Савли берхIила нурли
Шаладиру ахъ хIурхъи,
Игитла зубартани
Хамдирахъу дубурти.
Дубуртала тIабигIят сипатбарес багьандан дунъяла лерилра мезани пайдаладаралра, илала жагадешлис кьимат бедес илди хIедиур. Хаслира гIебшнила замана дубурти азир рангли варакьдарибхIели адам хIяйранвирахъуси сай. Дахадаевла районна мер-мусаличир ил манзиллизир цIедешла давлачерти сабухъуни дурчули, адамти саберхурли бирар. СирхIяла дубуртачир къярх ва цархIилти цIедеш дерхъили дирар. Муирала вацIурбазир хъярби, дургби, гIинцби ва дахъал журала цIедеш сецад-дигара дирар. Диркьала мер-мусара давлачерти сари ил районнизи кадурхути. Иш гьакIлис районна мургьила дай буцибси Трисанчила шилизибадси хабарла хъалибарглизирадси Алена ГIябдуллаевачила сари гъай.
Трисанчила ши-алав вава-кьар, цIедеш дерхъилицунра ахIи, ил шилизиб адамдеш ахъли дихIути, ламус-хIяяли жагабарибти, гIибратчерти баркьудлумачибли машгьурбиубти бахъал адамтира лебти саби. Илдигъунтазибадли Аленала у бегI гьалаб гьанбушес лайикьли саби.
Алена ГIябдуллаева акIубси сари 1966 ибил дусла августла 26-личир, Трисанчила шилизир. Шилизиб урга даражала багьуди касили гIергъи, 1986 ибил дуслизир ил ДГУ-ла филологияла факультетлизи карерхур. 1992 ибил дуслизиб илаб гIяхIти кьиматуначил белчIуди хъараахъур, урус мезла ва литературала мугIяллимли рузес рехIрихьиб. Рузули калун ил 2021 ибил дусла майличирадли 2022 ибил дусла сентябрьличи бикайчи Дахадаевла районна бекIла заместительлира. Ил манзилла бухIнаб илини шимала адамтала яшавла шуртIри ункъдиахъести тяхIурти далдурцнилизиб белгиси хIянчи бариб. Районна халкь-ургаб илхIели Алена МяхIяммадовнала хIурматра имцIабиуб. Хамдеш-халадеш агарси, адамтала зугIлуми иргъуси, гьарил дугьавизурсила вайра-гIяхIра гьунчидикахъес имканти дургуси, хIялалси бузериличирли машгьурриубси трисанчилан рурси гъамли рагьурсири илхIели дахадаевлантани ва илис уркIи-уркIилабадли баркалла бикIутири. ДекIар-декIарти кабизунала дахъал шабагъатуначи лайикьрикибси илис халкьла баркалла бегIлара чебяхIси шабагъат сабливан кьабулбирулира сари.
2022 ибил дусла мартличирадли А.ГIябдуллаевани СВО-лизир бутIакьяндеш дирути бургъантала хъалибаргунас кумек гIеббиахънила Фондлис бекIдеш дирули сари. 2022 ибил дусла апрельличир ДНР-ла ва ЛНР-ла адамтас 13 тонна продуктунала цаладяхъили, дархьибтири илала кумекличирли. Ишдус апрельличибра ЛНР-лизи ва Белгородла областьлизи бурхьуси кумекличилси камаз гьуниббалтнилизир бутIакьяндеш дариб. Аммаки жамигIятла гIямрулизир илини дирахъути гIяхIбаркьуни пикридаралли, аргъесли саби илини сецад зурбаси хIянчи дурабуркIулил. Районна администрацияла хIянчизартачил рарх ил хъулрази рашули сари СВО-лизир бутIакьяндеш дирухIели алхунти бургъантала хъалибаргуначи ва илдас яшавлашалти масъулти ирзнилизир гьар шайчибадси кумек гIеббиахъули сари. Республикализир ва районнизир дурадуркIути СВО-лизир бутIакьяндеш дирути бургъантира илдала хъалибаргунира гIеббурцнилис хасдарибти патриот бяркъ бедлугнила шайчирти далдуцуназир жигарла бутIакьяндеш дирули сари.
БусягIятла манзиллизир Алена МяхIяммадовна Умалатов Рабазан МяхIяммадовичла уличилси Трисанчила школала директорли рузули сари. Ил къуллукъ А.ГIябдуллаевачи 2017 ибил дуслизиб хъарбарибсири. Бузерила 41 дусла стажличилси машгьурси педагоглис 2019 ибил дуслизиб багьуди ва бяркъ бедлугнила РФ-ла ХIурматла хIянчизарла у бедибсири.
ГIябдуллаева Алена МяхIяммадовна устадешчерси, творчествола бетуцуни пайдаладирули, рузуси руководитель ва жамигIятла хIяракатчи сари. Сунечил барх бузутала, шантала ва районна жамигIятла ургар халаси хIурматличил пайдаларикIуси ил дубурлан хьунул адам чеалкIуси наслула вакилти мурхьти багьудлумачил бегIбиахъес ва гIибратчебси бяркъличи бикахъес багьандан сунела лерилра цIакьанира багьудлумира харждирули, сабухъчерли рузули сари.
Иракьила, Кудагула, Зилбачила шимала жамигIятлира ил чула шаннизи халрирули, адамтачи дигили рицIибси, хIурулгIянван малхIямси ва цазаманализиб гIяхIгъабзалагъунти хIял-тIабигIятличилси ил тамашала кьисматла адамла у пахруличил гьанбуршули саби.
