ХIянаев Халикь МяхIяммадович акIубси сай Ахъушала районна Усишала шилизив 1933 ибил дуслизив, гIядатла, хъалибарглизив.
1940 ибил дуслизив Усишала урга даражала школализи цаибил класслизи вякьунсири. ЧебяхIси ВатIа дявила замана, виштIали левалли, халати адамтачил варх тыллизив узес чебуркъибсири. Дергълис гIергъити дусмазивра мицIираг адилкьули, хъуми делгIули, сабухъ бурчули узули калунсири.
1960 ибил дуслизив ВатIайс къуллукъбарахъес живарибсири. Халикь ВатIайс къуллукъбирули калун Сумская областьлизибси Ахтырка бикIуси шагьарлизив. 1962 ибил дуслизив ВатIа хъарбаркь хIясибли, Халикь ХIянаев къуллукъбарахъес багьандан Демократияла Республика Кубализи вархьибсири. Илини «Карибский кризис» бикIуси анцIбукьлизирра бутIакьяндеш дарибтири. Халикь гъабзадешличил ВатIайс къуллукъра барили, 1963 ибил дуслизив гIярмиялизивад хъули чарухъунсири.
Ил 1968 ибил дуслизив Буйнакъск шагьарлизибси шила хозяйствола техникумла механическое отделениелизи керхурсири. 1971 ибил дуслизиб белчIуди таманбарили гIергъи, «Усишинский» совхозлизив шоферли узес вехIихьибсири. Усишала шила халкьла ургаб халаси хIурмат сархиб. Сунела хъалибарг абикьес багьандан, яшавлизиб гьарзадеш биахъес, халаси бузери барибсири Халикьли, совхозра, шира гьаладяхI ардукес бузерила пай кабихьибсири.
«Бузерила тылла ветеран» ибси уличи лайикьвикибсири. Халикь ХIянаев, Россияла Федерацияла Президент В.В.Путинна 2024 ибил дусла сентябрьла 2-личиб дурабухъунси ХIукму хIясибли, ЧебяхIси ВатIа дергъла замана тыллизиб бузули, халаси бузери барибти, хандакьуни хIядурдирули, калунти адамти кьяйдали «1941-1945-ибти дусмазиб ЧебяхIси ВатIа дергълизиб сархибси Чедибдешлис – 80 дус» бикIуси медальличил шабагъатлаварибсири.
Илини сунела гIямрула рархкьячил урегал урши-рурси абикьур, гIяхIси бяркъра бедили, багьудира касахъили, хъаллара барили, гIямрула гьунчи дураиб.
Гьанна Халикь Усишала шилизив сунела дурхIначил варх халаси хIурматличил, дигиличил алавуцили хIерирули сай.
С.ГIябдуллаева
