ГIямрулизиб леб адамти, саби чебаибхIели уркIи разибирахъути, гIяхIти пикруми алкIахъути. Илдигъунтала лугIилизирадли сари ХIямшимала М.ГI.ХIясановла уличилси урга даражала школала урус мезла ва литературала учительница ИсмягIилова Мариям Наримановна.
—Нуни 1985 ибил дуслизиб Дагъиста Пачалихъла университетла филологияла факультетла урус мезла отделение таманбарира ва илхIейчирад рузулра школализир, — бурули сари Мариям Наримановнани. – Дила дудешла неш Мариям Эфендиева ХIямшимала шилизирад цаибси учительница рирусири. Дила дудешлира дахъал дусмазиб школализиб хIянчи барибси саби – учительли ва директорли узули. Нуша, узби-рузби-ургабра имцIатигъунтани учительла санигIят саби касибси. Халаси дигиличил, жавабкардешличил бузути педагогуни саби нушала школализибти, чумилра леб чучибад гIибрат касести. Илдас гIелахIерухъес, сагаси пайдалабарес, гIяхIси чебаэс къайгъилизир рирус.
Марьям ИсмягIиловала багьудилис ва къайгънас бикьридеш дирули сари учительла бузелизир сархибти шабагъатунани.
Мариям Наримановна чебяхIси категория мугIяллим сари. Россияла кьадрила конкурслизир 2006-ибил дуслизир гьаларикили, Россияла Федерацияла ХIурматла Грамота ва Президентла премия сархибси; «Учитель года» ибси уличилси конкурслизиб 2-ибил мер буцибси; 2019-ибил дуслизиб «Багьудила хIянчила отличник» ибси у касибси адам сари.
2022 ибил дуслизир илини Дагъистан Республикала машгьурси учитель Б.М.Байрамбеков акIубхIейчирад 100 дус дикнилис багъишлабарибси «Педагогическая династия» ибси уличилси конкурслизир бутIакьяндеш дариб ва 2-ибил мер буциб; 2023 ибил дуслизиб «ДР-ла рурибси мугIяллим» ибси у сархиб.
— Нушани бучIантази машгьурти мер-муса чедаахъес, илди республикала тарихла анцIбукьуначил тянишбиахъес кьасличил архIяби дурадуркIули дирехIе. Пушкинская карта хIясибли П.ХIямзатовала уличилси музейлизи ва «Дагестанский аул» бикIуси бахъал адамти башуси мерличи бучIантачил дякьунра. Гьаман дашули дирехIе районна музейлизир детурхути далдуцуначи, бутIакьяндеш дарира «Нешани мяхIкамбарая!» ибси уличилси ва гIяхIцад цархIилтира культурала учреждениебазир детерхурти далдуцуназир, – рикIи М.ИсмягIилова. – Нушала илдигъунти архIяби дурхIнала бегIтанира гIердурцули, чулира бутIакьяндеш дирули бирар.
Уржибси хъалибарглизир халараибси Мариямли хъалибаргра дурхIнас гIяхIси бяркъ бедлугнира гIяхIил кьиматлабарес балули сари. Ил сунела гIямрула вархкья МяхIяммад Къабукуевличил 41 дус рарх хIеррирули сари. Илдани дурхIнази багьуди касахъиб ва гIямрулизиб бархьси гьуни чеббикIахъес бажардибикиб.
МяхIяммадра пагьмучевси художник сай, районна центрлизиб ЧебяхIси ВатIа дергъла бутIакьянчибас памятник сагабирухIели, илини халаси хIянчи барибсири.
Мариям Наримановнани белчIудила сагаси дус бехIбихьиб сагати кьасаначил, гIяхIти пикрумачил. Гьардизаб сунела кьасани ва гьар бархIи сунела дурхIнанира сунени бучIахъути уршби-рурсбанира разирирули, гIямру деркIес кьадарбиаб сунес!
Марьям Ильясова, ТIантIала школала учительница
