхIейчирад шантала баркаллара сархили, сунечи хъарси хIянчира чебетаахъили таманбирули рузуси хIянчизарцунра ахIенну, ГIяйшат сабурличил дурхI­­ни абикьурси хьунул адамра сари.
ГIяйшатла леб кIел рурсира ца уршира. Халалгъуна рурси Хасу МяхIячкъалализир правовая академиялизир рузули сари. Урши Заур ШяхIбанович районна больницала бегIлара чебетаибти, чула санигIятлизир мурхьти багьудлуми касибти тухтуртазивад ца сай. Рурси Зумруд ШяхIбановна Англияла мезла дурсри кадирхьуси учительница сари, Ахъушала районнизибси «Память гор» бикIуси ДРОО-ла Ассоциацияла сопредседательра сари, Ахъушала районна хьунул адамтала Советла председательла заместительра сари, СВО-лизив гъабзадешличил ургъули гIямру кьурбандарибси Ханпаша ГIябдуллаевла дурхIнала нешра сари.
Зубайдат БяхIмудкьадиевани 1985 ибил дуслизиб ХIинтIала шилизибси урга даражала школа таманбарили, сунела бузерила гьуни бехIбихьиб шилизибси колхозлизир рузули. КIел дусла гIергъи, 1987 ибил дуслизир ХIинтIала шила Советла секретарь рарибсири.
Зубайдат Жалаловна жавабкардешличил рузули, сунечи хъарси хIянчи чебетаахъили даимбирнилис 1993-ибил дуслизир ХIинтIала шила бекIла заместительла къуллукъличи каратур. Сунечи хъарси хIянчи бирес ил ункъли бажардириркули, илхIейчирад гьаннара ХIинтIала шила администрациялизир рузули сари. 2022 ибил дусличирад ХIинтIала шила бекIла къуллукъуни заманалис дузахъули сари. Ил къул­лукъличирра Зубайдат БяхI­муд­кьадиева царх­Iилтас гIибратли ретаурли, бажардириркули сари.
Зубайдат Жалаловнани кIел дурхIя абикьур: ПатIимат ва Мя­хIям­мад ДинмяхIям­мадов­хъали, гIяхIси бяркъра бедили, педагогла чебяхIси даражала багьудира касахъили саби. Гьанна илдачибад акIубти абикьахъесра кумекбирули сари.
2005-ибил дуслизир Зубайдат БяхIмудкьадиевани Дагъиста пачалихъла педуниверситетла Юриспруденция бикIуси факультетра таманбарили, чебяхIси даражала багьуди касиб.
ГIяйшат Чупанова ва Зубайдат БяхIмудкьадиева Ахъушала районна «Память гор» бикIуси ДРОО-ла ва СВО-ла бутIакьянчибала ва ветерантала Ассоциацияла шайзибад Баркаллала кагъуртачи лайикьбикили саби.
Илди кIелра хIурматла хIянчизар Ахъушала районна хьунул адамтала Советла члентира саби. Ил Советла шайзирадра дучили дахъал ваяхI дурхьули саби СВО-лизибти бургъантас. Илдани чучи хъарси хIянчи чебетаахъили таманбирули, чула шимала халкь-ургаб хIурмат сархили саби. Хьунул адамтас шимала администрациябазиб бузес гьамадли хIебургар, сенахIенну, шила халкьла-ургар дахъал сари алкIути суалти, гьарил чучи дугьавизурси адамла къуллукъуни бекIдарес, илдала мурад барес багьандан сецад къайгъиличил узес гIягIнилил пикрибаралли. Призывла, СВО-лизир бутIакьяндеш дирутала, багьудила, шила хозяйствола, сайтанала шайчирти ва цархIилтира сецад суалти лерал – илдани илди лерилра масъулти бекIдирули сари. Гьаман районна администрациялизи ва центрлизирти организациябази, учреждениебази дугьабилзес гIягIнибиркули саби. Чули бекIдеш дирути шимала ва халкьла гIямрулизир жигарла бутIакьяндеш дирули саби, халаси хIурматличи ва баркаллаличи лайикьбиркули саби.
Арбякьунси дуслизир Зубайдат БяхIмудкьадиева Россияла Федерацияла Федеральное Собраниела Пачалихъла Думала депутат Н.М.НурбяхIяндовла шайзирад Баркаллала кагъарличил шабагъатларарили сари. 2016 ибил дуслизир «Совет муни­ци­пальных образований РД» бикIуси Ассоциацияла Председадель М.МяхIяммадовла шайзирад Грамоталичи ва 2018 ибил дуслизир ДР-ла БекIла ХIукму хIясибли, «ДР-ла муниципалитетла кабизла хIурматла хIянчизар»-ибти умачира лайикьрикили сари. «Интербригада 1999г.» бикIуси ДРОО НО-ла советла Председатель, командир, Генерал-майор М.МутIалимовла шайзирад «СВО-ла бутIакьянчибас кумек гIеббаахъни багьандан» бикIуси медальличилра шабагъатларариб.
Илди кIелра жавабкарти, чебетаибти хьунул адамти дахъал дусмазиб Дагъистан ва район гьаладяхI ардукес багьандан халаси къайгъиличил бузули пай кабирхьнилис, хIялалси хIянчи ва СВО-лис кумек бирнилис «Ахъушала район» МО-ла администрацияла шайзибад чумал ХIурматла Грамоталичил шабагъатлабарили саби.
Чула гIямрулизир ва бузерилизир сархибдешуни имцIадикIаб, хIянчилизир гьамаддешуни ди­аб, чула дигутани разибирули хIербиэс кьадарбиаб!