ИшхIелла гьамадли ахIенси манзиллизиб нушала ахIерси неш-ВатIан багьандан жагьил жайрунти, гIязиз жан ахIерахIедарили, улкала хъархIерагардеш балтахъули дявила майдайчиб улхухIели, илини илди игитунала хъалибаргуни гIердуцес ва СВО-лизир бутIакьяндеш дирутас кумек гIеббаахъес багьандан дуги-хIери цадарили, гъабзадешла баркьудлуми дурадуркIули сари.
ЧебяхIси Россияла патриот сарливан, Алена МяхIяммадовна кIина рякьи сари Украинализи ва илаб гъабзадешличил бургъути багьадуртачил гьунираили сари. Иличибли багьесли саби сунела кьисматличила ва баркь-бацличила ахIи, ахIерси Дубуртар Улкала ва Россияла кьисматличила ил имцIали пикририкIни. Илгъуна адаб-яхIличилси ва ламус-хатирли жагарарибси дубурлан хьунул адам гIерруцес ва илала багалати баркьудлумас лайикьси кьимат бедес дигутани шабагъатличи лайикьлири или багьахъурхIели, илини ишгъуна жаваб бедили сари: «Се багьандан? Нуни се барилра шабагъатларарес багьандан? Нуни чIянкIли набчи хъарбарибси хIянчи ламусличил таманбирулра, наб дебали дигути Дагъиста ва улкала халкьла гьалаб дила чебла ахъси даражаличиб ахъес кьаслизирра…».
СВО-лизир бутIакьяндеш дирути бургъанти ва илдала хъалибаргуни гIердурцнилизи халаси пай кабирхьни багьандан А.ГIябдуллаева «Дагъиста асилдеш ва хIурмат багьандан» ибси медальличира лайикьрикибси сари. Алёна 1999 ибил дуслизир Дагъиста ополченияла Союзла къяянази кьабулрарибси сари.
Ил авал исбагьи рурсила неш сари. Илдас гIибратчебси бяркъ бедиб ва чучи лайикьти багьудлуми касахъиб. Илдазибадли кIел тухтур саби ва адамтала арадешлис къарауйчиб нешван цIакьани ахIерахIедарили, бузули саби. Илдала дудеш къаркъала къалагъуна гIяхIгъабза Шамил жагьти гIямруличив бехIемцIлизи викили, алхунсири. Амма Аленани илдази дудешла агри хIебагьахъур ва рурсби гIямрула бягIуси гьунчи дураэс багьандан дуги-хIери хIеили рузиб.
Алена МяхIяммадовнала бегIтира халкь-ургаб халаси хIурмат сархибти бахълис гIяхIдешуни дирути адамти саби.
Аленала неш ГIяйшат Бибалаева санигIят хIясибли тухтур сари, амма литературализибра илини белгиси мер буцили сари. Ил пагьмучерси поэт, писатель, журналист, публицист сари. Дахъал дусмазир МяхIячкъалализибси дурхIнала кIиибил поликлиникализир рузули, илини бахълис кумекла някъ гьабатур, биштIатала арадеш къулайбирнилизи халаси пай кабихьиб. Даргалацунра ахIи, урус мезличил дурадулхъути газетаби-журналтазир илала аргъбаибти ва адамтас гIяхIдизести макьалаби, назмурти, прозала произведениеби дурадулхъути сари. Иличила сецад гIяхIти гъай дуралра ва сецадхIи гъайикIалра лайикьлира саби, амма иш гьакIлис илала рурсиличила сари гъай. Илала дурхIни Идрис, Алена ва Эльмира адаб-хIяяла бегIти саби ва гIямрулизир чучи лайикьти меранира даргили, хIялай гIямру дуркIули сари.
Аленала дудеш МяхIяммад Бибалаев ахъти къуллукъуначив узули калунси виалра, хамдеш-халадеш агарси, адамтачил валикибси ва дубурлан гIяхIгъабзазир диэсти лерилра къиликъуначил вегIиубси багьадур сайри. Амма илала кьисмат кьяркьсили уббухъун, сунела къугъаси кулпетличил халкьласун диги ахъес валкьхIеурли, бегIлара гIямру вавалидяхъибхIели, итил дунъяличи арякьун.
Гьалабван Трисанчила шилизиб халаси шадлихъ бетерхур. Ил хасбарибсири улкала гьарли-марси игитси рурси ГIябдуллаева Алена МяхIяммадовнас мургьила зубари беднилис ва илис «Дагъиста халкьла Игит» ибси у беднилис.
«Замана» газетала коллективли илгъуна ахъси шабагъатличи лайикьрикибси дубурлан рурси уркIи-уркIиларадли мубаракрирули сари. Илис гьаннала гIергъира бузерилизир сархибдешуни, хъулиб баракат, рурсбала талихI ва гIямрулизиб арадеш диубли дигниличила балахъули саби.
Алена МяхIяммадовнас назмула ишди тугъира пешкешдирулра:
Муира машгьурбарес
Аллагьли акIахъубси,
Дарганти чебяхIбарес
Кьисматли ахъруцибси.
Зак бицIиб зубартазир
Сарри Шалда зубари,
Дагъиста чехьертазир —
Чарх-бекI арцла гьайкари.
Дубурла исбагьибас
ХIялалдешла мисалри,
Улкала мугIяллимтас
ГIибратла гьаркьянари.
ХIуни чеббикIиб гьуни
ТалихIли шалабараб,
АлкIалли дубуртазиб
Рурсби хIугъунти алкIаб.
ХIу игит риъниличи
Бирхули саби улка,
ХIела гъабзадешличи
Пахрубиру дарганта.
Тамара ГIябдусалимова
