Сергокъалала районна Мяммаулла шилизирадси Заира МяхIяммадиминовани М.В.Ломоносовла уличилси МГУ «шула» кьиматуначил таманбариб.
2022 ибил дуслизиб Мяммаулла урга даражала цахIнабси багьудила школа хъараахъурсири, ил дуслизир Москвализибси Михаил Ломоносовла уличилси пачалихъла университетла юридический факультетлизи карерхурсири . Багьудлумачи гъаргъси, бузериличи дигичерси Заирани ишдус ил хIунтIена дипломличил хъараахъур.
Ил районна чеалкIуси наслулис гIибратли ретаурли сари, суненира гьала тIашдатурти мурадуни ункъли детерхахъес халаси къайгъи дакIубируси. Нушанира Заира мубаракрирехIе ва юриспруденцияла кьялилизир гьаларяхI рашахъес гьарбизуни дулгехIе!