Дахадаевла районнизиб мерлабиубси саби пергер ГIяштила ши. Илизиб хIербирути адамтала лугъат гIярбукIла лугъатличи мешубиркули бирар.
ХIера, ил шилизирадси сари ГIяйшат Бариевара – нушала макьалала игит Сулайбан МяхIяммадовла хала неш.
МяхIяммадов Сулайбан ХIяжиевич акIубси сай 1975 ибил дусла октябрьла 9-личив Дербентла районна Чинар бикIуси шилизив. Илала дудеш хъулри лушан сайри, дебали миллатла культурала далуйти ва макьамти дигахъи. ЧебяхIси ВатIа дергълизиб сархибси Чедибдеш 40 дус биънилис хасбарибси лебил Союзла художественный самодеятельностьла пагьмуртала балбуцлизир жигарла бутIакьяндеш дарни багьандан, хасси Дипломличилра шабагъатлаварибсири.
Сулайбан МяхIяммадов, 1993 ибил дуслизиб Чинарла школа таманбарили, ДГПУ-ла географияла факультетлизи керхур. Илабра белчIуди хъараахъурли, санигIятличи вегIиубли, Чинарла 2-ибил школализир сунела бузерила цаибти гунзри кацIиб. Ил илав 1998 ибил дусличивад 2003-ибил дусличи бикайчи географияла мугIяллимли узули калун. Новолакла районнизи гечиубли гIергъи, Новолакла, Ахарла ва Чапаевла школабазиб хIянчи бариб.
2006-ибил дусличивад гьанна бикайчи Новокулила 2-ибил школализир географияла дурсри кадирхьули узули сай. Баягъи ил школализив 2006-2007-ибти дусмазив директорла бяркъла шайчирти хIянчи гьунчидиркахъуси заместительлира калун. Цазаманализив илкьяйдали С.МяхIяммадов узули сай «Альтаир» бикIуси пагьмурти гьаладяхI дашахъуси Центрлизивра чеимцIаси багьудила педагогли.
Хъайчикайибси сай, хIябал рурсила дудеш сай.
Сулайбан МяхIяммадовлис дебали дигахъу край руркънила бетуцра. Илини бучIахъути дурхIнани мурталра районна ва республикала ил масъалалис хасдарибти конкурсуначир бутIакьяндеш дирули ва гьаларти мерани дурцули дирар.
Новолакла районнизибадти цархIилти вакилтачил 2015 ибил дуслизив ил, ЧебяхIси Чедибдеш сархибхIейчирад 70 дус диркнила байрамлис гьалав, игит-шагьар Волгоградлизи вякьунсири. Илкьяйдали илдас имканбакIиб Советский Союзла Игит Ханпаша Нурадилов хIяриихьибси мерличи, Букановская станицализи букьесра.
Пагьмучевси адам гьарра шайчивадли пагьмучевсили увулхъули вирар. Сулайбан МяхIяммадовра гIяхIси педагог, пергер насихIятчицунра ахIенну, «Дергъла дурхIни: дурхIнала 16 ибил Юртла тарих» бикIуси жузлара дагъистанлантала гъабзадешличила бурути чумал брошюралара автор сай. СВО-ла бутIакьянчибачила, Россияла Игитуначила чеалкIуси наслулизи бурули, илдачила хъумхIертахъес махбирули сай авторли жузи дучIанти. Гьайгьайрагу, ил гIулухъаби ВатIайчи дигичебли абилкьнилизи кабирхьуси мекелли халаси пайра саби.
2018 ибил дусла мартличиб С.МяхIяммадовли чеимцIали багьуди бедлугути педагогуни-ургаб дурабуркIуси лебил Россияла «ДурхIнас уркIи пешкешбирулра» бикIуси конкурсла республикала бутIаличиб кIиибил мер буцибсири. 2022 ибил дусла апрельличиб биалли, школала ТОКС-ли илала бекIдешлиуб республикала «ДР-ла ТОКС-ла бегIлара гIяхIси отряд» бикIуси конкурсличиб хIябъибил мер буцес имканбакIибсири.
ГIяхIси педагогла, акIубти мер-мусаличи дигили вицIибси адамла пагьмуртала урунж ишбархIира парчбикIули саби. Илини мурталра уржибти бархбасуни дузахъули вирар республикала декIар-декIарти газетаби-журналтачил, илдази макьалаби суненира хIядурдирули. Гьанналис илини районна ва республикала газетабази 300-цад макьала делкIи сай. Илини макьалабала дурарад, кроссвордунира цаладирхъули вирар.
Сулайбан МяхIяммадовла пагьмулашалси бузерила дазурби гIяхIцадла дягIути сари. Ила кадурхар: спорт, тарих, культура, искусство, музыка, кино, шими, адамти. Илала хIялумцIлабала бузерилизиб, гьайгьайрагу, мекелли халаси мер бурцули саби Дагъиста дурхIнала Юртананира. Педагогли илкьяйдали Расул ХIямзатовла творчестволис хасдарибти белкIанира дураиб.
Ишдусла дуцIрумлизиб Сулайбан МяхIяммадовлис Москвализи укьес кьадарбиуб. Илала архIяла хIясилтили детаур Дагъиста печатьлизир дурадухъунти макьалабира. Улкала тах шагьарлизив ил А.А.Остап-Свешниковла уличилси дурхIнала-гIулухъабала туризмала ва край руркънила халкьани-ургабси Академияла член-корреспондент ветаур, лебил Россияла гIилмула-практикала конференцияличир бутIакьяндеш дариб. Илала баянти хIясибли, сборникра дурабулхъуси саби. С.МяхIяммадовла шабагъатуначила буралли, илди-ургар лер «Лебил Россияла адамти хIисаблизи кайснила хIяракат дурабуркIнилизи белгиси пай кабихьни багьандан» медаль, «2002-ибил дусла лебил Россияла адамти хIисаблизи кайснила хIяракатлизир жигарла бутIакьяндеш дарни багьандан» михъирличи биршуси лишан, «ТОКС-лис 50 дус» бикIуси юбилейла медаль, «лебил Россияла ветерантала организацияла Дагъиста регионна отделениела шайзибадси «Дявила-патриотизмала жигарчебси бузерилис» медаль, гIяхIцад ХIурматла Грамотаби ва цархIилти.
МугIяллимла лерилра къайгъни чеалкIуси наслулизи игитуначила багьахъниличи, сабира гIяхIгъубзнили ва ВатIайчи дигичебти гьарли-марти патриотунили халабиахъниличи дяхIчиаибти сари. Педагоглис гьаннала гIергъира сунела асилси бузерилизир гьарбизуни ва сархибдешуни дулгехIе!
З.Салимова
