Чедибдешла БархIила байрам дебали халкьлис дигуси, мурталра хIурматличил дурабуркIуси саби. Гитлерла гъармукабазибад ВатIан балтахъули алхунти нушала хала дудешунала гьунарти ва гъабзадеш хъумартес сеналра асухIебирар. Ишдус ил ЧебяхIси Чедибдеш сархибхIейчирад 80 дус дикили сари.
Улкала халкьли дахъал къиян-жапа ва гIязабти чедаили сархибси ил Чедибдеш нушаб мурталра дурхъасили кавлан. Ил Чедибдеш сархнилизи пай кабирхьули, 27 миллион адамли чула жан кьурбандариб: нушаб азадти гIямру ва шаласи зак диахъес багьандан.
ИшбархIира халаси хIянчи дурабуркIули саби алхунтачила ва къел-хIерзи агарли бетахъибтачила баянти даргес. Ургъан хIярибихьибси мер баргили, чула тухумтази багьахъур чумра анцIбукьра диуб. Буралли, Ахъушала районна Цугнила шилизибад 80 гIяхIгъабзали дергълизир бутIакьяндеш дарибтири. ДакIударибти гъабзадеш багьандан, бахъалгъунти декIар-декIарти шабагъатуначира лайикьбикибтири. Илдазибад 40 хъули чархIебухъун, алхунтира биуб, къел-хIерзи агарли беткахъибтира.
Ишди бурхIназир дахъал далдуцуни дурадеркIиб, Чедибдешла байрамлис хIядурдеш бирули. ВатIан багьандан алхунти гьанбиркахъес дарибти памятникуни къулайси агиличи дикахъиб. Школала бучIанти-ургаб иргъахънила хIянчи дураберкIиб, сецад халаси къиян кабихьили, ил Чедибдеш сархибсил аргъахъес. ЦархIилти шимазирван Цугнила шилизирра ВатIа дергълизиб алхунти гьанбиркахънилис багъишладарибти далдуцуни жигарчерли детерхур.
Памятникличи вавни кадирхьнилизир бутIакьяндеш дариб школала бучIантани, мугIяллимтани, администрацияла ва клубла хIянчизартани. Илав гъайулхъули историяла мугIяллим МяхIяммад Шейховли балбуцла бутIакьянчибази Чедибдешла хIурмат калахъес гIягIнили биъниличила, ВатIан багьандан чула жан дедибти шантачила хъумартес асухIебирниличила аргъахъиб. «Россия-алав ишбархIира Европала улкни хIявбуцIиван сари, илдала кумекличил сари адикьурти узити улкнала ургар дургъбира. ИтхIеливан ишбархIира нушала узби ва уршби ВатIан багьандан бургъули саби», — викIи ил.
Улкала Президент В.В.Путинни халаси пикри бяхIчииули сай Чедибдешла мягIна чеалкIуси наслулизи аргъахъес. 2019 ибил дуслизиб, илала сипта хIясибли, «Гьанбикунала анхъ» бикIуси балбуц гIямрулизиб дурабуркIес бехIбихьибтири. Пикри сабри 27 миллион галга удатес. Илди биалли, ишбархIи кIинали имцIали удатурли сари. 2022 ибил дуслизиб Цугнибра илгъуна анхъ убатурсири. Ил убатахъес сиптакарси сайри шила хозяйствола гIилмуртала кандидат, доцент ГIямар МяхIяммадович Рабазанов. Ишди бурхIназиб ил ибхьнила далдуцуни детерхур. Жагали барибси памятникла мармар къаркъа уркьуйзиб ВатIан балтахъули алхунтачила дурхъаси белкIра леб.
Бурес чебиркур, ишбархIира 46 цуглан уршили СВО-лизир жигарла бутIакьяндеш дирули сари, леб илди-ургаб Гъабзадешла орденничи лайкьбикибтира. Сецад хIейгеси биалра, кIел гIяхIгъабза гъабзадешла бебкIали алхун. Илдала уми ва гьунарти мурталра нушала уркIбазир даимлис кавлан.
Памятник ибхьули, гъайбухъун шила администрацияла бекI Рабазан НикIаев, ил барахъес сиптакарси ва сунела харжаначил ил барибси ГIямар Рабазанов, школала директор Рабадан Сулайбанов, историяла мугIяллим МяхIяммад Шейхов ва СВО-лизиб гъабзадешла бебкIали алхунти бургъантала бегIти Рабазан БяхIяммаевла дудеш ва илкьяйдали Рабазан НикIаммаевла нешла узи.
Игитунала гьунартачила ва гъабзадешла баркьудлумачила жагьилтази дагьахъес, илдачила шалати гьанбикуни даимлис «мицIирли» калахъес багьандан дурабуркIуси балбуц сабри ил. Нушаб илди гьанбикуни мяхIкамдарес ва чIеалкIуси наслуличи даахъес чебиркур. «Гьанбикунала анхъ»-ли пашмандеш иргъахънилизицун ахIенну, патриот бяркъ бедлугнилизира халаси пай кабирхьули саби. ДурхIназир биштIали лебай ВатIайчи диги адилкьес хъарси саби нушачи. Дирхулра, ил мер шантас бегIла дигусили бетарниличи, ва чула гIяхIгъубзнани халаси пахру бирниличи.
Халаси баркалла багьахъес дигулра ГIямар МяхIяммадовичлис ва илис кумеклибиубти шантас, нушала хала бегIтани Чедибдеш сархнилизи мягIничебси пай кабихьниличила хъумхIертнилис.
Жяв–жявли тамандиаб дургъбира, чарбухъаб нушала узби чула хъалибаргуначи!
Кьади ГIялисултIанов
