ХIямшимала cунезибад ба­хъал пагьмучебти, ба­гьу­дичебти адамти дура­бу­хъунси ши саби.
Ил шилизив акIубси сай машгьурси художник Къабукуев МяхIяммад Сулайбановичра.
МяхIяммад Къабукуев хIурматла ду­бур­­ланна хъалибарглизив халаваиб. Ил ур­­га даражала школа таманбарили гIергъи, Мя­­хIячкъалализибси Дагъиста пачалихъла пе­дагогический институтлизи керхурсири ва 1982 ибил дуслизиб ил институтла ху­до­­жественно-графический факультет хъа­ра­ахъурсири.
МяхIяммад институт таманбарили гIергъи, сунела минала ХIямшимала шилизи чарухъун ва урга даражала школализив ри­сованиела ва черчениела дурсри ка­дирхьу­ли узес вехIихьиб.
М.Къабукуевла бекIлибиубси хIянчи бе­таур суратуни дирни. Илала жура-жу­рала темабас багъишладарибти гIяхIцад суратуни лер. Илди-ургар тарихла, этнографияла темабас хасдарибти, сунела ши­ла тIабигIятла жагадеш чебиахъути пей­за­жунира чедаэс вирар. М. Къабукуевла «Делегаты схода Акушинского вольного об­щества», «Затерянный город в горах» бикIути халаси устадешличил дарибти суратуни лер.
МяхIяммад Къабукуевли дарибти суратуни Дагъистайзирцунра ахIи, Москва шагьарлизибти ва цархIилти мер-мусаличибти коллекционертани тIалабдарили дихIули лерли сари.
«Очаг мой — Дагестан» бикIуси республикала кьадрила выставкаличир бутIакьяндеш дарнилис, выставка хIядурбарибтала шайзивад, М.Къа­бу­куев ХIур­мат­ла Грамоталичил шабагъатлавариб.
2024 ибил дусла декабрьлизиб Ахъу­шала шилизибси З.Мя­хIяммадовала ули­чилси, ДР-ла Миллатла музейла фи­лиалли сабси историко-краеведческий му­зейлизиб М.Къабукуевли дарибти хIянчилис багъишлабарибси выставка бетерхурсири. Музейлизиб выставка барахъес пагьмучевси художник ила живарибсира музейла директор Зубалжат Мирзаева сарри. Выставкаличир гьаладихьилри М.Къабукуевла устадешличил далкьаахъурти суратуни. Выставка чебаэс башути гIяхIлани илди суратуни жагадилзули халаси иштяхIличил хIердарибтири. Ил музейлис художникли жагаси, «Закат» бикIуси пейзажла сурат пешкешбарибсири. Музейлизиб выставка ибхьухIели бетурхуси гьунибаъниличиб лебри илала хъалибарг, тухумти, школала бучIанти ва гIурра цархIилтира организациябала, учреждениебала жавабла хIянчизарти.
МяхIяммад Къабукуев музейлизив чеибхIели паргъатси, малхIямси, гIяхIти уркIи-хIялла, халаси пагьму лебси адамлизир хамдеш агара кьалли или, иличила пикри акIубсири.
МяхIяммад Къабукуевли ХIямшимала шилизивси машгьурси, пагьмучевси художник МяхIяммад Даудовлара ил искусстволичи диги акIахъес пай кабихьили сай. М.Къабукуевли дурсри кадирхьули шко­лализив узухIели, М.Даудов виштIали ле­валри, илизиб суратуни дирес пагь лебни аргъили, ил гьар шайчивадли гIевуцили, ху­дожествола гьуникад вашахъес кумеквиуб.
МяхIяммад Къабукуевла хъалибарг халкьла бухIнаб хIурматличил пай­далабикIуси саби. М.Къабукуевла гIям­рула рархкья жагати куц-кабизла регI, мал­хIямси Мариям ИсмягIилова районна рухI­нарра бегIлара гIяхIтигъунти филологуназирад ца сари. Илдани кIел урши-рурси абикьурли, гIяхIси бяркъра бедили, гIямрула бягIуси гьунчи дураили саби.
Гьаннала гIергъира гIямрулизир ва бу­зерилизир сархибдешуни, пагьмурти им­цIа­дикIули, сунела дигутани разивирули хIериэс кьадарбиаб!