Ахъушала цаибил урга даражала школала учительница Сабият Сункъуровна сунела хъалибаргличил дахъал дусмазир дила унраличир хIеррирули сари. Илини сунела гIямрула вархкья ГIябдулкарим Наримановичличил хIябал урши абикьур, илдази багьудира касахъили, гIяхIси бяркъра бедили, гIямрула бархьси дякьличи дураиб.
Нушала къатIлизиб бахъал дурхIни халабаиб. Илди-ургаб камхIебири алавчартас вайбаркь барес селизилра хIебирути, халасила хIурмат барес хIебалутира. ИсмягIиловхъала хъалибарглизибад дурабухъунти дурхIназибад нуни гьачамалра балагарси баркьуди чебаибси ахIенри ва лайикьагарси гъайла бакьибси ахIенри.
Уршби гьанна халакабаили, сабира дудешуни бетаурли саби ва саби бузуси мерличиб баркаллара хIурматра сархес бажардибикили саби. Илдала гIяхIси бяркъла хьулчи, дила пикрили, хала бегIтачибадал бехIбихьибси саби.
Сабият Сункъуровнала дудеш ХIямшимала шилизивадси ЧебяхIси ВатIа дергъла бутIакьянчи, Каспийск шагьарлизибси дявила гIягIниахълуми далкьарахъуси заводлизив узули, халаси хIурматра бирхаудира сархибси адам сайри. Сункъур Сункъуров СССР-ла Верховный Советла депутат сайри. Ахъушала районнизибад илцад ахъси даражаличи абикибти кIел адам саби – С.Сункъуров ва Урхьучимахьилизивадси колхозла председатель МяхIяммад ГIисаев.
Ну бегI гьалав С.Сункъуровличил къаршиикибсири Уйтяшлизив, бехIбихьудла школализив узухIели. Школала заведующийли ну депутатличи вархьибсири школалис хIяжатсила чебкад тиладила кагъарличил. ИлхIели наб якьинбиуб С.Сункъуров дебали гIяхIси адам виъни. Илини школала къуллукъ къантIси заманала бухIнаб бекIбарибсири.
Илис гIергъира чуйнара ил пергер адамличил къаршиикибти анцIбукьуни диуб шагьарлизирра шилизирра ва С.Сункъуровличила набзир гIяхIти гьанбикуни калун.
Дебали гIяхIси, паргъатси, малхIямси хьунул адам сарри Сабиятла неш Муъминатра. ГIямрула тяхIяр-кьяйда ункъли дяркъурси, адамдеш чихъли чедиуси ил гIякьлучерси хьунул адамличил ихтилатбарес дигесли бири. Адам мурхьли пикриухъеси гъай бурес бали илини.
Сабият Сункъуровнала бегIти гьанбушибхIели, ГIябдулкарим Наримановичла бегIтира гьанхIебушес хIейрус. Нариман ИсмягIилов ва илала гIямрула рархкья ХIябибат тамай гIяхIти, духути, адамтачи дигичебти мурталра дяхI шалати адамти сабри, сабира гIяхIси гъайличил шантанира дурашантанира гьанбуршути, бунагь-хатIа урдуцаб чула.
Сабият Сункъуровнани 1984 ибил дуслизиб Дагъиста Пачалихъла университетла филологияла факультет таманбариб ва илхIейчирад Ахъушала цаибил урга даражала школализир рузули сари. Ил чуйнара ХIурматла Грамотабачи лайикьрикиб, 2005-ибил дуслизиб Сабиятли «Россияла Федерацияла багьудила отличник» ибси лишан касиб. «Сабият Сункъуровнала класслизи дурхIни белкIахъес бегIти мурталра ургакабиркули бирар» ибти гъайра нуни чуйнара дакьибти сари.
Гьарли-марси педагог сари ил – чинаб-биалра хабуртазиб, гъай-мезлизиб замана хIебуркIу, школализира – хъулира, илгъуна саби гIямрула тяхIяр, бегIтани кабихьибси адамдешла гьуни.
ХIямшимала шилизирадти гIяхIцад хъалибаргуначил тянишсира ну ва илдазирад дегIлара гIяхIтала лугIилизиб саби или бурес дигулра дила унруби ИсмягIиловхъала хъалибарг. Мубаракбирулра Хъалибаргла дусличилра, учительла Байрамличилра ва чулара чула дурхIналара гIямрулизир дахъал разити бурхIни диубли дигулра!
М.Ванатов, бузерила ветеран
