ГIямарова Сакинат Мя­хIям­мадовна акIубси сари Ахъушала шилизир хIур­­матла хъалибарглизир. Сакинат МяхIяммадовна, Ахъу­­­шала урга даражала кIиибил шко­ла таманбарили, 1977 ибил дус­­лизир МяхIячкъалализибси Да­гъис­­та пачалихъла пединститут­ли­зи карерхур. Пединститут таманба­рили, педагогла санигIятличи регI­риуб­ли, шила школализир англияла мезла дурсри кадирхьули рузес рехI­рихьиб. БусягIятра ил шко­лализир рузули сари. Сакинат Мя­хIяммадовнала лебилра бузерила стаж гьанна 48 дусличи абикили са­би. Илдазирад 30 дусличи гъамли директорла бяркъла шайчирси за­мес­тительлира рузули сари.

48 дусла бухIнаб Сакинат ГIя­ма­­ровани бучIахъули калунти дурхI­­ни бахъал саби. Гьанна ил­ди-ургаб леб жура-журала са­ни­гIя­­туначил бегIбиубли, халкьлис ман­пагIятбирути, баркалла сархибти адамти. Илди саби тухтурти, учительти, школабала директорти, организациябала руководительти, университетуназиб преподавательти ва гIурра бахъал цархIилтира.

Сакинат МяхIяммадовна дурхI­ни бучIахъес, илдази сунени кабир­хьуси дарс аргъахъес, гIяхIси бяркъ бедес халаси къайгъиличил рузули сари. Ил багьандан, илини бучIахъули калунти илис гьаннара баркалла бикIули саби.

МалхIямси, жагали гъайрикIуси, дяхI шаласи, халкьличи дигичерси Сакинат ГIямаровани сунечил барх бузутала ва шила халкьла-ургаб хIурмат сархили сари.

«Ну чиди-биалра организация­лизи рухIнарухъасли, нуни бу­чIа­хъули калунти къаршибиркур. «Се къуллукъ лебли ракIибсирив» или хьархъардаили дила къуллукъ гьун­чибикахъили рурхьура. Наб ди­ла хIянчи, набчил барх бузути педагогуни ва дурхIни дебали дигахъис. Дила гIямрулизиб цаибил мерличиб саби дурхIнас бяркъ бедес, гIяхIси багьуди касахъес къайгъиличил рузес. Ну, школализи хIерашули хIерриэс хIерирус или гьанбиркуси саби», –бурули сари Сакинат МяхIяммадовнани.

С.ГIямаровала бузерира пачалихъли чихъли кьиматлабариб: «Ахъушала район» МО-ла администрацияла, багьудила управлениела ва школала шайзирад ХIурматла Грамотабачил шабагъатларариб.

Ишдус Ахъушаб культурала КIял­­гIялизиб бетерхурси кон­фе­рен­цияличиб Сакинат ГIя­ма­рова «РФ-ла багьудила кьялилизирси хIурматла хIянчизар» ибси уличи лайикьрикни багьандан шабагъатларариб.

Сакинат МяхIяммадовнани су­не­ла гIямрула вархкьячил барх хIя­бал урши-рурси абикьур, гIяхIси багьудира касахъили, гIямрула гьунчи дураиб. Урши Дагъиста пачалихъла пединститут таманбарили, сунела неш рузуси школализив педагогли узули сай. Ца рурси медицинала академия таманбарили, тухтурла санигIятличи регIриубли, Ахъушала районна больницализир неврологли рузули сари. РиштIасигъуна рурси, медицинала колледжлизир ручIуси замана, заочно пединститутлизирра ручIули кIелра тамандарили, кIел диплом касиб, кIел санигIятличи регIриуб. Гьанна биалли Сакинат ГIямаровала дурхIначибад акIубтира леб авал урши-рурси, илди абикьахъес къайгъилизир сари.

Гьаннала гIергъира сунела гIямрулизир ва бузерилизир сархибдешуни, баракат имцIадикIаб!

 

Сабият ГIябдуллаева